Son bir ildə Ermənistanda və separatçılar arasında ayrı-ayrı şəxslər arasında qarşılıqlı ittihamlar artıb. Onlar bir-birini müxtəlif məsələlərdə günahlandıraraq paxırlarını açırlar. Bu bir ildə separatçıların 30 ildə Qarabağda törətdiyi əməllər, talanlar, qarətlər və sair cinayətlər üzə çıxarılır. Özü də ermənilərin özləri tərəfindən.
Erməni videoblogeri Roman Baqdasaryan öz Teleqram kanalında Qarabağ separatçılarının “müqəddəs atası” Pargev Martirosyanın çirkin əməllərini ifşa edib, “müqəddəs ata”nın Qarabağda ev alveri ilə, rüşvət yığmaqla məşğul olduğunu bəyan edib. Baqdasaryan bildirib ki, Şuşa işğal olunduqdan sonra, 1992-ci ildən başlayaraq Pargev ermənilərə azərbaycanlıların evlərini paylayırmış və buna görə “otkat” alırmış. “Müqəddəs ata” Şuşa azad olunarkən Qarabağdan qaçıb. Separatçıların “müqəddəs atası” Qarabağdan qaçıb gedib, amma orada olduğu müddətdə burda onun göstərişi ilə başqa cinayətlər də baş verib. Bu barədə Baqdasaryan deyib ki, 2020-ci ilin payızında “erməni hərbçiləri” Hadrutu “müdafiə” edərkən, atəş xəttindən kənara çəkilən ermənilərin evlərini talan edirmişlər. Oradan gedən ermənilərin evlərini erməni əsgərləri özləri talan edib. Separatçıların “müqəddəs atası” həm evlərin paylanmasına, həm də talana rəhbərlik edirmiş.
“Qoy dünya görsün ki, xristian dininin çətiri altında gizlənən separatçı “dindar”...”
“Müasir İnkişaf” Birliyinin sədri, siyasi şərhçi Mübariz Göyüşlü “Bakı-Xəbər”ə bildirdi ki, separatçıların özlərinin və “dini liderlərinin” qara əməlləri haqqında ya qismən, ya da ümumi məlumatlara malik idik, bu məlumatları isə müxtəlif mənbələrdən alırdıq. “Biz erməniləri yüz ildən yuxarıdır ki, tanıyırıq və onların özlərinin də, keşişlərinin də hər cür neqativ əməllər törətməsi yeni bir hal deyil. Onları hansı əxlaqa, hansı xislətə, “qabiliyyət”ə sahib olan bir toplum kimi hər kəs tanıyır. Ona görə də, separatçıların “müqəddəs atası”nın Qarabağda hansı əməllər törətdiyi, ev alveri ilə məşğul olduğu, rüşvət yığdığı bizim üçün təəccüblü görsənmir. Pargev adlı şəxsin “dindar” donuna girib din çətiri altında belə qara əməllər törətməsi gözlənilən idi. Bunu təbii qarşılayırıq. Biz onsuz da ermənilərin özlərindən də, separatçı “dini liderlər”indən də hər cür çirkinlik görmüşük, onların nələrə “qadir” olduqlarını bilirik. Amma separatçıların “müqəddəs atası”nın çirkin əməllərinin ermənilərin özləri tərəfindən ifşa edilməsi müsbət haldır. Qoy dünya görsün ki, xristian dininin çətiri altında gizlənən separatçı “dindar” nələr törədib, azərbaycanlıların evlərini ermənilərə paylayıb, əvəzində pul alıb, talana rəhbərlik edib. Bunu biz deyəndə ermənilər də, dünya birliyi də, müəyyən ölkələr də bizim fikirlərimizi qərəzə yozurlar ki, “azərbaycanlılar ermənilərlə düşməndir və təbii olaraq bu şəkildə də təqdim edirlər”. Amma görürsüz, özləri özlərinin paxırını açıb ifşa edirlər, 30 il müddətində kimin nə etdiyini, hansı əməllə məşğul olduqlarını real faktlarla ortaya qoyurlar”.
M.Göyüşlü hesab edir ki, sadə erməni xalqı bu faktlardan özləri üçün bir nəticə çıxarmalıdır. Ekspertin dediyinə görə, ermənilər bilməlidir ki, onları qızışdırıb sonu görünməyən oyuna salan, onlara faciələr yaşadan “keşişlər”, daşnaklar, xaricdəki erməni lobbisi bir məqsədə xidmət edir - sadə ermənilərin üzərindən oyunlar oynamaq, var dövlət qazanmaq. “Biz bunu bilirik, amma bunu ermənilərin də bilməsi lazımdır. O cür “müqəddəs atallar”ı erməni xalqı özü cəzalandırmalıdır, onların çağırışlarına cavab verməməlidirlər. Sadə erməni xalqının nicatı Türkiyə, Azərbaycan və başqa qonşu ölkələrlə dinc şəraitdə yaşamaqdadır. Onları müharibəyə, konflikdə, uçurum sürükləyən şəxslərə yox deməlidirlər”- deyə M.Göyüşlü bildirdi.
İradə SARIYEVA
