Azərbaycan Prezidenti, Silahlı Qüvvələrin Ali Baş Komandanı İlham Əliyev xalqa son müraciətində Paşinyanın dünya liderlərinə necə yalvardığından da danışıb:
“Paşinyan hər gün bir dünya liderinə zəng edir. Hər gün! Mən heç kimə zəng etməmişəm, heç bir liderə zəng etməmişəm. Təmaslarım olub, mənə zəng ediblər. Amma o, adam qalmayıb ki, zəng etməsin, yalvarmasın, emissar göndərməsin, ağlamasın, onların ayağına yıxılmasın. Bax budur bunun sonu. Əgər bizimlə normal dildə danışsaydı, bizim müqəddəs şəhərimizi murdarlamasaydı, əlbəttə, biz ümidlərlə yaşayıb çalışardıq ki, bu məsələ danışıqlar yolu ilə həll olunsun. Amma hər addım təxribat, hər addım təhqir və hesab edir ki, biz bununla barışacağıq?!
İndi biz göstərdik kim-kimdir. İti qovan kimi qovuruq onları! Azərbaycan əsgəri onları iti qovan kimi qovur! İşğal edilmiş torpaqlarda Azərbaycan bayrağı qaldırılır! Onların səngərlərində Azərbaycan əsgəri dayanır! Onların postları bizim əlimizdədir! Onların tanklarını biz sürürük! Onların digər silahlı texnikaları bizim əlimizdədir, yük maşınları bizim əlimizdədir! Biz xilaskar missiyamızı icra edirik və edəcəyik! Ermənistan rəhbərliyi yaxşı düşünsün, hələ ki, gec deyil. Bizə yeddi şərt irəli sürür. Sən kimsən ki, bizə şərt qoyasan?! İndi baxım görüm nə şərt qoyursan bizə! Yıxılıb diz çöküb yalvarırsan ki, atəşkəs bərpa olunsun. Atəşkəs Ermənistanın baş nazirinin xahişi ilə 2 il ərzində bərpa olunmuşdu. Məndən xahiş etmişdi ki, daxildə vəziyyət ağırdır, oradan-buradan məni sıxırlar, mənə vaxt verin, mən bu məsələni həll edəcəyəm, mən yeni fikirlərlə gəlmişəm. Mən keçmişdə nə olub, hamısının üstündən xətt çəkmişəm, imkan verin, vaxt verin. Dedim yaxşı. Nə oldu? Bir ildən sonra çıxış edib deyir ki, “Qarabağ Ermənistandır”.
Göründüyü kimi, İlham Əliyev, Paşinyandan fərqli olaraq, heç bir dünya liderinə zəng etmədiyini deyir, ancaq ona zənglərin olduğunu bildirdi. Bu həm də Azərbaycanın qüdrətinin nümayişi sayıla bilər. Azərbaycanın hazırda belə üstün mövqedə olmasını şərtləndirən amillərdən biri də Ordumuzun qazandığı son zəfərlər ola bilərmi?
Milli Qeyri Hökumət Forumunun Prezidenti Rauf Zeyni “Bakı-Xəbər”ə açıqlamasında bildirdi ki, Azərbaycanla Ermənistanın mövqeyini hazırda bir tərəziyə qoymaq olmaz: “Ölkə başçılarımızın şəxsi nüfuzu arasındakı fərq isə ölçüyəgəlməzdir. Azərbaycan Prezidentinin uzun illər ərzində milli, bəşəri və mütərəqqi dəyərlərə söykənərək apardığı siyasətin bəhrəsini biz görürük. Hər hansı ölkələrin liderlərini müqayisə edəndə, əlbəttə ki, onların əhali arasındakı nüfuzunu, bəşəriyyət üçün gördüyü işləri tərəziyə qoyurlar. Bu baxımdan götürəndə, ölkə Prezidentinin çəkisi çox ağırdır. O, dəfələrlə beynəlxalq dairələrə müraciət etdi ki, Ermənistanın azğınlığının qarşısını alsınlar. Hətta BMT-nin tribunasından belə bunu dedi. Bildirdi ki, problem danışıqlar yolu ilə həll olunmasa, biz bunu hərbi yolla həll edəcəyik. Təəssüf ki, bizə ikinci yolu məsələhət gördülər. İndi biz həmin yolla gedirik. Biz əmin idik ki, hərbi yolla torpaqlarımızı işğaldan azad edə bilərik. Bu da nəticə, artıq lovğalıq edən Ermənistan rəhbəri diz çöküb yalvarır. Xalqdan, ordudan alınan qüdrət İlham Əliyevin nüfuzunu daha da artırıb. Ölkə Prezidentinin bu gün kiməsə zəng etməyə ehtiyacı yoxdur. Ona zəng edib xahiş edirlər ki, hərbi əməliyyatları dayandırsın. Dəfələrlə demişik ki, ədalətsiz Makronlardan nəsə gözləməyə dəyməz. Onun İlham Əliyevə zəng etməsinin məqsədi aydındır. Belə zənglərin heç bir əhəmiyyəti yoxdur. Çünki Azərbaycan Prezidenti atəşkəsin də mükünlüyünü dedi, ancaq şərtləri də açıqladı. Buyursunlar, həmin şərtləri Paşinyanla müzakirə edib, bizə çavab versinlər. Biz əks-hücumlar zamanı əldə olunan nəticələrlə bağlı ölkə başçısına öz minnətdarlığımızı bildiririk. İnanırıq ki, Ordumuzun köməyilə biz bütün Qarabağı işğaldan azad edəcəyik. Hazırda ölkə başçısı xalqın iradəsini tam olaraq ifadə edir. 30 ildir tələb etdiyimiz məsələni hazırda İlham Əliyev lazımi şəkildə həyata keçirir”.
Əminik ki, bundan sonra da Prezidentimizə ediləcək zənglər yalnız xahiş tonunda olacaq və biz sonda qalib gələcəyik.
Məhəmmədəli QƏRİBLİ
