Məlum olduğu kimi, Prezident İlham Əliyev “Əl-Ərəbiyyə” televiziya kanalına müsahibə verib. Sözügedən müsahibədə ölkə başçısı tutarlı arqumentlərlə Ermənistanın işğalçılıq siyasətini, başda Baş nazir Paşinyan olmaqla ölkə rəhbərliyinin Qarabağ danışıqlarında sərgilədiyi qeyri-konstruktiv siyasəti ifşa edib.
Bununla belə, “Əl-Ərəbiyyə” müxbiri ya qərəzli yanaşmasından, ya da Ermənistan barədə məlumatsızlığından irəli gələrək sualların birində Paşinyanı demokrat kimi təqdim etməyə çalışıb: “Prezident Əliyev, tərcümə olduğuna görə müdaxilə edə bilmirdim, lakin cavabınızla bağlı şərh vermək istədiyim üç məsələ var. Birincisi, Siz Ermənistanın böhran vəziyyətində olduğunu dediniz. Lakin biz erməni xalqının öz rəhbərliyini dəstəklədiyini görürük və onlar ölkə rəhbərliyinin onları necə müdafiə etməsini alqışlayırlar. İkincisi odur ki, Ermənistanın “Qarabağ Ermənistan deyil” deməsi ərazilərdən çıxması üçün yeganə şərtdir, yoxsa danışıqlar masasına qayıtmaq üçün başqa şərtlər və ya ilkin şərtlər var? Üçüncüsü, vasitəçilərin haqqında danışdığı və ya çaşqınlıq yaşadığı ölkələr hansılardır?”.
Göründüyü kimi, sözügedən jurnalist bununla belə təəssürat yaratmağa çalışıb ki, guya Ermənistanda böhran yoxdur və xalq Paşinyanı dəstəkləyir. Hansı ki, xalqın Paşinyanı dəstəkləməsindən söhbət belə gedə bilməz. Ən azından, ölkədə bütün sahələrdə mövcud olan acınacaqlı vəziyyət ortadadır. Eyni zamanda, Paşinyanın həqiqi demokrat olmasından da danışmaq gülüncdür.
“Bütün vasitələrlə indiki Ermənistanda Paşinyanın üzləşdiyi iflas durumunu başqa formada təqdim etmək istəyirlər”
Məsələyə münasibət bildirən media eksperti, Demokratik Jurnalistlər Liqasının rəhbəri Yadigar Məmmədlinin sözlərinə görə, jurnalistin məlum yanaşması onun tərəf tutmasından və qərəzli olmasından irəli gəlir: “Bunu başqa cür dəyərləndirmək mümkün deyil. Əslində, jurnalist tərəfsiz sual verməlidir. Ancaq “Əl-Ərəbiyyə” televiziya kanalını təmsil edən jurnalist məlum müsahibədə bir sıra hallarda özünü tərəf kimi göstərdi. Bu azmış kimi, səsləndirdiyi fikirləri dönə-dönə qabartdı. Onun yenidən bu mövzuya qayıtması onu göstərir ki, bütün bunlar təsadüfi deyil. Həmin jurnalistin Paşinyana münasibətdə sərgilədiyi mövqe qətiyyən o demək deyil ki, o, Ermənistanda baş verən hadisələrdən məlumatsızdır. Qətiyyən bu belə deyil. Sadəcə, onların özlərinin maraqları var. Maraqları ondan ibarətdir ki, onlar bütün vasitələrlə indiki Ermənistanda Paşinyanın üzləşdiyi iflas durumunu başqa formada təqdim etmək istəyirlər. Belə bir rəy yaratmaq istədi ki, guya erməni xalqı Paşinyanın arxasındadır, ona inanır. Təbii ki, bütün bunların hamısı reallıqdan uzaq fikirlərdir. Ən azından, ona görə ki, erməni mediasına baxarkən biz bunun tamam əksini görürük. Xalq necə Paşinyandan razı ola bilər ki, Ermənistan əksər iqtisadi və sosial göstəriciyə görə geriləyir? Üstəlik, Paşinyanın provakasiyası üzündən Qarabağ cəbhəsində döyüş əməliyyatlarının yenidən bərpa olunması ölkədə sosial narazılığı bir qədər də artırıb. Bütün bunlara görə konkret olaraq Paşinyanı günahlandırırlar. Ona görə də sözügedən jurnalist məlum yanaşması və sualı ilə tərəf tutdu. Özü də qərəzli formada. Bu isə beynəlxalq jurnalistikada qəbul olunmur”.
Media eksperti onu da qeyd etdi ki, jurnalistin hər hansı bir məsələ ilə bağlı müsahibədə özünün konkret fikri olmamalıdır. Hətta olsa belə, bunu öz yazısında verməməlidir.
Vidadi ORDAHALLI
