05/08/2020 17:41
728 x 90

Ermənistanın “Azərbaycan dinc sərhəd kəndləri ilə müharibə aparırır” təbliğatı puça çıxır...

Azər Həsrət: “Azərbaycan ordusunun hədəfi dinc erməni əhalisi deyil və bizim ordumuz əhaliyə silah tuşlamır”

img

Ermənilərin yalançı təbliğat maşını dayanmadan işləsə də, amma bu işğalçı ölkənin mənfur simasını, qara niyyətlərini, saysız təxribatlarını ört-basdır edə bilmir. Azərbaycan-Ermənistan dövlət sərhəddinin Tovuz istiqamətində ermənilərin təxribatı hələ də davam edir.

Erməni təxribatı yalnız dinc əhaliyə ağır artileriya silahlarından atəş açmaqla bitmir, onlar yalandan məlumatlar yayırlar ki, guya Tovuzun cəbhə bölgəsindəki kəndlərin əhalisi ermənilərin qorxusundan (?) kəndlərini, ev-eşiklərini tərk edir (?). Əlbəttə, bu yalandan və təxribatdan başqa bir şey deyil. Cəsur tovuzluların hər biri düşmənlə açıq mübarizə aparmağa hazır olduqlarını günü bu gün də bəyan edirlər. Tovuzlular evlərindədir, amma sosial şəbəkələrdə ermənilərə məxsus hesablarda Azərbaycanla sərhəddə yerləşən erməni kəndlərindən əhalinin qaçıb getməsi barədə real məlumatlar, fotolar, videolar paylaşılır.

Ekspertlərin fikrincə, heç şübhəsiz, təxribatçı Ermənistan hakimiyyəti öz hərbi-siyasi cinayətkarlığından diqqəti yayındırmaq üçün ermənilərin yaşadıqları kəndləri tərk etməsini Azərbaycanla bağlamağa cəhdlər edəcək və belə bir rəy yaratmağa çalışacaq ki, guya ki, Azərbaycan ordusunun hədəfi dinc sakinlərdir, sakinlər də ona görə bu addımı atır. Azərbayan ordusunun dinc ermənilərə güllə atmadığı məlumdur. Amma ermənilər həmişə, günü bu gün də cəbhə bölgəsində yaşayan dinc sakinlərə, vətəndaşlarımıza güllə atır, onları öldürür, evlərini dağıdır, əkin sahələrini viran qoyurlar.

Siyasi şərhçi Azər Həsrət bizimlə söhbətində bildirdi ki, bu ermənilərin növbəti təxribatından başqa bir şey deyil. “Əlbəttə, bu növbəti erməni təxribatıdır. Ermənilərin təxribatçı təbliğat maşını gecə-gündüz işləyir. Amma artıq onların üsul və metodları tükəndiyi üçün daha heç bir effekt vermir. Məsələn, ermənilər Tovuzdan camaatın “qaçması” ilə bağlı paylaşımlar etdilər. O kadrları mən də görmüşəm, orada camaat qaçmır, əksinə Tovuzun başqa kəndlərindən olan sakinlər də döyüş bölgəsinə gələrək bir  yerə yığışıb “bizə silah verin erməniyə qarşı vuruşaq” deyirlər. Bizə qarşı təxribat həyata keçirən ermənilərin özlərinə gəlincə isə erməni höküməti özü məqsədli şəkildə əhalini cəbhəyanı kəndlərdən çıxarır, bu da onlara uyğun təxribat taktikasıdır. Azərbaycan ordusunun hədəfi dinc erməni əhalisi deyil və bizim ordumuz əhaliyə silah tuşlamır. Bunu bütün dünya bilir. 

Bizim əlimizdə isə sosial mediada yayılan faktlar var ki, erməni ordusunun əsgər və zabitləri mövqelərini qoyub qaçırlar, hökümət polis gücünə o hərbiçiləri tutub yerlərinə qaytarmağa çalışır. Biz erməni hərbiçilərinin qorxaraq qaçdığını əks etdirən belə videolar, görüntülərin şahidi oluruq. Bütün dünya onların qorxaqlığını görür. Bir ölkənin hərbiçiləri mövqeyini qoyub qaçırsa, demək o ölkə bərbad vəziyyətdədir, onların ordusu, əsgəri, zabiti qorxaqdır. Azərbaycan tərəfi haqqında isə bunun heç birini demək olmaz. Azərbaycanın ən yüksək rütbəli generallarından biri, eyni zamanda da onunla birgə silahlı qüvvələrimizin digər yüksək rütbəli zabitləri şəhid oldu. Bununla Azərbaycan tərəfi göstərdi ki, bizim istər sıravi əsgərimiz, istərsə də, generalımız düşmən qarşısına birgə çıxacaq qədər ürəklidir. Yəni bizdə heç kim kənarda oturub sadəcə “döyüşü idarə edim” deyə düşünmür, hamı sinəsini sipər etməyi bacarır”-deyə A.Həsrət vurğuladı.

İradə SARIYEVA

Son xəbərlər