“Dünən Ermənistan baş naziri öz xalqını təşvişə salacaq formada "Facebook" hesabında paylaşımlar etmişdi”. Bunu keçirilən brifinqdə Azərbaycan Prezidentinin köməkçisi, Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev bildirib.
H.Hacıyev deyib ki, Paşinyanın yalan paylaşımına görə, hansısa dronlar İrəvan üzərində hərəkət edir. Paşinyan bu dronların vurulması ilə bağlı da paylaşımlar etdi:
"Daha sonra isə proqramla hazırlanmış bu yalan videolar sosial şəbəkələrdən silindi".
H.Hacıyev nəzərə çatdırıb ki, Prezident İlham Əliyevin də bəyan etdiyi kimi, bizim erməni xalqı, mülki əhali ilə işimiz yoxdur: “Mülki şəxsləri hərbi obyektlərdən kənar durmağa çağırırıq. Bu halda onların da təhlükəsizliyi təmin oluna bilər”.
Hikmət Hacıyev deyib ki, Ermənistan tərəfində Yunanıstandan gələn muzdlular döyüşür. Onun sözlərinə görə, xaricdə kiberhücum edən ermənilər var. Onlar ölkəmizin informasiya təminatına kiberhücumlar həyata keçirir. Bu problemin qarşısı alınmalı, aidiyyəti dövlətlər bu barədə tədbir görməlidir.
Hikmət Hacıyevin sözlərinə görə, Ermənistanın yalan bəhanələri üzə çıxarılıb. Onun sözlərinə görə, Ermənistan tərəfi iddia edir ki, guya 2 ədəd Su 25 təyyarəsi F-16 təyyarəsi tərəfindən vurulub. Hansı ki, Azərbaycan tərəfdə F-16 təyyarələri olmayıb:
“Məlum oldu ki, Ermənistan Silahlı Qüvvələrinə məxsus 2 ədəd Su 25 təyyarəsi havaya qaldırılıb və göydə ikisi toqquşub. Bu prosesdə də ermənilərin yalanı üzə çıxdı".
Prezidentin köməkçisi işğal altında olan Azərbaycan ərazilərinə səfər edən xarici jurnalistlərə çağırış da edib. O deyib ki, Ermənistan xarici jurnalistləri döyüş bölgəsinə müxtəlif adlarla çağıraraq onları hədəfə çevirməyə çalışır
O, xarici jurnalistləri həmin ərazilərə daxil olmamağa çağırıb: "Əgər onlar atəş məntəqələrinə yaxın ərazilərə gətirilirsə, onların təhlükəsizliyinə cavabdeh deyilik. Ermənilər həmin jurnalistləri atəş nöqtəsinə yaxın ərazilərə gətirir və təxribatlarını davam etdirir. Bu məsələdə birbaşa məsuliyyət Ermənistan üzərinə düşür".
Prezidentin köməkçisi Azərbaycanın yaşayış məntəqələrinə Ermənistan ərazisindən raketlər atıldığını da deyib.
Onun sözlərinə görə, Ermənistan bununla beynəlxalq konvensiyaları kobud şəkildə pozur. Ermənistan Silahlı Qüvvələri “Smerç” raketlərindən Füzuli və Cəbrayılın mülki vətəndaşlarına raket atəşi açıb:
“20-yə yaxın evə zərər dəyib. Bu gün də Vardenisdən Şəmkirdə “Toçka U” raketi atılıb. Bir daha bəyan edirik ki, Azərbaycan öz təhlükəsizliyini müdafiə etmək üçün cavab atəşi açacaq. Bu, bir daha Ermənistanın acizliyini göstərir və bütün məsuliyyət onların üzərinə düşür. 20-dən artıq mülki şəxs həlak olub, 50-dən artıq şəxs yaralanıb, mülki obyektlərə ziyan dəyib”.
Hikmət Hacıyev Azərbaycan Ordusunun Ermənistanın müqavimətini sarsıtdığını da sözlərinə əlavə edib. O deyib ki, hərbi əməliyyatlar davam etdirilir. Bu müddət ərzində Ermənistanın hərbi infrastrukturuna ciddi zərbə vurulub.
Onun sözlərinə görə, Ermənistanın hərbi infrastrukturu və texnikaları sıradan çıxarılır. Nəticədə, Azərbaycan Ordusu Ermənistanın müqavimətini sarsıdıb: "30 il müddətində ermənilər hərbi istehkam sistemi qurublar. Qısa müddət ərzində bu istehkam sıradan çıxarılıb ki, Ermənistanın Azərbaycana qarşı təcavüzünə son qoyulsun".
Azərbaycan Silahlı Qüvvələrinin əməliyyatları çətin şəraitdə davam etdirdiyini deyən H.Hacıyev qeyd edib ki, Azərbaycan Ordusu düşmənin uzunmüddətli istehkamını məhv edir: "Çünki 30 il ərzində düşmən beton istehkam sistemləri qurub. Onlar 8-10 metr dərinlikdə beton istehkam sistemlərində gizlənib. Azərbaycan hərbçiləri bu çətin şəraitdə addım-addım irəliləyir. Azərbaycan əsgəri bu çətin relyef şəraitində düşmənin mövqelərini darmadağın edir, torpaqlarımızı azad edir".
Hikmət Hacıyev bildirib ki, Ermənistan silahlı qüvvələrinin acizliyi fonunda Ermənistan ərazisindən Azərbaycanın mülki yaşayış məntəqələrinə qarşı raket hücumu həyata keçirilir. Ermənistan mülki şəxsləri qəsdən hədəfə çevirir, bununla Cenevrə Konvensiyasını pozur.
Prezidentin köməkçisi qeyd edib ki, ilkin olaraq Vardenis rayonu istiqamətindən Daşkəsən rayonuna raket zərbəsi endirilib:” Azərbaycan tərəfi həmin atəş hədəfini məhv edib. Dünən Ermənistan Füzuli istiqamətində “Smerç” sistemindən istifadə edərək Cocuq Mərcanlı kəndini atəşə tutub, 20-yə yaxın evə ziyan dəyib. Bu gün Gorusdan “Toçka-U” raketi vasitəsilə Şəmkirə raket atəşi olub. Bir daha xəbərdarlıq edirik ki, Ermənistan tərəfindən açılan bu atəşlə bağlı Azərbaycan Ermənistan ərazisində olan legitim hərbi hədəflərə qarşı tədbirlər görəcək. Ermənistan silahlı qüvvələri istər şəxsi, istər texnika baxımından üzləşdiyi itkiləri bu cür kompensasiya etməyə çalışır. İyirmidən artıq mülki şəxsimiz həlak olub, 50-dən çox mülki şəxsimiz isə yaralanıb”.
Hazırladı: Namiq QULİYEV
