“Noyabrın 26-da Rusiya prezidenti Vladimir Putinin vasitəçiliyi ilə Azərbaycan və Ermənistan rəhbərləri arasında imzalanmış sazişi dəstəklədiyimi dilə gətirməkdən məmnunluq duyuram”. Belə bir açıqlama ilə fransalı senator Natali Qule çıxış edib.
Senator daha sonra qeyd edib: “Onu da vurğulamaq istərdim ki, sülh razılaşması tərəflərin öz təşəbbüsüdür. Xüsusilə də burada, Fransada siyasi partiyaları sülhə deyil, müharibəyə sövq edən erməni lobbisi bizi dərindən narahat edir və onlar prosesə heç də kömək etmirlər. Məsələnin həlli xaricdən yox, erməni və Azərbaycan xalqından gələcək”. Senatorun sözlərinə görə, imzalanmış bu saziş Azərbaycanın geri qaytardığı və öz ərazi bütövlüyünü bərpa etdiyi regionda sülh və sabitlik üçün böyük addımdır: “Mən bu razılaşmadan sonra özümü çox xoşbəxt və ümidli hiss edirəm. Məncə, bu çox vacib bir addımdır. Eyni zamanda, bütün dünyadakı erməni lobbisinə yalvarıram ki, prosesə mane olmasınlar. Çünki daha əvvəl dediyim kimi, bu provokativ hərəkətlər hər cür həll yolunu təhlükə altına qoyur. Mən bölgədəki xalqlara hər şeyin ən yaxşısını arzulayıram, bildiyiniz kimi, mən Azərbaycanın ərazi bütövlüyünü və Azərbaycan Respublikasını qətiyyətlə dəstəkləyirəm”. Qeyd edək ki, erməni lobbisinin regionda sülhə xələl gətirən fəaliyyəti artıq Ermənistanın özündə də tənqid hədəfidir. Erməni politoloq Ruben Meqrabyanın Rusiyadakı erməni lobbisinə xitabən səsləndirdiyi fikirlər də bunu təsdiq edir: “Bizə Moskvada yumşaq divanın üstündə oturub vətəni necə sevməyi öyrətməyin”. Bloger Roman Bağdasaryanın efirində qonaq olan politoloq 1988-ci ildən bu yana yığılan problemlər, keçmiş və indiki rəhbərliklərin fəaliyyəti, orduda olan vəziyyət və sair barədə sualları cavablandırarkən lobbi haqqında olduqca maraqlı məqamlara toxunub. O, 44 günlük müharibə zamanı lobbi və diasporun ordunu taladığını bildirib. Meqrabyan problemlərin kökünün əsas mənbəyi kimi erməni diasporunu göstərib. O, Ermənistanda yaşamayan, vergi ödəməyən, uzaq ölkələrdən hökuməti idarə etmək istəyən, xalqı öz yalanları ilə aldadan lobbistləri günahlandırıb: “Ermənistanda yaşamırsan, vergi ödəmirsən, hərbi vəzifən yoxdur, sənin nəyinə lazımdır hökuməti kim idarə edir, necə idarə edir, yaxşı hökumətdir, pis hökumətdir, baş nazir kimdir, düz işləyir, ya yox, sənin nəyinə lazımdır? Faydalı olmaq istəyirsən ol, yararlı olmağı bacarırsan ol, amma bizə mane olmayın, icazə verin, problemlərimizi özümüz həll edək, ayırd edək kim yaxşıdır, kim pisdir, kim düzdür, kim düz deyil. Onsuz da biz bilirik ki, burada heç kim müqəddəs deyil, indiki hökumət bəzi şeylərdə düzgündür, bəzilərində yox… Biz hələ çox şeyi yoluna qoymalı, qaydasına salmalıyıq, bəzi şeyləri birdəfəlik silib atmalıyıq. Çox səhvləri düzəltməli, çox şeyi yenidən başlamalıyıq. Əgər kömək edə bilirsinizsə, buyurun edin, yox, kömək edə bilmirsinizsə, əl çəkin bizdən, bizi sakit buraxın, özümüz həll yolunu taparıq. Sizin məsləhətinizə ehtiyacımız olsa, soruşarıq. Moskvada yumşaq divanda oturub bizə vətəni necə sevməyi öyrətmək lazım deyil”. Roman Baqdasaryan da erməni lobbistlərinə qəzəbini saxlaya bilməyərək onlara səslənib: “Siz bilirsinizmi ki, divanda oturub erməni ordusunu və indiki hökuməti tənqid etməklə ordunun ruh yüksəkliyini aşağı salırsınız? Rusiyada, Ukraynada, Moldovada oturub kabab çəkib konyak içirsiniz, fikirləşirsinizmi ki, postlarda əsgərlərimiz gecə-gündüz keşik çəkir? Kömək etmək əvəzinə, hökuməti daş-qalaq edirsiniz. Açıq deyin ki, qorxursunuz, qoy hamı eşitsin, qorxduğunuzu boynunuza alın”.
Qeyd edək ki, Ermənistan 1991-ci ildə Sovet İttifaqından ayrıldıqdan sonra dünyanın ən böyük və güclü diasporlarından biri olan erməni diasporunun dəstəyini həmişə hiss edib. Bu dəstək müharibə, zəlzələ, ticarət embarqoları və siyasi iğtişaşlarla çalxalanan Ermənistan için həm maddi, həm də mənəvi olaraq önəm daşıyırdı. Amma son vaxtlar Ermənistan ermənilərilə diaspor ermənilərinin münasibətlərinin korlanması özünü daha qabarıq büruzə verir. Buna səbəb diasporun və lobbi qüvvələrinin Ermənistan qarşısında qoyduğu tələblər, o cümlədən regionda sülh prosesinə xələl gətirməsidir. Bundan itirən isə sadə erməni vətəndaşları, Ermənistanda qalan insanlardır. Digər tərəfdən, Azərbaycanın İkinci Qarabağ savaşında, diplomatik müstəvidə əldə etdiyi uğurlar, xaricdə yaşayan həmvətənlərimizin Ermənistanın aqressiv siyasətinin ifşa edilməsi ilə bağlı fəallıq nümayiş etdirmələri ultramillətçi erməni təşkilatlarına və erməni diasporuna da ciddi zərbə olub. Azərbaycanın diplomatik müstəvidə həmlələri gücləndikcə, xaricdə yaşayan həmvətənlərimiz öz tarixi Vətənlərinin haqq səsini dünyaya çatdırmaq üçün səfərbər olduqca ölkəmizə qarşı böhtan və qarayaxma kampaniyaları aparan erməni lobbi və diasporunun heç də təsəvvür edildiyi qədər qüdrətli olmadığı üzə çıxır. Son hadisələr Ermənistan cəmiyyətində erməni diasporu ilə bağlı mifi artıq xeyli sarsıdıb. Azərbaycan rəhbərliyinin müəyyənləşdirdiyi hücum strategiyasının fasiləsiz olaraq davam etdirilməsi isə bu mifi ümumiyyətlə darmadağın edəcək. Bu da Ermənistanda diaspor və lobbiyə inamı daha sürətlə məhv edəcək.
Samirə SƏFƏROVA
