“Qarabağsız Ermənistanın gələcəyi yoxdur” ideyasından geniş siyasi imtinalar başlayır...

Məhərrəm Zülfüqarlı: “Azərbaycanın indiki mövqeyinin güclü olması onları belə qənaətə gəlməyə məcbur edir”

img

Bakının beş ermənini təhvil verməsi fonunda İrəvanın son günlər mövqeyində müşahidə olunan bəzi dəyişikliklər diqqət çəkir. Bu, müxtəlif formada özünü göstərir. Məsələn, Ermənistan Müdafiə Nazirliyi ombudsman Armen Tatoyanın sərhəddə Azərbaycanın təxribatları ilə bağlı iddiasını təkzib etdi. Digər tərəfdən, Ermənistan rəsmiləri Zəngəzur dəhlizi vasitəsilə, dəmir yolu ilə yanaşı, avtomobil yolunun da açıla biləcəyinə eyham vururlar. 

Digər bir tərəfdən, son bir neçə gündə Ermənistanın hakim partiyasının deputatlarının Qarabağa dair fikirləri diqqət çəkir. Məsələn, deputat Viqen Xaçatryan bildirir: “Ermənistanın Qarabağsız gələcəyi yoxdur fikrini irəli sürmək təhlükəlidir, əsas məqsəd Ermənistan olmalıdır, Qarabağ yox. Bu ərazilərin Ermənistan ərazisi olması ilə bağlı heç bir söhbət gedə bilməz, məsələ “bu insanların həyatı Azərbaycanın tərkibində təhlükədədirmi” şəklində qoyulmalıdır”.

Başqa bir deputat Qaqik Melkonyan isə bunları deyib: “Qarabağdakı ermənilərin təhlükəsizliyinin təminatçısı Ermənistan yox, Rusiyadır, orada nə baş verir sualının cavabı da Rusiya səfirliyindədir”.

Paşinyanın komandasından olan deputatların belə fikirləri müəyyən mənada rəsmi İrəvanın Qarabağa dair real mövqeyi də hesab oluna bilər. Ən başlıcası, bu onu göstərir ki, Ermənistan Qarabağ yükündən xilas olmaq istəyir.

Maraqlıdır, bəs ekspertlər bütün bunları necə dəyərləndirir?

  • “Ermənistandakı acınacaqlı durumu dərk etdikcə, bəzi məsələləri anlayırlar”

Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, Ermənistandan belə fikirlərin səslənməsi təsadüfi deyil: “Belə fikirlərin yaranmasının başlıca səbəbi Azərbaycanın 44 günlük Vətən müharibəsində qələbəsi və Prezident İlham Əliyevin “Dəmir yumruq” siyasəti ilə bağlıdır. Vətən müharibəsinə qədər ermənilər Qarabağsız Ermənistanı təsəvvür belə etmək istəmirdilər. Rusiya hesabına ərazilərimizi işğal etdilər. Sayları az olsa da, “Böyük Ermənistan” xülyası ilə yaşayırdılar. Vətən müharibəsinin nəticələri, ondan sonra prezidentimizin qətiyyətlə dəhlizin açılacağını bəyan etməsi artıq erməniləri ağıllandırmağa başlayıb. Qarabağdakı qələbədən sonra artıq Azərbaycan öz tarixi əraziləri barədə danışır. Hansı ki, 1918-ci ildə tarixi Azərbaycan ərazilərində Ermənistan yaradıldı. 1920-ci ildən sonra bolşevik Rusiyası 20 min kvadrat kilometr ərazini Ermənistana peşkəş etdi. Bütün bunları ermənilər yaxşı bilir. Ona görə də Ermənistanı qorumaqdan ötrü belə narahatdırlar. Bir sözlə, Azərbaycanın indiki mövqeyinin güclü olması onları belə qənaətə gəlməyə məcbur edir. Ermənistandakı acınacaqlı durumu dərk etdikcə, bəzi məsələləri anlayırlar”.

Professorun fikrincə, erməniləri qorxudan həm də odur ki, azərbaycanlılar əvvəl-axır Göyçəyə, Zəngəzura qayıdacaq.

Vidadi ORDAHALLI

Son xəbərlər