Cəbhə zonasında Azərbaycan ordusunun uğurları ilə davam edən hərbi əməliyyatlar Ermənistanın ciddi məğlubiyyəti ilə müşahidə olunur. Ermənistan ordusunun uğursuzluqları, Nikol Paşinyanın uydurduğu yalanların ifşa olunması cəmiyyətdə ciddi etirazlara səbəb olur. Artıq siyasətçilər, ekspertlər, jurnalistlər belə açıq şəkildə Paşinyanın erməni xalqını məğlubiyyətə sürüklədiyini bildirir, ona qarşı koalisiyalar qururlar.
Qondarma “Dağlıq Qarabağ respublikası”nın keçmiş liderləri Robert Köçəryan, Arkadi Qukasyan və Bako Saakyanın Qarabağda görüş keçirmələrinə dair sosial şəbəkələrdə yayılan fotolar, verilən açıqlamalar deməyə əsas verir ki, hökumətin bəyan etdiyi hansısa vahid mövqedən söhbət gedə bilməz. Sosial şəbəkələrdə isə Köçəryan və Sarkisyan tərəfdarları Ermənistan hökumətini ordudakı itkiləri gizlətməkdə ittiham edir.
Beynəlxalq müstəvidə də baş verənlərə görə Ermənistan ittiham edilir. Bu fonda beynəlxalq ictimiyyətin nümayəndələrindən biri kimi Ukraynanın Azərbaycanın yanında yer alması Ermənistanda böyük qəzəblə qarşılanır. Erməni mediası bunu Paşinyan iqtidarının uğursuzluğu kimi şərh edir. İrəvanın narazılığına baxmayatraq, Ukraynanın xarici işlər naziri Dmitro Kuleba qeyd edir ki, Kiyev Azərbaycanın ərazi bütövlüyünü dəstəkləyir. O, ərazi bütövlüyü prinsipinin Ukraynanın xarici siyasətində təməl prinsiplərdən biri olduğunu diqqətə çatdırıb: “Azərbaycan daha əvvəl bizim ərazi bütövlüyümüzü dəstəklədiyi kimi, biz də Azərbaycanın ərazi bütövlüyünü dəstəkləmişik və dəstəkləyirik”. Ukraynalı nazirin fikrincə, Dağlıq Qarabağdakı döyüşlərdən də əyani göründüyü kimi, dondurulmuş münaqişələr əslində yoxdur, belə görünən münaqişələr hər an “qızışa” bilər: "Bu cür münaqişələr Avropada sabitsizlik mənbəyidir. Beynəlxalq ictimaiyyət də məsələnin həllinə müvafiq şəkildə münasibət bildirməlidir. Belə münaqişələri unutmaq əvəzinə, həlli üçün ardıcıl və əlaqəli şəkildə səylər göstərilməlidir”.
Bu fonda Ali Radada "Xalqın xidmətçisi" partiyasını təmsil edən deputat Lyudmila Marçenko da maraqlı bir açıqlama verib. O bildirib ki, rəsmi Kiyev Dağlıq Qarabağda vəziyyətin daha da kəskinləşməsi fonunda Azərbaycana hərbi yardım göstərməyə hazırdır: "Ukrayna bu gün Azərbaycanı müxtəlif arenalarda dəstəkləməyə hazırdır. Bu, gələcəkdə lazım olacaq hərbi, humanitar - hər cür dəstəkdir. Bu, hərbi vəziyyətdir. Bildiyim qədər, həm hüquqi sahədə, həm də resurs sahəsində yardım edirik, söhbət humanitar yardımdan gedir. Bu gün məhz ehtiyac duyulanların siyahısını tərtib etmək məsələsi nəzərdən keçirilir". Digər ukraynalı ekspert Oleq Kupçik isə bildirir ki, Azərbaycanın öz ərazi bütövlüyünün bərpasına yönəlmiş hərəkətləri qanunidir: “Dağlıq Qarabağ mübahisəli ərazi deyil. O, Azərbaycanın bütün beynəlxalq birlik tərəfindən, o cümlədən Ermənistanın özü tərəfindən də tanınmış regionlarından biridir”. Onun sözlərinə görə, azərbaycanlı hərbçilər Ermənistan ərazisində vuruşmur, onun ərazisini ələ keçirməyə çalışmırlar. Bundan əlavə, Azərbaycanın Dağlıq Qarabağ bölgəsi ətrafındakı 7 rayonunun Ermənistan silahlı qüvvələri tərəfindən işğal edilməsini də unutmaq olmaz: “Bu gün tamamilə aydındır ki, Azərbaycanın ərazi bütövlüyünü ATƏT-in Minsk Qrupunun köməyilə bərpa etmək üçün iyirmi beş ildən artıq müddətdə göstərilən cəhdlər özünü doğrultmayıb. İndi təqsirkarların beynəlxalq-hüquqi məsuliyyətə cəlb edilməsi, vurulmuş maddi və digər ziyanın ödənilməsi üçün Azərbaycanın Dağlıq Qarabağ bölgəsinin, habelə Ukraynanın Donetsk və Luqansk regionlarının bir hissəsinin işğalına aid sübutların sənədləşdirilməsini davam etdirmək lazımdır. Lakin ən başlıcası, Ukrayna-Azərbaycan münasibətləri bir-birinin ərazi bütövlüyünün qarşılıqlı surətdə və ardıcıl olaraq dəstəklənməsinə əsaslanır”.
Ukraynanın Avropa Şurası Parlament Assambleyasındakı (AŞPA) nümayəndə heyətinin rəhbəri Yelizaveta Yasko da Ukraynanın Azərbaycanın Dağlıq Qarabağ bölgəsində gedən hərbi əməliyyatlardan çox narahat olduğunu bildirib. Yasko qeyd edib ki, Ukrayna Parlamentinin Xarici Siyasət Komitəsi bu məsələləri qapalı iclasında müzakirə edib: “Ukrayna xarici işlər naziri Dmitri Kuleba Ukrayna xarici siyasətinin təməl daşlarından birinin dövlətlərin ərazi bütövlüyünə dəstək olduğunu deyib. Nazir bildirib ki, Azərbaycan Ukraynanın ərazi bütövlüyünü dəstəklədiyi kimi, Ukrayna da Azərbaycanın ərazi bütövlüyünü dəstəkləyir. Mən də bu fikirlərə qoşuluram”. Yasko hərbi münaqişə səbəbindən həyatını itirən mülki vətəndaşlar və hərbi qulluqçulara görə kədərləndiyini bildirərək Azərbaycan xalqına başsağlığı verib: “Ukraynanın AŞPA-dakı nümayəndə heyətinin sədri kimi, Bakı və İrəvandan olan həmkarlarımla telefon danışıqları apararaq hər iki tərəfi atəşkəs tətbiq etməyə, danışıqlar aparmağa və insan haqlarına, beynəlxalq humanitar hüquqa hörmət etməyə çağırmışam. Hər iki ölkə də Avropa Şurasının üzvü olduqları üçün insan haqlarına hörmət əsas götürülərək mülki şəxslərin həyatının qorunması belə bir vəziyyətdə ən yüksək prioritet olmalıdır”.
Ramil QULİYEV
