Azərbaycan Ordusunun əks-hücumları qarşısında acız duruma düşən Paşinyan əsgərləri, separatçı hərbi birləşmələr Azərbaycanın cəbhədən uzaq şəhər və kəndlərini raket və top mərmilərindən atəşə tutmaqda davam edirlər. Bununla da Ermənistan Azərbaycan Ordusu ilə deyil, Azərbaycanın dinc sakinləri, vətəndaşları ilə müharibə etdiyini, hədəflərinin mülki şəxslər olduğunu ortaya qoyur.
Bildiyimiz kimi, Gəncə şəhəri Ermənistan ərazisindən raket və top mərmilərindən atəşə tutulub. Erməni təxribatı nəticəsində 1 mülki şəxs həlak olub, 32 nəfər yaralanıb. Yayılan rəsmi məlumata görə, Ermənistanın atdığı raket və top mərmisindən xəsarət alanlardan biri Gəncədə yaşayan erməni əsilli, 1943-cü il təvəllüdlü Qriqoryan Karine Roman qızıdır. K.Qriqoryan xəstəxanaya yerləşdirilib və həkimlərimiz ona hər cür yardım ediblər.
Qriqoryandan başqa, yaralananlar içərisində qeyri-azərbaycanlı Qriqovna Mina Roman qızı da var. Gəncə sakinlərinin dediyinə görə, bu qadın da milliyyətcə ermənidir, amma erməni olduğunu həmişə gizlədib.
Bütün dünyanın gözü qarşısında respublikamızın müxtəlif şəhərlərinin, kəndlərinin atəşə tutulması barədə Ermənistan hərbi-siyasi rəhbərliyi əmr verir və dinc sakinlərimizin evləri dağıdılır, onlar həlak olur və ağır yaralanırlar. Erməni terroru nəticəsində ciddi xəsarət alan uşaqlarımız da var. Azərbaycan Ordusu ilə heç cür bacara bilməyən erməni terrorçularının mülki əhalimizi hədəfə alması faktına hələ dünya birliyi reaksiya verməyib.
Gəncədə yaralanan erməni qadının timsalında gördüyümüz kimi, Azərbaycanda ermənilər də rahat şəkildə yaşayır və onlar da dövlətin tam himayəsi altındadırlar. Azərbaycandakı ermənilər də Ermənistan tərəfindən atəşə tutulur.
Qeyd edək ki, rəsmi məlumatlara görə, Azərbaycanda 30 min erməni yaşayır, onlar Ermənistana köçməkdən imtina edərək ölkəmizdə yaşamağa üstünlük veriblər.
AMEA-nın A.Bakıxanov adına Tarix İnstitutunun aparıcı elmi işçisi, tarix elmləri doktoru Vaqif Abışov bildirdi ki, Ermənistanın siyasi-hərbi rəhbərliyinin həyata keçirdiyi separatçılıq, terror və təxribat hadisələri erməni xalqının özü üçün də böyük təhlükədir. “Birinci dəfə deyil ki, Ermənistan tərəfi Azərbaycanın mülki əhalisini hədəfə alır. Bilirsiniz ki, Gəncədən əvvəl də digər yaşayış məntəqələrimiz, onların da bir neçəsi cəbhə xəttindən tamamilə uzaqda yerləşir, dinc əhalimiz ermənilər tərəfindən müxtəlif çaplı silahlardan atəşə tutulub, erməni terroru nəticəsində ölən və yaralananlar var. Bundan əvvəl ermənilərin Tərtəri atəşə tutması nəticəsində bu rayonda yaşayan ruslara da ziyan dəyib, bir rus evi də dağılıb. Azərbaycan çoxmillətli bir dövlətdir, burada müxtəlif xalqların nümayəndələri yaşayır və hər bir xalqın nümayəndəsi də Azərbaycan dövlətinin himayəsindədir, onların konstitusion hüquqları tam şəkildə qorunur. Ermənistanın əsas hədəfi Azərbaycanın mülkü əhalisidir, dinc camaatdır. Amma cənab Prezident həmişə vurğulayır ki, bizim dinc erməni əhalisi ilə işimiz yoxdur, biz onlara güllə atmırıq, dinc əhali döyüş bölgələrindən çəkilsin. Yəni Azərbaycan əsgəri dinc əhaliyə güllə atmır, biz dinc əhali ilə düşmənçilik etmirik. Lakin Ermənistan dinc əhaliyə qarşı həmişə terror aktları törədib və onların nümunələri də göz qabağındadır. Azərbaycan tərəfi yalnız hərbi obyektləri vurmaqla dinc əhalinin həyatını itirməsinin qarşısını alır. Ermənilər nəinki müharibənin getdiyi ərazilərdə, hətta ondan uzaqda yerləşən Gəncəyə, Beyləqana, Mingəçevirə, Xızıya, Abşerona və digər şəhərlərimizə raket atır, başqa iriçaplı silahlardan istifadə edərək din əhalimizin həyatına qəsd edirlər”.
Gəncədə yaralananlar arasında erməni millətinin nümayəndəsinin olması faktına gəlincə, V.Abışov qeyd etdi ki, erməni terroru bütün bəşəriyyətə, insanlara qarşı yönəlib. V.Abışov hesab edir ki, ermənilərin atdığı top mərmisi nəticəsində ağır yaralanan həmin ermənilər Azərbaycanda rahat yaşayırlar, lakin onların həyatına erməni terrorçuları qəsd edirlər. “Bilirik ki, istər Azərbaycan mətbuatında, istərsə rəsmi dövlət səviyyəsində, istərsə də beynəlxalq qurumların hesabatlarında Azərbaycanda 30 min nəfər erməni yaşadığı vurğulanıb. Azərbaycanın müxtəlif yerlərində yaşayan ermənilərə isə indiyə qədər “gözün üstə qaşın var” deyən olmayıb, onlar burada dinc, sakit şəkildə yaşayır, hətta onlar arasında müxtəlif vəzifələrdə çalışanlar, ayrı-ayrı təşkilatlarda təmsil olunanlar da az deyil. Azərbaycan tərəfindən ölkəmizdə yaşayan ermənilər diskriminasiya olunmayıb, onların konstitusion hüquqları tapdanmayıb, burada sülh və əmin-amanlıq şəraitində yaşayırlar, bu insanlar da dövlətin himayəsindədirlər. Ermənistan isə hakimiyyətində terrorçuların təmsil olunduğu bir dövlət kimi terrorla məşğul olur və milliyyətindən asılı olmayaraq, Azərbaycanın bütün mülki şəxslərini hədəfə alıb. Azərbaycanda yaşayan ermənilərə biz heç bir pislik etmirik, amma onlar Ermənistanın təxribatı, dinc əhalimizə hücumu nəticəsində ağır yaralanırlar. Bu da onu göstərir ki, Ermənistan terrorunun hədəfi insanlıqdır. Erməni millətindən olan şəxslərin Ermənistanın terrorundan, təxrbatından, hücumundan zərər çəkməsi bir daha onu sübut edir ki, bu dövlət terrorçudur, qaniçəndir, faşistdir, Azərbaycan vətəndaşlarına qarşı düşmənçilik edir, bu mənfur mövqeyini açıq şəkildə göstərir.
Fikrimcə, Gəncənin Ermənistan tərəfindən raket və toplardan atəşə tutulması nəticəsində ağır yaralanan ermənilərin məsələsinə beynəlxalq ictimaiyyət reaksiya verməlidir. Məncə, beynəlxalq təşkilatlar insanlıqdan kənar olan erməni təxribatına münasibətini bildirəcək və bunu pisləyəcəklər. Dünya bilməlidir ki, Ermənistan nəinki Azərbaycanda yaşayan türklərə, eləcə də başqa xalqlara, o cümlədən də ermənilərin özünə qarşı da terror edir, onların sağlamlığına ağır zərbə vurur. Hətta Ermənistan hökuməti Dağlıq Qarabağda olan ermənilərin müdafiəsini təşkil etməkdən belə imtina edir. Bu baxımdan, bu məsələ tamamilə pislənməli və beynəlxalq aləmdə bir daha Ermənistanın iç üzü açılıb ifşa edilməlidir” - deyə V.Abışov vurğuladı.
İradə SARIYEVA
