09/08/2020 12:42
728 x 90

Ermənistan itkilərini etirafa məcbur edilir, cəmiyyətlə hakimiyyətin itki sayları üzərində mübahisəsi davam edir...

Elşən Mustafayev: “İtkilərin sayı açıqlanan kimi erməni analar gedib dövlət qurumlarının qarşısında piket keçirir”

img

Xəbər verdiyimiz kimi, Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu istiqamətində mövqelərimizi ələ keçirmək məqsədilə artilleriya atəşindən istifadə edərək hücuma keçməyə cəhd göstərib. Görülən adekvat tədbirlər nəticəsində düşmənə zərbə endirilib və o, itki verərək geri oturdulub.

Döyüş nəticəsində Azərbaycan Ordusunun hərbi qulluqçularından şəhid olanlar var. Düşmən tərəfi isə ciddi itkilər versə də, Ermənistan ordusunun rəsmiləri bu barədə məlumatı gizlədir. Buna baxmayaraq, sosial şəbəkələrin erməni seqmentində Ermənistanın ciddi itkilər verdiyi qeyd olunur. İrəvanın mərkəzində etirazçılar meydana toplaşaraq, hökumətdən itkilərin sayını düzgün açıqlamağı tələb edirlər. Ermənistan informasiya maşınının yenidən yalan tirajlaması bu dəfə sosial şəbəkələrin gücü ilə tam iflas olunur. Ermənistan cəmiyyəti ilə hakim dairələrin itkilərin sayı ilə bağlı açıqladığı ziddiyyətli rəqəmlərin olması nəyi söyləməyə əsas verir?

Politoloq Elşən Mustafayev “Bakı-Xəbər”ə açıqlamasında bildirdi ki, Ermənistan silahlı qüvvələri Azərbaycan ordusunun Tovuz rayonunda sərhəd xəttindəki mövqelərinə artilleriya qurğularından atəş açandan sonra başlayan döyüşdə olanlarla bağlı rəsmi İrəvan cəmiyyətə dolğun informasiya vermir: “Biz Ermənistanla uzun müddət atəşkəs rejimində yaşasaq da, cəbhədə mövqe döyüşləri olub. Onların davranışlarını artıq əzbər bilirik. Demək olar ki, bütün hallarda bunlar əvvəlki davranışlarla sinxronluq təşkil edir. Tovuzda başlayan təxribatla da bağlı onlar rəsmi qaydada əhalini çaşdırırlar. Ancaq Ermənistan Müdafiə Nazirliyindən fərqli olaraq, Azərbaycanın hərbi idarəsi ölən və yaralananların sayı barədə məlumat verib. Azərbaycan Silahlı Qüvvələrinin  verdiyi şəhid sayı məlumdur. Hətta həlak olanların adları və rütbələri də cəmiyyətə açıqlanıb. Bunun bir tərəfi də kimin necə müharibə aparması ilə bağlıdır. Biz özümüzü müdafiə edirik, şərəfli bir müharibə aparırıq. Ermənistan isə bu müharibəyə işğalçılığıq niyyətilə girişib. Bunun da hesabatını öz daxili auditoriyasına verə bilmir. İtkilərin sayı açıqlanan kimi erməni analar gedib dövlət qurumlarının qarşısında piket keçirir. Dəfələrlə bunun şahidi olmuşuq. Bizim şəhidlərimizi isə valideynlər, ailə üzvləri “Təki Vətən sağ olsun!” deyərək qəbul edir. Ermənistanın bu  münaqişə ilə bağlı yalnız itkilərlə bağlı deyil, digər istiqamətlərdə də siyasəti saxtakarlıq üzərində qurulub.

Ermənistan Müdafiə Nazirliyi hərbi hadisələrin həqiqi miqyası barədə məlumat vermir, çox qısa və anlaşılmaz məlumatlar verir. Sosial şəbəkələrin erməni seqmenti bu yalanları yaxşıca ifşa edir. Elə orda verilən informasiyadan sonra Ermənistanın daha iki hərbçisinin məhv edildiyi məlum olub. Bu barədə həmin ölkənin vətəndaşları sosial şəbəkələrdə məlumat paylaşıb. Məlum olub ki, Azərbaycan əsgərləri tərəfindən məhv edilən hərbçilər Slavik Qaytsakov və Aşot Melkumyandır.

Sosial şəbəkələrdə onlardan birinin - S.Qaytsakovun  hətta pasportunun fotosu da paylaşılıb.  Ermənistan bundan əvvəl 4 hərbçisinin məhv edildiyini etiraf edib. Digər itkilər isə, hələ ki, rəsmən açıqlanmır və gizlədilir. Ermənilər təxribatı, çox güman ki, hansısa siyasi məqsədlərlə həyata keçiriblər. Onlar çox vaxt itkilərini gizlədirlər ki, ordunun zəif olduğunu xalq görməsin. Böyük itkilər varsa, bunu uzunmüddətli gizlətmək mümkün olmayacaq. İctimaiyyətin itkilərlə bağlı məlumatı olacaq. Çünki indi internet əsridir, hansısa informasiyanı uzun müddət gizli saxlamaq qeyri-mümkündür. Səbəblərdən ən başlıcası Ermənistandakı daxili siyasi mühitin gərgin olmasıdır. Paşinyan hakimiyyəti qorxur ki, müxalifət itkilərin çoxluğunu əsas gətirib, onun hakimiyyətinə ciddi problem yaşadar”.

Ermənistanın bu saxtakarlığı çoxdan öz vətəndaşları tərəfindən ifşa edilib. Bunu görmək üçün sosial şəbəkələrdə erməni profillərindən yazılan məlumatları izləmək kifayət edir.

Məhəmmədəli QƏRİBLİ

Son xəbərlər