Ermənistanın xarici işlər naziri Zoqrab Mnatsakanyan Misirə səfər edib. Səfər Şərqi Aralıq dənizində Türkiyə ilə Yunanıstan və Kipr arasında yaşanan gərginlik fonunda ortaya çıxıb. Sərhəd mübahisəsində Yunanıstanı dəstəkləyən rəsmi Qahirə Baş Qərargah rəisi Əbdülfəttah əs-Sisinin hərbi çevriliş yolu ilə hakimiyyətə gəlməsindən sonra Türkiyə ilə münasibətlərdə ciddi soyuqluq yaşayır.
Türkiyəyə qarşı birləşən Yunanıstan, Kipr, Fransa, Birləşmiş Ərəb Əmirlikləri və Misirin yer aldığı koalisiyaya qoşulmaq istəyən Ermənistan Aralıq dənizində yaşanan gərginliyi özünə fürsət bilib.
Qahirədə misirli həmkarı Sameh Şükri ilə birgə mətbuat konfransı keçirən Zoqrab Mnastakanyan Türkiyə və Azərbaycana qarşı yenə böhtan xarakterli mesajlar verib:
“Biz Şərqi Aralıq dənizində baş verən hadisələri diqqətlə izləyirik və bundan əvvəl Yunanıstan və Kiprə öz iqtisadi zonalarında fəaliyyət göstərmələrinə tam dəstək ifadə etmişik. Eyni zamanda, Misir dövlərinə də öz dəstəyimizi ifadə etmək istərdim”.
Maraqlıdır, Qafqazda işğalçı siyasət aparan Ermənistan indi də öz coğrafiyasından qat-qat uzaq bir regionda təxribatını davam etdirir. Müsəlman ölkəsi Misirlə birləşib, müsəlmanlara qarşı yaramaz addımlar atır. Aralıq dənizi ətrafında cərayan edən proseslərə burun soxmaq, oradakı hansısa koalisiyada yer almaq Ermənistanın bir ölkə kimi qüdrətinə, potensialına adekvatdırmı?
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistan son 2-3 il ərzində nəzərəçarpacaq dərəcədə mövqe itirib: “Son 25 il ərzində onsuz da Ermənistan beynəlxalq təşkilatlarda işğalçı bir ölkə kimi tanınırdı. Ancaq son illər ərzində Paşinyanın səriştəsiz fəaliyyəti bu imici daha da möhkəmlətdi. Ermənistan rəhbərliyi itirilən bu mövqeləri saxta işlərin görütüləri ilə kompensasiya etməyə çalışır. Bu işlər iki istiqamətdə aparılır. Birincisi, Türkiyə və Azərbaycana qarşı olan regional birliklərə qoşulur. Bunun ciddi nəticəsi olmasa da, daxili auditoriyanı sakitləşdirmək üçün belə kartla manevr edir. Təbiidir ki, onların Aralıq dənizində baş verən münaqişədə tərəf tutması nəyisə dəyişən deyil. Bilirsiniz ki, Türkiyə Yaxın Şərqdə söz sahibi olan ölkədir. Əvvəllər Misir də bu coğrafiyada hegemon mövqeyə sahib olub. Son 7-8 ildə onun bu mövqeyi sarsılıb. Artıq həmin regionda başqa güclər söz sahibidir. Misir isə yalnız onların ətrafında dirijorluq edir. Türkiyənin əleyinə getmək həm də Sisiyə əlavə dividendlər qazandırır. Asanlıqla yeni koalisiyalara qoşula bilir ki, bu da onun hakimiyyətinin ömrünü uzadır. Ermənistanın imici çox bərbaddır. Belə bir ölkənin hardasa söz sahibi olması mümkün deyil. Həmin ölkə işğalçı kimi tanınır, eyni zamnda beynəlxalq qaçaqmalçılıq yüklərinin daşınması üzrə tranzit ölkədir. Bu tip koalisiyalarda təmsilçiliklə Ermənistan həm də suallardan yayınmağa çalışır. Amma hamıya aydındır ki, bu məsələdə Ermənistanın yalnız bir marağı var - öz istəyini təmin etmək. Bu ölkə görür ki, saxta soyqırım iddiaları ilə bağlı kampaniya artıq ciddi effekt vermir, indi də Türkiyə və Azərbaycanın düşmənləri ilə dost olmaq siyasətini yürüdür. Bunun isə kolasiyada təmsil olunan ölkələrə heç bir xeyri olmayacaq. Çünki Ermənistan elə gücdə deyil ki, onun dəstəyindən kimsə bəhrələnə bilsin. Onlar yalnız kiməsə yük olmağa öyrəşiblər”.
Çox maraqlıdır ki, adını müsəlman ölkəsi qoyan Misir Ermənistan kimi bir işğalçı ilə başqa müsəlman ölkələrinə qarşı cəbhədə yer alır.
Məhəmmədəli QƏRİBLİ
