05/08/2020 17:51
728 x 90

Dünya hərb tarixində az-az görünən fakt - Azərbaycan generalları səngərdə sıravi əsgərlərlə yanaşı düşmən üstünə gedir...

İbrahim Rüstəmli: “Bu, Azərbaycan ordusundakı döyüş ruhunun hansı səviyyədə yüksək olduğunu şərtləndirən amildir”

img

İyulun 13-dən 14-ə keçən gecə Tovuz rayonu ərazisində şiddətli döyüşlər zamanı Azərbaycan ordusunun yüksək rütbəli şəxsləri də şəhid olub. Verilən rəsmi məlumatda bildirilir ki, səhər saatlarında gedən döyüşlərdə general-mayor Polad Həşimov və polkovnik İlqar Mirzəyev qəhrəmancasına şəhid olub.

Müdafiə nazirinin müavini Kərim Vəliyev deyib ki, şəhidlərimizin qanı yerdə qalmayacaq:"Düşmənin canlı qüvvəsi, texnikası, komanda məntəqələri vurulur və məhv edilir. Düşməndən fərqli olaraq, bizim zabitlərimiz əsgərlərin arxasında gizlənmirlər və döyüş tapşırıqlarını ləyaqətlə yerinə yetirirlər. Təəssüflər olsun ki, döyüşlər itkisiz olmur. Müdafiə nazirliyinin rəhbərliyi adından şəhidlərimizə rəhmət diləyirik. Sizi əmin edirəm ki, şəhidlərimizin, yaralılarımızın qanı yerdə qalmayacaq”.

Nazir müavininin açıqlamasındakı “Düşməndən fərqli olaraq, bizim zabitlərimiz əsgərlərin arxasında gizlənmir və döyüş tapşırıqlarını ləyaqətlə yerinə yetirirlər” cümləsi xüsusilə diqqəti çəkir. Doğrudan da dünyanın hərb tarixində generalların döyüş zamanı əsgərlərlə eyni səngəri bölüşdüyü faktına nadir hallarda və az-az rast gəlinir. Bu amil Azərbaycan Ordusunun daha hansı üstün xüsusiyyətlərini ortaya çıxarmış oldu?

Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, əvvəla şəhid generalımızın ruhuna ehtiramını bildirmək istəyir:“Allahdan ona rəhmət diləyirəm.  General Polad Həşimov orduda təsadüfi adam deyildi. O öz şüurlu həyatını bütövlükdə Azərbaycan ordusunda xidmətə həsr etmişdi. Peşəkar hərbçi kimi həyatının mənasını vətənə xidmətdə tapmışdı. Bu səbəbdən də, o yalnız bir yaxşı insan, gözəl general kimi deyil, həm də qayğıkeş komandir kimi yaddaşlarda qalıb. Sadə dillə ifadə etsək, böyüklə-böyük, kiçiklə-kiçik kimi rəftar edirdi. Daima əsgərlərinin, zabitlərinin qayğıları ilə maraqlanardı. Bu səbəbdən də, onunla bağlı hamı ürək ağrısı ilə danışır, onun yoxluğuna inanmaq istəmirlər. Bəlkə də, general  Həşimov öz doğma övladlarına atalıq sevgisini o qədər hiss etdirə bilməmişdi, ancaq əsgərlərinə həmin sevgini bəxş edə bilmişdi. Cünki həyatının böyük hissəsini ailəsilə deyil, zabit və əsgərləri ilə keçirmişdi. Belə bir generalın həlak olması bizi bir tərəfdən kədərləndirirsə, digər tərəfdən qürurlandırmalıdır. Çünki hər orduya belə generallar nəsib olmur. Çox xoşbəxt bir taleyə sahib oldu ki, məhz şəhid kimi bu dünyadan köçdü. Belə generalın arzusu bu ola bilərdi. Biz  müharibə şəraitində olduğumuz üçün belə həlak olmaq zabit şərəfini daha da ucalara qaldırır. Biz fəxr edirik və şərəf duyuruq ki, Azərbaycan dövləti belə bir general yetişdirə bilib. Bəli, general Həşimov daima cəbhənin ön sıralarında olub. Hər zaman əməliyyat şəraitini şəxsən öyrənərdi, özü səngərlərə baş çəkərdi. Vətənə tuşlanmış gülləyə sinəsini sipər etməklə, elə əsgərlərinin yanında da adını əbədiyyətə qovuşdurdu.  Bu, Azərbaycan ordusundakı döyüş ruhunun hansı səviyyədə yüksək olduğunu şərtləndirən amildir. Biz yayılan videolardan görürük ki, erməni zabitlər postları tərk edib qaçırlar. İndi müqayisəni özünüz aparın”.

Doğrudan da general Həşimovun hansı hörmətə sahib olduğunu biz onunla bağlı insanların bölüşdüyü xatirələri ilə tanış olarkən bir daha kəşf etdik. Allahdan Azərbaycan ordusunun başını daha da uca edən belə şərəfli generalımıza rəhmət diləyirik.

Məhəmmədəli QƏRİBLİ

Son xəbərlər