Fransa Prezidenti Emmanuel Makron Azərbaycanın ərazi bütövlüyünə qarşı çıxış etməklə, Ermənistana açıq dəstək verməklə, separatizmi, terroru dəsəklədiyini ortaya qoydu. Makron oktyabrın 1-də etdiyi bədnam çıxışında açıq-aşkar erməni aqressiyasını və separatizmini dəstəklədi.
Məsələ bundadır ki, Fransa Prezidenti son zamanlar bir neçə dəfə terror, separatizm əleyhinə açıqlama verib. Hətta Fransanın da separatizmdən əziyyət çəkdiyini qeyd edib. Bu ilin yayında isə Fransa parlamenti “Separatizmə qarşı” qanun layihəsi hazırlayıb və qanun layihəsi barədə Fransa Prezidenti E.Makron bu il sentyabrın 4-də “bu qanun Fransaya lazımdır” - deyə fikrini bildirib. Məlumatlara görə, sözügedən qanun noyabra kimi qəbul edilməlidir. Ekspertlər hesab edirlər ki, hazırda Fransa bu qanunun qəbul edilməsinə çalışır, çünki Korsika, Bretan, Kaledon kimi yerlərdə separatizm güclənməkdədir. Ekspertlərin dediyinə görə, paradoks ondadır ki, öz ölkəsində separatizmlə mübarizə edən hökumət Ermənistanın Azərbaycan ərazisində həyata keçirdiyi separatizmi, terroru dəstəkləyir.
“Bu, Makronun erməni lobbisinin əlində bir alətə çevrilməsi ilə bağlıdır”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev baki-xeber.com-a bildirdi ki, birincisi, ATƏT-in Minsk Qrupunun həmsədri Fransa Ermənistana siyasi dəstək verən, Azərbaycanın ərazi bütövlüyünə qarşı çıxan bir ölkə olaraq, Minsk Qrupunda birtərəfli şəkildə beynəlxalq hüququ tapdalayıb. Q.Hacıyev hesab edir ki, erməni separatizminin, terrorunun alovlanmasına “ilham verən” ölkələrdən biri elə Fransadır. Professor qeyd etdi ki, özü separatizmlə mübarizəyə dair qanun qəbul etməyə hazırlaşan bir dövlətin başqa bir ölkənin ərazisində separatizmə dəstək verməsi həqiqətən də ziddiyyətlidir. “Fransa Prezidentinin atdığı son ziddiyyətli addımlar, Ermənistanın separatçı davranışlarını birmənalı olaraq dəstəkləməsi Fransanın daxilində ciddi problemlər yaradacaq, həmçinin də separatizmin alovlanmasına səbəb ola bilər. Terrora, separatizmə, işğalçılığa haqq qazandıran ölkənin özü hədəf ola bilər. Bu gün dünyanın bir çox ölkəsi separatizmdən əziyyət çəkir. Makronun erməni separatizminə açıq dəstək verməsi Fransa xalqının əleyhinə getməkdir, Fransa Prezidenti artıq bunu etdi. Yaxın zamanlarda “Separatizmə qarşı” qanun qəbul edəcəyini elan edən bir dövlətin başçısının erməni separatizmini dəstəkləməsi Fransanın gələcəyi üçün xoş heç nə vəd etmir. Bu, Makronun erməni lobbisinin əlində bir alətə çevrilməsi ilə bağlıdır. Fransa Prezidenti erməni lobbisinin qarşısında çox aciz durumdadır, bu onun acizliyidir. Buna başqa məna vermək olmur. Sabah Fransada “Separatizmə qarşı” qanun qəbul ediləndə ortaya çox ciddi problemlər çıxacaq, Makron çıxılmaz vəziyyətə düşəcək”.
Q.Hacıyev qeyd etdi ki, Şarl de Qoldan sonra Fransada hakimiyyətə gələn qüvvəllər, bu ölkəyə rəhbərlik edənlər açıq-aşkar erməni sevgilərini büruzə veriblər, onlara havadarlıq göstəriblər. “Hətta erməni qriqoryan kilsəsinin mərkəzinin Parisə köçürülməsi ideyası da 100 ilə yaxındır ki, mövcuddur. Fransada dünyəvi bir sərkərdə, dövlət başçısı Şarl de Qoldan sonra hakimiyyətə gələnlərin hamısı çox biabırçı mövqe tutublar, fransız xalqına uyğun olmayan siyasət yürüdüblər. O cümlədən, bir neçə il bundan əvvəl Fransa yeganə ölkə idi ki, qondarma “erməni soyqırımı”nı tanımayanlar əleyhinə qərar qəbul etdi və Həllacoğlu kimi böyük bir tarixçini həbs etdirməyə çalışdılar. Bu qərarı qəbul etdiyinə görə qısa bir müddətdə Fransaya 7 milyarddan artıq zərər dəydi. Fransa hökumətinin həyata keçirdiyi ermənipərəst siyasət fransız xalqına böyük zərbə vurub” - deyə bildirən Q.Hacıyevin sözlərinə görə, Fransa həmsədr ölkə kimi fəaliyyətini dayandırmalıdır. “Onun bütün çıxışlarını izlədim. Makronun Paşinyandan heç bir fərqli yoxdur, ikisi də eyni səviyyədə olan adamlardır. Erməni separatizminə dəstək vermək, çağırışlar etmək həm Avropa dövlətlərindən birinin, həm də ATƏT-in Minsk Qrupunun həmsədr ölkələrindən birinin rəhbəri kimi Makronu gülünc vəziyyətə saldı. Ümumiyyətlə, fikrimcə, onun hərəkətləri heç bir əndazəyə sığmır, o, səhv bir yol tutub. Ona görə də Makronun bu addımı ciddi tənqid edilməli və hətta Fransanın həmsədr ölkə kimi ATƏT-in Minsk Qrupundan uzaqlaşdırılması məsələsi qaldırılmalıdır” - deyə Q.Hacıyev vurğuladı.
İradə SARIYEVA
