Cəbhədəki sarsıdıcı zərbələrdən özünü itirən erməni ordusu geri çəkilməyə məcbur olub. Maraqlıdır ki, bu məlumatın doğruluğunu onların özləri gülünc bir izahla təsdiq etmək məcburiyyətində qalıblar.
Dağlıq Qarabağdakı separatçı rejimin “mətbuat katibi” Vaqram Poqosyan erməni qoşunlarının geri çəkildiyini rəsmən etiraf edib. Lakin o bunu, güya taktiki səbəblə izah etməyə çalışıb və yazıb ki, daha çox itkilərin olmasının qarşısını almaq üçün bu addımı atırlar. Təbiidir ki, burada hansısa taktiki addımdan söhbət gedə bilməz. Çünki hərbdəki taktiki addımlar gizli həyata keçirilir və ictimailəşdirilmir. Qeyd edək ki, Ermənistan tərəfi indiyə qədər Azərbaycanın qazandığı hərbi uğurları təkzib etməklə məşğul idi. Ancaq hazırda bu uğurların miqyası elə genişlənib ki, onları gizlətmək qeyri-mümkündür. Görünür, çıxılmaz vəziyyətdə qalan Ermənistan ordusu həmin uğursuzluqlarını bu yalan bəhanə ilə ört-basdır edir. Fakt budur ki, Ermənistan ordusu həqiqətən geri çəkilir, amma bunu öz xoşu ilə etmir, Azərbaycan əsgəri onları qovur.
Ermənistan hərbi rəhbərliyinin təsdiqlədiyi bu məlumatın başqa hansı görünməyən tərəfləri ola bilər?
Hərbi ekspert Daşdəmir Əliyev qəzetimizə bildirdi ki, burada görünməyən tərəf yoxdur: “Nə varsa, hamısı açıq-aydın görünür. Reallıq bundan ibarətdir ki, düşmən özü xoşluqla geri çəkilmir. Onu arxaya çəkilməyə məcbur edən Azərbaycan Ordusunun irəliləməsi və zəfəridir. Son 10 gün ərzində Azərbaycan Ordusunun ciddi irəliləyişləri var. Bir sıra yaşayış məntəqələri işğaldan azad edilib. Bu barədə məlumatlar ən ali səviyyədə təsdqiqini tapıb. Erməni mənbələrini izləsəniz görərsiniz ki, onlar bu məlumatların birini də rəsmən təsdiq etməyiblər. Ancaq təkzib ediblər. İndi görürlər ki, ortaya ciddi dəlillər, videolar qoyulur, gizlətməyin mümkünsüzlüyüni anlayırlar. Xalqa bunun səbəbini izah etməyin yolunu yalan danışmaqda görürlər. Demək istəyirlər ki, güya həmin yerləri Azərbaycan əsgəri döyüşərək tutmayıb, bunlar öz xoşluqları ilə geri çəkiliblər. Bu qətiyyən belə deyil. İşğalda olan vətən torpağının hər qarışı uğrunda Azərbaycan əsgəri döyüşüb. Həmin torpağın üsüntə şəhidlərimizin qanı var. Əminliklə deyə bilərik ki, Ordumuzun uğurlu əməliyyatları davam edəcək. Artıq bu uğurları gizlətmək mümkün deyil. Erməni tərəfi nə qədər yalan danışsa da, ordumuzun zəfərini etiraf etməyə məcbur qalacaq. Ancaq bir çıxış yolları var. Daha çox itki vermək istəmirlərsə, könüllü olaraq torpaqları işğaldan azad etsinlər. Yalnız onda birdəfəlik məhvdən canlarını qurtara bilərlər. Azərbaycan şərəfli müharibə apardığı üçün məlumatları da şəffaf verir. Ermənilər şərəfsiz yola qol qoyduqları üçün öz ordularını və cəmiyyətlərini də yalanla idarə edirlər”.
Hansı səbəblə izah etsələr də, ortada olan fakt budur ki, erməni əsgəri geri qaçır. Nümayiş olunan kadrlardan da görürük ki, onlar hətta bütün silah və sursatlarını ataraq qaçırlar. Taqətdən düşən ordunun rəhbərliyi üçün şans var - bütün qoşunlarını işğal edilmiş ərazilərdən çıxarmaqla itkilərinin sayını kompensasiya edə bilər...
Məhəmmədəli QƏRİBLİ
