“Artıq Livandan, başqa yerlərdən erməniləri gətirirlər, köçürürlər bizim qədim şəhərimizə, Şuşada yerləşdirirlər, televiziyada göstərirlər, beynəlxalq konvensiyaları pozurlar, Cenevrə Konvensiyasını tapdalayırlar. Bunlara söz deyən var?!”.
Bu fikirləri Prezident, Silahlı Qüvvələrin Ali Baş Komandanı İlham Əliyev xalqa müraciətində bildirib. Dövlət başçısınn sözlərinə görə, Minsk Qrupunun həmsədr ölkələrinə, həmsədr olan səfirlərə, digər beynəlxalq təşkilatlara, Avropa İttifaqının nümayəndələrinə dəfələrlə deyib ki, Ermənistana təsir edin: “Sanksiyalar tətbiq edin, təzyiq edin. Belə olmaz. Əgər güclü təsir olmasa, Ermənistan daha da azğınlaşacaq, daha da quduracaq, yeni iddialar ortaya atacaq. Eşitmədilər məni. Mən istəyirdim bu məsələ sülh yolu ilə həll olunsun. Eşitmədilər. Hesab edirdilər ki, Azərbaycan xalqı və mən – Azərbaycan Prezidenti bu vəziyyətlə barışacağam?! Cəbrayıla Ermənistandan yeni yolun çəkilməsi nə deməkdir?! O deməkdir ki, orada qanunsuz məskunlaşma aparılacaq. Artıq Livandan, başqa yerlərdən erməniləri gətirirlər, köçürürlər bizim qədim şəhərimizə, Şuşada yerləşdirirlər, televiziyada göstərirlər, beynəlxalq konvensiyaları pozurlar, Cenevrə Konvensiyasını tapdalayırlar. Bunlara söz deyən var?! Tapşırıq vermişəm bütün bizim xarici diplomatik orqanlara – məsələ qaldırın, BMT-də, ATƏT-də, Avropa İttifaqında, başqa təşkilatlarda, deyin ki, bu, qanunsuzdur! Qanunsuz məskunlaşma cinayətdir! Buna reaksiya oldu?! Minsk Qrupu bir açıqlama verdimi?! Vermədi! Avropa İttifaqı verdimi?! Vermədi! Dedi ki, bu, bizi maraqlandırmır. Maraqlandırmırsa, indi də maraqlandırmasın. İndi nə əl-ayağa düşmüşünüz? İndi nə hoqqalardan çıxırsınız?”.
Həqiqətən də sözügedən beynəlxalq qurumlar Qarabağda aparılan qanunsuz məskunlaşma siyasətinə heç bir reaksia vermədilər, bütün bu qanunsuzluqları görməzdən gəldilər. Belə olan halda, istər-istəməz, sual yaranır ki, niyə indi belə narahatdırlar?
“Sözügedən təşkilatların indi belə narahat olmalarının heç bir əsası yoxdur”
Məsələyə münasibət bildirən Böyük Azərbaycan Partiyasının sədri Elşad Musayevin sözlərinə görə, sözügedən təşkilatların indi belə narahat olmalarının heç bir əsası yoxdur: “Nəinki əsası yoxdur, buna onların mənəvi haqqı yoxdur. Vaxtında gərək Ermənistanın apardığı qanunsuz məskunlaşma siyasətinə reaksiya verəydilər. Bunu etmədilər. O üzdən, Prezidentin səsləndirdiyi arqumentlər tamamilə reallığı əks etdirir. Beynəlxalq təşkilatlar Ermənistanın Azərbaycan ərazilərini işğal etməsinə ikili standartlardan yanaşıblar. Ermənistanın törətdiyi cinayətlərə, etdiyi haqsızlıqlara reaksiya verməyiblər. Bir sözlə, bu, onlar üçün maraqlı olmayıb. Buna bir neçə aspektdən yanaşmaq olar. Burada xristian təəssübkeşliyinin və digr amillərin rolu olub. Fakt odur ki, Ermənistan Cenevrə konvensiyalarını pozur, amma buna nə ATƏT, nə Avropa İttifaqı, nə də digər qurumlar etiraz edir. Ermənistan Qarabağda qanunsuz məskunlaşma siyasəti aparır, terrorçuları öz ərazisində yerləşdirir. Livandan, Suriyadan ermənilərin Qarabağa köçürülməsini açıq-aşkar bütün dünyaya nümayiş etdirdilər. Eyni zamanda, müxtəlif terrorçuları Qarabağa yerləşdirirlər. Ancaq bəzi Rusiya və digər ölkələrin telekanallarında belə bir saxta görüntü yaradırlar ki, guya Azərbaycan Suriyadan terrorçu gətirir”.
Partiya sədri onu da qeyd etdi ki, heç bir beynəlxalq təşkilat Azərbaycanı haqq işindən döndərə bilməz.
Vidadi ORDAHALLI
