Cəbhədə məğlub olduğunu görən Ermənistan indi də vəziyyətdən çıxış yolunu Azərbaycanın cəbhədən çox-çox uzaqda olan şəhərlərindəki mülki əhali və infrastrukturları raket atəşinə tutmaqda görür. Son iki gün ərzində onlar tərəfindən Azərbaycanın ikinci ən böyük şəhəri olan Gəncə bir neçə dəfə raket atəşinə tutulub. Bu barədə məlumatı Prezidentin köməkçisi Hikmət Hacıyev verib. Onun sözlərinə görə, Azərbaycan mülki şəxsləri müdafiə etmək və Ermənistanı sülhə məcbur etmək üçün legitim hərbi hədəflərə qarşı adekvat tədbirlər görmək hüququnu saxlayır.
O qeyd edib ki, Ermənistanın Gəncə şəhərinə və əhalinin sıx məskunlaşdığı ərazilərə raket zərbələrinin nəticələri Azərbaycanı mülki şəxsləri müdafiə etmək və Ermənistanı sülhə məcbur etmək üçün legitim hərbi hədəflərə qarşı adekvat tədbirlər görməyə məcbur edir. Bunun ardınca Ermənistan Bakıya daha yaxın əraziləri hədəf seçib. Onlar tərəfindən Xızı və Abşeron bölgəsinə iki 300 km məsafəli orta mənzilli raket atılıb. Bu barədə məlumatı da Prezidentin köməkçisi Hikmət Hacıyev təsdiqləyib.
Elə həmin gün düşmən hədəf kimi Mingəçevir şəhərindəki strateji obyektləri seçib.
Baş Prokurorluğun Mətbuat Xidmətinin yaydığı məlumatda bildirilir ki, partlamayan raketlərdən 1-i Azərbaycan İstilik Elektrik Stansiyası MMC-nin qarşısına, digəri isə dinc sakinlərin yaşadığı evin yaxınlığına düşüb: “3-cü raketin fərdi yaşayış evinə atılması nəticəsində 5 nəfər müxtəlif dərəcəli bədən xəsarətləri alaraq xəstəxanaya yerləşdirilib, eyni zamanda evə külli miqdarda ziyan dəyib.
Hadisə yerində olan prokurorluq əməkdaşları tərəfindən zərərçəkmiş şəxslərin və zərər dəymiş mülki infrastruktur obyektlərin siyahısının dəqiqləşdirilməsi ilə bağlı istintaq-əməliyyat tədbirləri həyata keçirilir”.
Ermənilərin cəbhə ilə heç bir çoğrafi əlaqəsi olmayan şəhərlərimizi raket atəşinə tutmaqda hansı hədəfləri ola bilər?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, bu atəşlərin Ermənistan ərazisindən həyata keçirilməsi faktı tam təsbit olunub: “Ermənistanın orta mənzilli raketlər vasitəsilə ərazimizdəki böyük şəhərləri və mülki obyektləri atəşə tutması həmin ölkənin növbəti vandalizmidir. Bu hərəkətlər müharibə qanunlarına tamamilə ziddir. Ermənistan cəbhədə ciddi şəkildə məğlub olur. Bunun da nəticəsini onlar yaxşı bilirlər. Həmin ölkənin Qarabağdakı əsas hərbi birləşmələri, demək olar ki, darmadağın olunub. Nizami bölmələr, peşəkar hərbi birləşmələr yox dərəcəsindədir. Bütün qüvvələri Xankəndi, Ağdərə, Şuşa istiqamətinə toplaşır. Ermənistan ön xətdəki hərbi uğursuzluqlarının əvəzini şəhərlərimizdəki dinc sakinlərə zərbə endirməklə çıxmaq istəyir. Məsələnin hərbi-siyasi aspekti də var. Ermənistan öz müttəfiqlərindən hər hansı dəstəyi görmədiyinə görə bu addımı atır. Düşünür ki, raket zərbələrindən sonra Azərbaycan adekvat addım atacaq və Ermənistan ərazisində hərbi əməliyyatlar həyata keçirəcək. Bununla da onlar KTMT-yə yardım üçün müraciət edib, bunu da Azərbaycanın həmin ölkəyə hücumu kimi dəyərləndirəcəklər. Bu yolla dəstək qazanmaq istəyirlər. Bu gün Azərbaycan rəsmən elan etdi ki, Cermuk, Qafan istiqamətlərindən atəş açılıb. Həmin görüntülər Müdafiə Nazirliyi tərəfindən ictimaiyyətə təqdim edilib, beynəlxalq təşkilatlara da təqdim edilib. Azərbaycanın bu məsələ ilə bağlı atacağı addımlar bəllidir. Qarabağda hərbi əməliyyatların daha da sürətlənməsi və terrorçuların darmadağın edilməsi prosesinə olduqca az vaxt qalıb. Hesab edirəm ki, bununla bağlı azğınlaşan Ermənistan raket zərbələrinin sayını artıra da bilər. Bu baxımdan da, Ermənistan ordusunun həmin atəş nöqtələri ordumuz tərəfindən məhv edilməlidir”.
Əminliklə deyə bilərik ki, hazırda Ermənistanın etdiyi heç bir təxribat cavabsız qalmır. İstənilən addımlarına görə ordumuz tərəfindən adekvat cavablarını alırlar.
Məhəmmədəli QƏRİBLİ
