Ramil Məmmədli: “Bu, Qarabağ məsələsində Azərbaycanın mövqelərini daha da möhkəmləndirəcək”
Türkmənistanın paytaxtı Aşqabadda İqtisadi Əməkdaşlıq Təşkilatının (İƏT) XV Zirvə sammiti də İrəvanı məyus edən növbəti platformaya çevrildi. Söhbət ondan gedir ki, quruma üzv ölkələr sammitin yekun Bəyannaməsində Azərbaycan hökuməti və xalqına işğal olunmuş ərazilərin azad edilməsi, ölkənin ərazi bütövlüyünün bərpası münasibətilə təbrik ünvanlayıb.
Məlumat üçün qeyd edək ki, təşkilata Azərbaycan, Türkiyə, Qazaxıstan, Türkmənistan, Qırğızıstan, Özbəkistan, Pakistan, Tacikistan, İran və Əfqanıstan üzvdür. Bu dövlətlərdən üçü (Qazaxıstan, Qırğızıstan və Tacikistan) həm də KTMT-də təmsil olunur. Bu o deməkdir ki, Ermənistan KTMT-dən də növbəti zərbəni aldı. Onu da xatırlatmaq yerinə düşür ki, həmin ölkələr artıq tarixin arxivinə verilmiş “Dağlıq Qarabağ münaqişəsi”nin həlli məsələsində bütün mərhələlərdə məhz Azərbaycanın haqlı mövqeyini dəstəkləyib. Çünki Azərbaycan haqlı tərəf olub.
Bütövlükdə, Aşqabad sammitində KTMT-nin 3 üzvünün Azərbaycana verdiyi məlum dəstəyin nə kimi əhəmiyyəti var?
- “KTMT-yə üzv dövlətlər ölkəmizin ərazi bütövlüyünü formal yox, birmənalı şəkildə dəstəkləyir”
Məsələyə münasibət bildirən hərbi ekspert Ramil Məmmədlinin sözlərinə görə, 3 KTMT üzvünün belə bir addım atması çox mühüm hadisədir. O bunu belə əsaslandırdı: “Bu bir daha onu göstərir ki, KTMT üzvləri Ermənistanın Azərbaycana yönəlik apardığlı işğalçılıq siyasətini birmənalı şəkildə qəbul etmirlər. Bu həm də onu göstərir ki, KTMT-yə üzv dövlətlər Azərbaycana xüsusi önəm verir, ölkəmizin ərazi bütövlüyünü birmənalı şəkildə dəstəkləyirlər. Bəzi dövlətlər kimi formal mövqe sərgiləmirlər. Azərbaycanı ciddi, öz sözünü demiş, qalib bir dövlət kimi qəbul edirlər. Azərbaycan əldə etdiyi qələbə ilə birmənalı şəkildə həm MDB, həm də KTMT-yə üzv ölkələri özünə tərəf çəkdi. Bu müstəvidə Ermənistan isə tamamilə təkləndi. KTMT üzvlərinin atdığı məlum addım və Aşqabadda əldə edilən növbəti uğur Azərbaycanın xarici siyasətinin ciddi uğurudur. Bu, Qarabağ məsələsində beynəlxalq arenada Azərbaycanın mövqelərini daha da möhkəmləndirəcək. Beynəlxalq müstəvidə Ermənistana olan etimad azalmaqda davam edəcək. Zatən Ermənistana elə böyük inam yox idi. Ancaq KTMT üzvlərinin məlum addımı tamamilə fərqli bir situasiya yaradacaq. O baxımdan bunu önəmli hadisə hesab edirəm”.
Hərbi ekspert onu da əlavə etdi ki, Ermənistan bütün bunlardan ciddi nəticə çıxarmalıdır.
Vidadi ORDAHALLI
