Beynəlxalq hüququn norma və prinsiplərini kobud şəkildə pozaraq dinc əhaliyə hərbi zərbələr endirməklə Ermənistan həm də terror əməllərindən əl çəkə bilmədiyini nümayiş etdirir. Mövcud reallıq budur ki, Ermənistanın insanların kütləvi şəkildə yaşadığı ərazilərə qadağan olunmuş bombalar atması bu ölkənin terrorçu dövlət olduğunu bir daha göstərir.
Əslində, cəbhə zonasında son proseslərə beynəlxalq münasibət də qeyd edilənlərin real təsdiqi qismində çıxış etməyə bağlayıb. Bu zaman diqqət yetirilən əsas məqamlardan biri odur ki, Ermənistan fəal şəkildə terrorçuları da bölgəyə daşıyır. ABŞ-ın “The Heritage” Fondunun Beynəlxalq Tədqiqatlar Mərkəzinin direktoru Lyuk Koffi bu xüsusda bildirir ki, artıq PKK terror təşkilatının 100-ə yaxın üzvü Dağlıq Qarabağda Ermənistan tərəfdən döyüşür: “Dağlıq Qarabağda müharibədə əcnəbi döyüşçülərlə bağlı bir çox ittihamlar və xəbərlər var. Bir az bundan əvvəl çox sanballı bir mənbədən 100-ə yaxın PKK döyüşçüsünün Xankəndidə müharibədə olduğu xəbərini aldım. Əcnəbi döyüşçülərin səhnədə olması pis xəbərdir”. Fransa Beynəlxalq Radiosunun məlumatında da qeyd olunur ki, Ermənistanla terrorçuların işbirliyi genişlənir: “Dağlıq Qarabağda Livandan, Suriyadan, Cənubi Amerikadan gələn “könüllülər” vuruşur. Livan, Suriya və ya Latın Amerikasından gələn otuz nəfər döyüşlərin yenidən başladığı andan etibarən Ermənistanın ordu sıralarında Azərbaycana qarşı vuruşur”. Türkiyə mənbələri də bu xüsusda xeyli faktlar ortaya qoyub. Türkiyə Müdafiə Nazirliyindən Ermənistana ünvanlanan xəbərdarlıqda da qeyd edilir ki, Ermənistan dərhal hücumlarını dayandırmalı, xaricdən gətirdiyi muzdlu hərbçiləri, terrorçuları geri göndərməlidir: “Uşaq, qadın, yaşlı demədən Xocalı qətliamını törədən Ermənistan 30 il öncə necə idisə, bu gün də elədir. Ermənistan regionda sülh və sabitliyin bərqərar olunmasına əngəldir”.
Bu arada maraqlı məqamlardan biri də odur ki, Ermənistanın terrorçularla işbirliyini ifşa edən xarici media orqanları özləri də erməni terrorunun hədəfinə çevrilir. Fransanın “La Liberation” qəzetinin jurnalistlərinin beynəlxalq erməni terror təşkilatı olan ASALA və onun üzvləri tərəfindən hədələnməsi də bunun təsdiqidir. Onlar “La Liberation” qəzetinin jurnalistlərinə ölüm hədələri göndərib. Bu hədələrdə qeyd edilir: “Ermənılər başınızla futbol oynayacaq!”, “Yazınız sizə çox baha başa gələcək!”, “Adları yadda saxlayaq, pıerre plottu... müharibə dövrünün hökmü ölüm hökmüdür!”. “La liberation” qəzetinin jurnalisti ASALA-nın, eləcə də erməni lobbisinin üzvləri tərəfindən ona göndərilən ölüm hədələrini “Twitter” hesabında paylaşıb. Qəzetin saytında Dağlıq Qarabağda gedən döyüşlərlə bağlı obyektiv məqalə çoxlarını, xüsusən ASALA-nı və erməni diasporunu qəzəbləndirib. Ölüm hədələri alan jurnalistlər məqaləni saytdan çıxarmağa məcbur olublar. Maraqlısı odur ki, başqa ölkələrdə insan hüquqları axtarışında olan Fransanın öz daxilində ASALA-nın, eləcə də daim himayə elədiyi erməni lobbisinin töt-töküntüləri “at oynadır”. Parisin davranışı, ən azı bu baxımdan, jurnalistlərinə qarşı ölüm hədələrinə adekvat deyil. Yəni bu xüsusda hansısa ciddi addım atılmır. İsrailli hüquqşünas, beynəlxalq hüquq və beynəlxalq siyasət üzrə mütəxəssis Mixail Finkel bunları təhlükəli hal sayır. Ekspert qeyd edib ki, ermənilər müharibə ilə heç bir əlaqəsi olmayan və müharibə zonasından xeyli uzaqda Gəncə kimi şəhəri atəşə tutublar: “Bu, İkinci Dünya müharibəsindən sonra hazırlanan konvensiyalarla ziddiyyət təşkil edir. Ermənistan isə belə zərbələrin endirilməsinə yol verilmədiyi bu konvensiyaları imzalayıb. Keçmişdə baş vermiş hadisələrə, o cümlədən yayda Ermənistanın Azərbaycanın mülki əhalisini atəşə tutmasına baxsaq, indiki halda səhv ehtimalının az olduğu, bunun qəsdən edildiyi qənaətinə gələcəyik. Heç bir şəkildə hərbçi olmayan dinc sakinlərə endirilən zərbələr hər cür qınağa layiqdir və XXI əsrdə sivil hərbi əməliyyatların aparılmasının heç bir çərçivəsinə sığmır. Burada artıq terror əməlləri görünür. Bu, münaqişənin daha çətin mərhələyə keçdiyini göstərən acınacaqlı faktdır və qarşı tərəfin ağıl və məntiqlə idarə olunmadığını göstərir. Qarşı tərəfin atdığı addımları düşünmədiyini göstərir, çünki bu, bumeranq təhlükəlidir. Bunu qınayıram və bilirəm ki, Azərbaycan ordusu heç vaxt belə şeylərə əl atmır və mülki əhalisini, o cümlədən Qarabağın mülki əhalisini qoruyur”.
Beləliklə, Ermənistanın bütün antihumanist addımlarına rəğmən, Azərbaycan xalqı böyük cəsarət nümayiş etdirir. Hazırda cəbhəboyu ərazilərdə yaşayan sakinlərin heç biri evini tərk etməyib, əksinə, orduya mənəvi dəstək verir. Azərbaycan ordusu isə müharibədə qəbuledilməz qanunları, o cümlədən mülki əhalinin hədəfə alınması kimi mühüm qadağaları pozmadan işğal olunmuş torpaqların azad edilməsi istiqamətində inamla irəliləyir.
Samirə SƏFƏROVA
