09/08/2020 12:25
728 x 90

Orduya könüllü yazılmaq istəyən gənclərin Azərbaycan Prezidentinə müraciəti…

Kənan Qubadzadə: “Xalqımız mübarizə əzmindədir və Ali Baş Komandanın əmrini gözləyir”

img

Cəbhə bölgəsində gərginliyin artması, ordumuzun şəhidlər verməsi geniş müharibənin başlaması ilə bağlı ehtimalları gündəmə gətirib.

İctimaiyyət fəalları, ziyalılar, millət vəkilləri Azərbaycanın öz torpaqlarını işğaldan azad etmək üçün məqamın yetişdiyini bəyan edərək, hər kəsi müharibəyə hazır olmağa səsləyirlər. Hətta bir qrup gənc orduya yazılmaq üçün Prezident ilham Əliyevə müraciət də ünvanlayıb.

Bakı şəhər Gənclər və İdman Baş İdarəsinin rəisi Raqif Abbasov paytaxt gəncləri və idmançıları adından Azərbaycanın Prezidenti Ali Baş Komandan İlham Əliyevə ünvanlıdığı müraciətdə bunlar qeyd olunur: “Bütün Azərbaycan xalqı, o cümlədən gənclər Sizin Təhlükəsizlik Şurasındakı çıxışınızdan sonra orduya yazılmaq istəklərini bildirirlər. Çoxsaylı paytaxt gəncləri və idmançılar, Sizin əmrinizlə ordu sıralarında düşmənə qarşı döyüşmək, torpaqlarımızın azadlığı uğrunda canlarından keçməyə hazır olduqlarını bəyan edirlər”.

  • “Azərbaycan gəncliyinin böyük əksəriyyəti Qarabağın azadlığı üçün döyüşməyə və yeri gəlsə, canını fəda etməyə hazır vəziyyətdə dayanıb”

Gənclər Mərkəzi ictimai birliyinin icraçı direktoru Kənan Qubadzadə “Bakı-Xəbər”ə açıqlamasında qeyd etdi ki, ehtiyatda olan vətənpərvər Azərbaycan gəncləri könüllü olaraq döyüşə getmək üçün Səfərbərlik və Hərbi Xidmətə Çağırış üzrə Dövlət Xidmətinə (SHXÇDX) çoxsaylı müraciətlər ediblər. Xeyli sayda Azərbaycan gənci könüllü olaraq döyüşə qatılmaq istəyir: “Bəzən gənclərimizin unutqan olduğunu, döyüş, hərbi-vətənpərvərlik ruhlarının olmadığını deyirlər, amma reallıq fərqlidir. Azərbaycan gəncliyinin böyük əksəriyyəti Qarabağın azadlığı üçün döyüşməyə və yeri gəlsə, canını fəda etməyə hazır vəziyyətdə dayanıb”.

Həmsöhbətimiz onu da vurğuladı ki, gənclər axın-axın cəbhə bölgəsinə döyüşə getmək üçün meydanlara çıxdı: “Ehtiyatda olan vətənpərvər Azərbaycan gəncləri könüllü olaraq döyüşə getmək üçün Səfərbərlik və Hərbi Xidmətə Çağırış üzrə Dövlət Xidmətinə çoxsaylı müraciətlər ediblər. Bu bir daha göstərdi ki, xalqımız mübarizə əzmindədir və Ali Baş Komandanın əmrini gözləyirlər”.

Sonda onu da bildirək ki, nəinki gənclərimiz, orta yaşlılarımız, hətta ahıllarımız belə Qarabağda döyüşmək üçün əmr gözləyir və bu əmr verilməlidir, veriləcək də. Bizim Qarabağı necə istədiyimizi, dövlətdən döyüş əmri tələbi ilə meydanlarda hayqırdığımızı hamı görür. Bunu düşmən də görür və qorxuya düşür.

Günel CƏLİLOVA

Son xəbərlər