"Türkiyə və Azərbaycan olaraq ətrafımızdakı atəş həlqəsinə qarşı eyni əzmlə mübarizə aparmaqda qərarlıyıq" - Səfir Erkan Özoral
15 sentyabr - Bakının Qafqaz İslam Ordusu tərəfindən isğaldan azad olunmasının 102-ci ildönümü ilə bağlı Bakı Türk şəhidliyində anım mərasimi keçirilib.
Trend-in məlumatına görə, mərasimdə Türkiyənin Azərbaycandakı səfiri Erkan Özoral və Azərbaycan rəsmiləri iştirak edib.
E.Özoral deyib ki, 15 sentyabrda Bakının işğaldan azad edilməsi ilə qazanılan bu zəfər tək bugünkü müstəqil Azərbaycana yol açmayıb, eyni zamanda Azərbaycan və Türkiyə üzərində qurulmaq istənilən oyunların sonunu gətirib: “Türkiyə və Azərbaycan olaraq bu gün ətrafımızdakı atəş həlqəsinə qarşı eyni əzm və iradə ilə mübarizə aparmaqda qərarlıyıq. Hər zaman olduğu kimi bundan sonra da “iki dövlət, bir millət şüarı” ilə irəliləyəyərək gələcəyimizi birlikdə qurmaq istiqamətində davam edəcəyik. Bakının Qafqaz İslam Ordusu və Azərbaycan Ordusu tərəfindən işğaldan azad edilməsinin 102-ci ildönümündə Nuru Paşanı, hər bir əsgəri, Azərbaycan Ordusunun hər bir qulluqçusunu hörmətlə anıram”.
Azərbaycanın Türkiyənin Şərqi Aralıq dənizi ilə bağlı mövqeyini dəstəkləməsi Ankaraya güc verir. Bunu da jurnalistlərə açıqlamasında Türkiyənin Azərbaycandakı səfiri Erkan Özoral deyib.
Səfir deyib ki, Türkiyə Azərbaycanın dəstəyi ilə fəxr edir: “Qardaşlarımızdan gözləntimiz də bu idi. Pis günlərdə, yaxşı günlərdə bir-birimizin yanındayıq. Biz bir millət, iki dövlətik.
Türkiyənin Şərqi Aralıq dənizi ilə bağlı mövqeyi beynəlxalq hüquqa, haqlarımıza və mənfəətlərimizə əsaslanır”.
