Azərbaycan mediasına dövlət dəstəyi fasiləsiz təkmilləşdirilən mexanizmə çevrilir...
İyunun 1-də Azərbaycan Medianın İnkişafı Agentliyi onlayn (veb-saytlara) və çap mediası subyektlərinə dəstək layihəsi çərçivəsində 2022-ci ilin ikinci yarısı üçün elan edilmiş müsabiqənin nəticələrini açıqlayıb. Məlum olduğu kimi, agentlik tərəfindən 39 xəbər saytına və 16 qəzetə maliyyə yardımı ayrılıb.
Qeyd edək ki, layihə çərçivəsində həftədə bir nömrəsi maliyyələşdirilən qəzetlərin hər birinə aylıq 5 000 manat, həftədə beş nömrəsi maliyyələşdirilən qəzetlərin hər birinə isə aylıq 15 000 manat məbləğində maliyyə yardımı göstərilir.
16 qəzetə və 30-dan çox onlayn (veb-saytlara) mətbuata dövlət vəsaitinin ayrılması medianın inkişaf etməsi üçün necə bir siyasətdir? Bu hansı nəticələri verir?
- Faiq Balabəyli: “Mən dövlətin mediaya göstərdiyi maliyyə dəstəyini alqışlayıram”
Müstəqil.az saytının baş redaktoru Faiq Balabəyli “Bakı-Xəbər”ə şərhində bildirdi ki, dövlətin mediaya maliyyə dəstəyini çox yüksək qiymətləndirir. F.Balabəylinin sözlərinə görə, 16 qəzetə və 30-dan çox onlayn media subyektinə vəsait ayrılması ölkənin media orqanlarının inkişafına böyük təkan verir: “Mən dövlətin mediaya göstərdiyi maliyyə dəstəyini alqışlayıram. Ölkədə media varsa o medianın ayaqda durması, inkişaf etməsi üçün maliyyə qaynağı da olmalıdır. Medianın maliyyəsi olmalıdır ki, ölkənin daxilində və xaricində baş verənləri operativ, obyektiv şəkildə işıqlandıra bilsin. Redaksiyaların texniki təminatıdır, texniki avadanlıqların alınmasıdır, işçilərin maaşıdır və sair hamısı üçün maliyə vəsaiti tələb olunur. Bu baxımdan dövlətin media subyektlərinə göstərdiyi maliyə dəstəyinin böyük əhəmiyyəti var. Bu dəstəyin davamlı xarakter daşıdığı məlumdur.
Hər kəs bilir ki, çap mediası da, onylayn KİV vasitələri də öz güclərinə maliyyə vəsaiti əldə etmək iqtidarında deyillər. Bilirsiz ki, oxuculuq qabiyyəti də aşağı düşüb, reklam bazarı da ürəkaçan səviyyədə deyil. Dövlətin dəstəyini alqışlayıram. Bir mətbuat orqanı nəşr olunursa, onun mütləq qaydada sponsoru olmalıdır. Paranı kim verir, sifarişi də o verir. Bu halda obyektiv olmayan məlumatlar da sıza bilər. Təcrübə göstərir ki, xaricdən maliyyələşən mətbu orqanlar da var, onların da çıxışları, açığı, dövlətimizin ziyanınadır, əleyhinədir. Həm iqtisadi, həm siyasi, həm də mənəvi cəhətdən bunun ziyanı özünü göstərməyə bilmir. Xaricdən maliyyələşən internet televizya kanalları, qəzetlər, xüsusi qruplar var idi və sair.
Azərbaycan Medianın İnkişafı Agentliyinin bu addımını müsbət qarşılayıram. Düzdür, mən müstəqil.az saytının baş redaktoru olaraq müsabiqəyə müraciət etməmişdim, amma növbəti müsabiqəyə müraciət edəcəyəm. Bu addımı alqışlayıram və bunu çox gözəl düşünüblər”.
- Rəşad Məcid: “Bu qədər media subyektinə dövlət tərəfindən maliyyə ayrılması çox müsbət nəticələr verir”
“525-ci qəzet”in baş redaktoru Rəşad Məcid də hesab edir ki, dövlətin bu addımı qəzetlərin, onlayn medianın həyatında mühüm rol oynayır. “Medianın İnkişafı Agentliyi yarandığı gündən çox işlər görüb. “Media Haqqında” Qanun hazırlanmasında MEDİA-çox böyük xidməti var, gərgin işlədilər. Eyni zamanda həm jurnalistlər, həm də media subyektləri arasında müsabiqənin keçirilməsi sahəsində təqdirəlayiq işlər görürlər. Artıq KİV-lər arasında keçirilən müsabiqənin nəticələri elan olunub. Uzun müddət idi ki, ənənəvi olaraq çap mediası maliyyələşirdi, son dövrlərdə onlayn medianın maliyələşməsi həyata keçirilir. Müsabiqənin nəticələri də müsbət təsir bağışladı və bu qədər media subyektinə dövlət tərəfindən maliyyə ayrılması çox müsbət nəticələr verir
Düzdür, bizdə yeni media adına iddalı olan saytlar da var. Burada hansısa aydınlıq yaratmaq mürəkkəbdir. Hesab edirəm ki, qənaətbəxş nəticələrdir. Gələcəkdə də bu sahədə təkminləşdirmə vacibdir. Həmişə demişəm ki, Azərbaycanda reklam bazarının qıtlığı, artıq yeni medianın yaranması nəticəsində ənənəvi çap mediasının, qəzetlərin əvvəlki kimi iqtisadi imkanları yoxdur. Buna görə də, dövlət məhz neçə ildir ki, göstərdiyi maliyə imkanları hesabına qəzetlərin sıradan çıxmaması üçün çalışır, bu cür maliyə dəstəyi göstərir. Buna görə də, Azərbaycan Prezidentinə bizim sənətimizi, çap mediasında məşğul olan jurnalistlərin əməyini qiymətləndirdi, qorudu saxladı. Əlbəttə, yeni medianın dövrüdür və yeni medianın da sayları çoxdur. Amma zaman keçdikcə yəqin ki, ələnəcək, ən peşəkar yeni saytlar daha çox uğur qazanmağa başlayacaq. Həmişə olduğu kimi, arzu edirəm, Azərbaycanda reklam çox olsun ki, heç medianın dövlətin bu cür maliyyə dəstəyinə ehtiyacı olmasın”- deyə R.Məcid bildirdi.
İradə SARIYEVA
