Cəbhə zonasında baş verənlər, yayılan məlumatlar işğalçı Ermənistanın artıq tam məğlub olmaq üzrə olduğunu göstərir. Bu vəziyyətdə düşmən indi hər cür təxribata əl atır. Məsələn, zəbt edilmiş ərazilərdən və Ermənistandan Azərbaycan yaşayış məntəqələri atəşə tutulur.
Bundan başqa, Ermənistanda son günlərdə yeni sərsəm fikirlər də səslənir. Belə ki, ermənilər Azərbaycanın ixrac neft-qaz kəmərlərini hədəfə almaq niyyətinə düşüblər. İndi Ermənistan ordusunun daha çox iqtisadi infrastrukturumuza ziyan vurmasının vacibliyi düşmən ölkədə aktual şəkildə gündəmə gətirilir. Burada xatırladaq ki, cari ilin yayında Avropaya istiqamətlənən neft, qaz, nəqliyyat xəttlərinin yaxınlığında hərbi təxribat törətməklə Ermənistan ölkəmizin iqtisadiyyatına zərbə vurmağa çalışırdı. Hazırda məsələ düşmən ölkədə yenidən aktullaşıb. Belə ki, Ermənistan hökuməti Azərbaycanın neft-qaz kəmərlərinə və hasilat platformalarına zərbə endirməklə bağlı hədə-qorxunu yeniləyib. Ermənistan parlamentinin deputatı Arman Babacanyan “Facebook” səhifəsindən belə bir paylaşım edib: “Azərbaycanda milyonlarla ABŞ dolları məbləğində Qərb layihələri, infrastruktur obyektləri, neft və qaz kəmərləri regionda təhlükəsizlik girovu olaraq bundan belə Ermənistan silahlı qüvvələrinin hədəfində olmalıdır. Çünki Bakı rəhbərliyi onlardan əldə etdiyi gəliri, vəsaitləri ordu üçün istifadə edir. Artıq bu, birinci dərəcəli məsələdir”. Beləliklə, Ermənistan parlamentinin üzvü ciddi-cəhdlə boru kəmərlərini, neft-qaz platformlarını partlatmağa çağırır. Adətən bu kimi çağırışları sırf terrorçular səsləndirir. Erməni terrorçuların isə qəddarlığı, amansızlığı hamıya məlumdur. Xarici İşlər Nazirliyi mətbuat xidmətinin rəhbəri Leyla Abdullayeva “Twitter”dəki hesabından bu xüsusda çağırışı belə şərh edib: “Bu, Ermənistanın terror taktikasının daha bir nümunəsidir”.
Eyni zamanda, bütün bunlar düşmənin çarəsizliyini də nümayiş etdirir. Burada bir daha xatırladaq ki, sentyabrın 27-si Ermənistan silahlı qüvvələri genişmiqyaslı təxribat törədərək cəbhəboyu zonada yerləşən Azərbaycan ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif çaplı artilleriya qurğularından intensiv atəşə tutub. Ermənistan silahlı qüvvələrinin döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə Azərbaycan ordusunun komandanlığı tərəfindən qoşunlarımızın bütün cəbhə boyu əks-hücum əməliyyatına başlaması barədə qərar verilib. Əməliyyatların gedişində düşmən ciddi zərbələr alıb, ərazilərimizin bir qismi işğaldan azad edilib. Rus ekspert Mixail Xodoryonok bundan sonra da ermənilərin ciddi zərbə alacağını bidirir: “Ermənistanda döyüşən ordunun mövcud problemlərini həll etməyə qadir olan tammənalı müdafiə sənayesi kompleksi yoxdur. Yeri gəlmişkən, uzunmüddətli müharibə yüz minlərlə və hətta milyonlarla ton müxtəlif maddi-texniki vasitələrin xərclənməsini tələb edəcək. Bu baxımdan Azərbaycan həm daxili istehsala, həm də Türkiyənin köməyinə etibar edə bilər. Ermənistanın harada və nə dərəcədə oxşar yardımı ala biləcəyi açıq sualdır. İndiyə qədər, qarşıdurmanın başlanmasından etibarən bütün üstünlüklər Azərbaycanın tərəfindədir: düşmənə qarşı dərhal hər cür kömək etməyə hazır olan bacarıqlı müttəfiqlər, silahlı qüvvələrin kəmiyyət və keyfiyyət üstünlüyü, dünya birliyinin mövqeyi (əslində, Bakı işğal olunmuş ərazilərini geri qaytarmaq və ölkənin ərazi bütövlüyünü bərpa etmək arzusunu bəyan edir). Ermənistandakı vəziyyət indiki mərhələdə daha mürəkkəbdir. KTMT-nin köməyinə arxalanmağa dəyməz, ortaya çıxan problemlərin sülh yolu ilə həlli üçün edilən müraciətlərdən və “hərbi həll məsələsinin həlli yoxdur” ifadələrindən başqa, Moskvanın mövqeyi hələ açıq şəkildə bildirilməyib”. Bu halda erməni tərəfinin daha böyük zərbələr alması qaçılmaz sayılır. Bəzi ölkələrin, məsələn, Fransanın isə Azərbaycanı dayandırması mümkünsüz sayılır. Azərbaycana atəşkəs çağırışı edənlər ötən 30 ildə ermənilərin və Ermənistanın işğal etdikləri torpaqlardan çıxması istiqamətində bir addım belə atmayıblar. Mövcud olduğu 28 ildə isə ATƏT-in Minsk Qrupu işğal faktına seyrçi qalıb. Azərbaycanın haqlı tələbləri qarşılığında beynəlxalq vasitəçilər müxtəlif diplomatik terminlərlə vaxtı uzadıblar. Belə vəziyyət isə daha çox ermənilərin, Ermənistanın və separatçıların xeyrinə olub. Ermənistanın baş naziri Nikol Paşinyan da özündən əvvəlkilər kimi Qarabağdakı erməni icmasından siyasi oyunlar üçün istifadə etməyə başladı. Özünü Qarabağ münaqişəsinin həllində "novatorçu" göstərmək üçün separatçıların tərəf kimi qəbul olunmasını təklif etdi. Bu və başqa belə təklifləri ilə rəsmi İrəvan danışıqların gedişini pozmağa çalışırdı. Nəticədə prosesə ordumuz müdaxilə etməli oldu. İndi ermənilər ordumuzu dayandırmaq üçün cəhdlər edir, terrora əl atmağa şalışır. Lakin düşmənin məğlubiyyəti qaçılmaz sayılır.
Nahid SALAYEV
