Tovuz istiqamətində baş verən erməni təxribatına Azərbaycan ordusu ilə yanaşı, ictimaiyyəti də lazımi reaksiyanı verdi. Xırda təxribatları nəzərə almasaq, ümumən on minlərlə insan cəbhədə baş verənlərlə bağlı ölkənin müxtəlif rayonlarında ordumuza dəstək aksiyaları keçirdi. Azərbaycanın əksər siyasi təşkilatları, QHT-ləri bu məsələdə hakimiyyətin yanında olduqlarını bəyan etdilər.
Hətta Azərbaycan hakimiyyətə qarşı ən radikal mövqeyi ilə seçilən Əli Kərimlinin rəhbərlik etdiyi Azərbaycan Xalq Cəbhəsi Partiyası da bu məsələdə hakimiyyətə dəstəyini ifadə edib. Maraqlıdır ki, son günlərdə ordu və hakimiyyət əleyhinə davranış sərgiləyən, açıqlamalar verən Əli Kərimli iqtidara yönəlik ciddi reverans edib. Onun açıqlamasını təqdim edirik: “Ermənistanın və arxasındakı dairələrin azğınlığı bütün hədləri aşmışdır. Ordumuzun düşmənə layiqli cavab verəcəyinə, torpaqlarımızı ləyaqətlə qoruyacağına əminəm. Ordumuza dəstəyimiz tamdır. Dualarımız əsgər və zabitlərimizlədir. Azərbaycan hökumətinin gözü arxada qalmasın. Düşməni yerində oturtmaq üçün dövlətin bütün resursları səfərbər edilməlidir. Hökumətlə olan fikir ayrılıqlarımızı, mübahisələrimizi daha yaxşı zamanlara saxlayırıq. Bütün gücümüzlə dövlətimizin və ordumuzun yanındayıq”.
Belə həssas məqamda, hətta radikal müxalifətin bu sayaq davranışını siyasilər necə dəyərləndirir?
Müxalifətdə olan Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, belə hallar birmənalı olaraq təqdir olunmalıdır:“İlk növbədə ondan başlayaq ki, ölkəmizin həyatında olduqca ciddi hadisələr baş verir. Ermənistan Tovuz istiqamətindən ərazilərimizə növbəti hücumu etdi. Eyni zamanda göstərdi ki, onun planının arxasında ciddi və məkrli niyyətlər durur. Açığını deyim ki, torpaqlarımızın işğalından sonra Azərbaycan cəmiyyəti indiki qədər vahid mövqe və ruh yüksəkliyi ortaya qoymamışdı. Bütün dünya görür ki, bizim insanların səbr kasası dolub. Biz heç bir güzəştə getmək istəmirik. Xalqımız illərdir beynəlxalq təşkilatların apardığı yalançı sülh təbliğatını qəbul etmir və əzmlə torpaqlarını işğaldan azad etməyi tələb edir. Belə bir vəziyyət yaranandan sonra bir çox siyasi təşkilatlar da konkret mövqe ortaya qoydular. Biz Böyük Azərbaycan Partiyası olaraq hamıdan əvvəl bəyanat verdik. Bütün siyasi qüvvələri Azərbaycanın haqq işində dövlətimizi , hakimiyyətin müharibə istiqamətində aparacağı siyasəti dəstəkləməyə çağırdıq. Çox yaxşı haldır ki, Azərbaycanın siyasi partiyalarının böyük əksəriyyəti ölkəmizin bu ağır günündə bütün fikir ayrılıqlarını kənara qoyub, qüvvələri səfərbər edərək, zərbəni bir nöqtəyə vurmaq əzmini ortaya qoydular. Bu çox yaxşı haldır. Düşmən də, onların arxasında duran qüvvələr də görür ki, bizim xalq olaraq mövqeyimiz bir və qətidir. Əli Kərimlinin də atdığı addımı normal qarşılayıram. Biz 43 siyasi təşkilatın imzası ilə ümumi bir sənədə imza atmışıq. Dünyaya bir mesaj vermək istəyirik ki, Qarabağ məsələsində ölkəmizdə iqtidar-müxalifət anlayışı yoxdur. Kim bu çətin günümüzdə, Qarabağla bağlı məsələdə fərqli mövqe sərgiləyirsə, Azərbaycanın milli, dövlətçilik maraqlarına zərbə vurmuş olur. Hakimiyyətimiz arxayın şəkildə problemin üstünə getməlidir. Biz də müxalifət olaraq dövlətimizi, hakimiyyətimizi, zabitimizi, əsgərimizi müdafiə etməliyik. Bundan sonra kim istəsə müxalifliyini davam edə bilər. İndiki məqamda düşmən görməlidir ki, ölkəmizin ərazi bütövlüyünün təmin olunması üçün biz vahid mövqedən çıxış edirik. Bu bizə verilən bir şansdı. Çalışıb istifadə etməliyik. Azərbaycan hakimiyyəti də bilməlidir ki, daxili proseslərlə bağlı arxayın olub, problemin üzərinə gedə bilər. Ermənilər Rusiyadakı bəzi jurnalistlərin yazıları ilə bizə hədə-qorxu gəlir. Heç bir hədədən çəkinmək lazım deyil. Bizi də dəstəkləyən ciddi dövlətlər var. Biz heç kimdən çəkinmədən torpaqlarımızın işğaldan azad edilməsi prosesinə başlamalıyıq”.
Doğrudan da, bu cür taleyüklü məsələdə bütün siyasi qüvvələrin ortaya qoyduğu vahid mövqe hakimiyyətin əlini daha da gücləndirir. Ümummilli problemin həlli ilə bağlı dövlətçi mövqe nümayiş etdirmək həm də hamının borcu olan məsələdir.
Məhəmmədəli QƏRİBLİ
