“Radikalizmə qarşı mübarizə daha geniş aparılmalıdır. Parlamentin rolu burada vacibdir”. Bunu Prezident İlham Əliyev Milli Məclisin ilk iclasındakı geniş çıxışında deyib.
Ölkə başçısının fikrincə, əvvəlki parlamentin bu məsələyə münasibəti yetərli səviyyədə olmayıb: “Bununla bərabər, biz Azərbaycanı müasir, dünyəvi dövlət kimi gücləndirməliyik. Dünyəvilik prinsipləri daha geniş bərqərar olmalıdır. Radikalizmə qarşı mübarizə daha geniş aparılmalıdır. Parlamentin rolu burada vacibdir. Ancaq, sözün düzü, xatırlamıram ki, bu məsələ ilə bağlı əvvəlki dövrdə parlamentdə ciddi söhbət aparılsın. Biz aparmalıyıq. Heç bir bağlı mövzu olmamalıdır. Çünki bizim gələcəyimiz bundan asılıdır. Biz 20 il, 30 il, 50 il sonra hansı dövlətdə yaşamaq istəyirik. Biz bilirik və xalq da bilir. Amma bunu təmin etmək lazımdır. Əgər oturub nəyisə gözləyəcəyiksə, böyük problemlər yarana bilər. Ona görə biz bu sahədə də öz siyasətimizi təmin etməliyik, bizim siyasətimizin üstünlüyünü göstərməliyik və müqayisə etməliyik, çəkinmək lazım deyil. İstənilən tərəflə müqayisə etmək üçün kifayət qədər arqumentlərimiz var, təhlükəsizlik, əminamanlıq, inkişaf, sosial rifah, azadlıqlar. Ona görə parlament bu məsələlərlə ciddi məşğul olmalıdır”.
Görünən odur ki, əvvəlki parlament radikalizmə qarşı mübarizədə yetərincə mövqe ortaya qoymayıb. Hansı ki, parlamentin bu məsələdə aktiv mövqe sərgiləməsi çox vacibdir. O baxımdan yeni parlamentin radikalizmə qarşı mübarizəsi nə formada olmalıdır? Bununla bağlı parlament gözləntilərdən nəticə çıxaracaqmı?
“Millət vəkilləri bu kimi məsələlərdə aktiv mövqedən çıxış etməlidirlər”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, parlament həm yerli, həm də xarici müstəvidə radikalizmə qarşı mübarizədə fəal mövqe sərgiləməlidir: “Parlament toplantılarında radikalizmlə mübarizə məsələləri daim diqqət mərkəzində olmalıdır. Radikalizmlə bağlı istənilən meyllərə, lazım gələrsə, Milli Məclis reaksiya verməlidir. Bununla bağlı qanunvericilik zamanın tələbinə uyğun olaraq təkmilləşdirilməlidir. Digər tərəfdən, xaricdə Azərbaycanı təmsil edən millət vəkilləri, ilk növbədə, ölkəmizin maraqlarına cavab verən fəaliyyətlə məşğul olmalıdırlar. Bu fəaliyyəti terrorizmə, ekstremizmə, radikalizmə qarşı mübarizədə ortaya qoymalıdırlar. Məsələ ondadır ki, Azərbaycana qarşı müxtəlif dairələr var. Təkcə ermənipərəst dairələr bizə qarşı fəaliyyət göstərmirlər. Eyni zamanda, radikalizmə yaxın siyasi qruplaşmalar Azərbaycana qarşıdır. Fikrimcə, parlament belə dairələrə qarşı seyrçi mövqedə qalmamalıdır. Fəal mövqe sərgiləməli və həmin dairələrin fəaliyyətini ifşa etməlidir. Millət vəkilləri bu kimi məsələlərdə aktiv mövqedən çıxış etməlidirlər. Azərbaycana qarşı görürsən ki, radikal dairələr müxtəlif siyasi bəyanatlar verirlər. Hesab edirəm ki, parlament belə hallara qarşı adekvat fəaliyyət göstərməlidir. Bizə qarşı yönələn istənilən radikal məzmunlu siyasi təxribata cavab verilməlidir. Hesab edirəm ki, bu, parlament adından xaricə gedən nümayəndə heyətlərinin əsas vəzifəsinə çevrilməlidir. Həm şifahi, həm də yazılı formada təbliğat aparılmalıdır. Bir sözlə, parlament bütün mənalarda radikalizmlə mübarizədə fəal olmalıdır”.
Vidadi ORDAHALLI
