Qarabağ separatçılarının Moskvadakı ofisini bağlamaq indi yada düşdü...

img

Ermənistanın mediası rəsmi mənbələrinə istinadən yazıb ki, Qarabağ separatçılarının Rusiyanın paytaxtı Moskvada fəaliyyət göstərən “nümayəndəliyi” tezliklə bağlanacaq.

Məlumatda bildirilir ki, Ermənistanın Rusiyadakı səfiri Vaqarşak Arutyunyanın həm Rusiyanın rəsmi elitası, həm də səfirliyin heyəti ilə münasibətləri o qədər də rəvan getmir:

“Artıq Ermənistan səfirinin ehtiyatlı olması, cangüdənlərin müşayiəti ilə gəzmək vərdişinin Rusiya dövlət strukturlarının diqqətini çəkdiyi və hətta Rusiya xarici işlər nazirini təəccübləndirdiyi barədə yazmışdıq. Üstəgəl, Vaqarşak Arutyunyan Ermənistan XİN-ə məlumat vermədən, mümkün qədər müstəqil fəaliyyət göstərmək istəyir, bu da erməni diplomatları tərəfindən o qədər də xoş qarşılanmır. Üstəlik, etiketə görə, səfir görüşləri zamanı diplomatlarla müşayiət olunmalıdır, lakin o, səfirlik işçilərinə o qədər inanmadığından, heç bir diplomatı özü ilə aparmır, görüşlərə cangüdən rolunu oynayan əmisi oğlu ilə gedir.

Səfirlik mənbələrimizin verdiyi ikinci xəbər odur ki, “Artsax”ın Rusiyada 90-cı illərdən fəaliyyət göstərən “daimi nümayəndəliyi” tezliklə bağlana bilər. Bu “struktur”un rolunu səfirliyin ikinci nümayəndəsi yerinə yetirəcək”.

Çox maraqlıdır, Moskva qondarma qurumun “nümayəndəliyinin” bu illər ərzində fəaliyyətinə niyə şərait yaradıb?

Rauf Zeyni: “Rusiya bu adla “nümayəndəliyin” öz ərazisində mövcudluğunu rəsmən inkar edibsə…”

Milli Qeyri Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, belə adla nümayəndəliyin mövcudluğunu yalnız ermənilər iddia edib: “Yadımdadır, bir neçə il bundan əvvəl də belə məlumat yayılmışdı. Həmin vaxt Rusiya Xarici İşlər Nazirliyinin rəsmi nümayəndəsi Mariya Zaxarova rəsmən bəyan etdi ki Moskvada “Artsax” adlı qondarma qurumun heç bir nümayəndəliyi mövcud deyil. Buna dair məlumatlar hələ də internet resurslarında qalır. Moskvada "Azad Artsax 30 il" adlı dəyirmi masa keçirilmişdi. Tədbirdə iştirak edən Albert Adriyan adlı şəxs özünü qondarma qurumun nümayəndəsi kimi təqdim etmişdi. Rusiya XİN bunu belə şərh edib: Moskvada “Artsax Respublikası”nın  heç bir nümayəndəliyi mövcud deyil. Məlumatda qeyd olunan Adriyan Ermənistan Respublikasının Rusiyadakı səfirliyinin müşaviridir. Bütün hallarda o, Rusiya XİN-də belə akkreditə olunub”.

Bütün bunlar onu deməyə əsas verir ki, Rusiya bu adla “nümayəndəliyin” öz ərazisində mövcudluğunu rəsmən inkar edib. Deməli, bu məlumatı heç ciddiyə almağa dəyməz. Yəqin partizan fəaliyyəti ilə məşğul olublar”.

Məhəmmədəli QƏRİBLİ

 

 

Peşə etikası

Son xəbərlər