Məlum olduğu kimi, ATƏT-in Minsk Qrupu həmsədrləri (Rusiya Federasiyasından İqor Popov, Fransadan Stefan Viskonti və ABŞ-dan Endrü Şofer) Parisdə məsləhətləşmələr aparıblar.
“Azvision.az” ATƏT-in saytına istinadən xəbər verir ki, görüşdə ATƏT-in fəaliyyətdə olan sədrinin şəxsi nümayəndəsi Anjey Kaspşik də iştirak edib.
Həmsədrlər bu il iyulun ortalarında Ermənistan-Azərbaycan sərhədində baş verən son hadisələrə xüsusi diqqət yetirərək bölgədəki vəziyyəti nəzərdən keçiriblər. Onlar tərəflərin mesajlarını və narahatlıqlarını diqqətlə nəzərdən keçirərək qiymətləndiriblər. Həmsədrlər A.Kaspşik tərəfindən döyüş mövqelərindəki vəziyyət barədə məlumat alıb və monitorinqi bərpa etmək üçün etdiyi hərəkətləri alqışlayıblar.
Minsk Qrupunun yaydığı bəyanatda deyilir ki, həmsədrlər ATƏT-dəki mandatlarına uyğun olaraq, münaqişənin dinc və hərtərəfli nizamlanmasına dair danışıqlara fəal və hərtərəfli kömək etməyə davam edirlər.
Göründüyü kimi, həmsədrlərin sözügedən bəyanatı ən dişsiz və mənasız bir bəyanatdır. Nəzərə alsaq ki, Tovuz döyüşlərindən sonra tərəflər arasında müharibə risqi xeyli artıb, o zaman belə vecsiz bəyanatın verilməsinin heç bir yeri yox idi. Xüsusən də son bəyanatda həmsədrlər Qarabağda qanunsuz köçürməyə heç bir münasibət bildirmədilər. Hansı ki, son günlər Livandan qanunsuz olaraq ermənilərin Qarabağa köçürülməsi ən çox müzakirə edilən məsələdir. Həmsədrlər isə, ümumiyyətlə, bunu görməzdən gəliblər.
“...yalançı manevrlər etməkdədir”
Məsələyə münasibət bildirən AMİP sədrinin müavini Afsəddin Nəbiyevin sözlərinə görə, bu, həmsədrlərin növbəti riyakarlığıdır: “Dəfələrlə biz bunun şahidi olmuşuq. Bir daha məlum oldu ki, həmsədrlər işğalçı tərəfə təzyiq göstərmək istəmirlər. Partiya olaraq ATƏT-in Minsk Qrupundan imtina olunması ilə bağlı çağırışlar etmişik. Bir neçə həftə bundan öncə AMİP qurultayında Qarabağla bağlı qətnamə qəbul olundu. Qətnamədə bununla bağlı bir sıra məqamlar öz əksini tapıb. Qətnamədə qeyd olunub ki, düşmən tərəf problemin sülh yolu ilə həllində maraqlı deyil, əksinə, xarici havadarlarının dəstəyilə Azərbaycanın digər ərazilərinə də iddia etməkdədir. Atəşkəs adlandırılan dövr ərzində erməni silahlı qüvvələri tərəfindən törədilən belə xaincəsinə hücumlar nəticəsində bəlkə də bir müharibədə verildiyindən daha artıq şəhid verilib. ATƏT-in Minsk Qrupunun bu illər ərzində yarıtmaz fəaliyyəti xüsusi qeyd olunmaqla, ondan imtina edilməli, müdafiə mövqeyindən çıxış etmək siyasətinə son verilərək hücum mövqeyinə keçilməlidir. Qəti mövqe açıqlanmalı və beynəlxalq ictimaiyyət xəbərdar olunmalıdır ki, Azərbaycan dövləti beynəlxalq hüquqa əsaslanaraq işğal altında olan torpaqlarını işğalçılardan və terrorçulardan azad etmək hüququndan istifadə edəcək. Ümumilikdə, partiya problemin hərbi-siyasi yolla həllinə üstünlük verir. Son dövrlər ATƏT-in Minsk Qrupu özünün "mövcudluğunu" göstərmək üçün yalançı manevrlər etməkdədir. Azərbaycan dövləti və cəmiyyəti ATƏT-in yarıtmaz, yarımçıq fəaliyyətini qəbul etmir. AMİP olaraq biz ATƏT-in Minsk Qrupundan imtina olunmasıyla bağlı dəfələrlə çağırışlar etmişik. Çünki bu qrupun Azərbaycanda mövcudluğu hiss olunmur. İndiki həssas məqamda Azərbaycan Türkiyə ilə hərbi müttəfiqlik müqaviləsi imzalamalıdır. Eyni zamanda, sözügedən müqavilə Azərbaycanın Təhlükəsizlik Konsepsiyasına uyğunlaşdırılmalıdır. Əgər biz torpaqlarımızı işğaldan azad edən vaxtda digər dövlətlər Ermənistana hərbi yardım edərsə, o zaman Türkiyə Cümhuriyyəti də Azərbaycan dövlətinin yanında olacaq”.
Partiya funksionerinin fikrincə, artıq həmsədrlərdən münaqişənin həlli ilə bağlı müsbət bir şey gözləmək sadəlövhlükdür.
Vidadi ORDAHALLI
