"Cəzalıyam sevdiyim qıza" - tanınmış şair-publisist, əməkdar jurnalist Əbülfət Mədətoğlunun növbəti kitabı belə adlanır. Bu günlərdə "Heroqlif" nəşriyyatında çapdan çıxan kitabda şairin son illər qələmə aldığı ürək titrədən poetik nümunələri yer alıb. Nilufər çiçəyi kimi zərif duyğular üzərində pərvəriş tapan şeirlər şair ürəyinin mərhəm pıçıltılarıdır. Şair ürəyini oxucudan başqa kimə aça bilər ki?!
Ə.Mədətoğlu özünəməxsus bir şairdir. Nə özündən əvvəlkiləri, nə də çağdaşlarını qətiyyən təkrar etmir. Buna əyani misal onun bənzərsiz poeziyasıdır. Şair Trabzonda yazdığı bir şeirdə insan ürəyinin mübhəm duyğularına toxunur:
Bu gecə yadında qalacaq yəqin,
Bir az xatirə tək, bir az yuxu tək.
Ruhun səksənəcək çəkəndə mənim-
Sevgimdən nümunə kövrək duyğu tək.
Bu misraları həyəcansız oxumaq olmur. Hər sözü bir həyəcan kəməndidir oxucu ürəyinə. Şair sözü əfsanə deyil sözsüz ki, yaşantını heykəlləşdirməyə qadir bir qüvvədir. Bəli, söz böyük qüvvədir. Sözün yaratdığını qılınc, top-tüfəng dağıda bilmir. Şairin söz qalasını uçurmaq, yerlə-yeksan etmək çətin məsələdir. İllah da ki, sözün hər kərpici sevgidən olanda.
Ürəyimin gözlərini
Ürəyinə elçi saldım...
Ürəyinin gözlərindən
Ürəyimə imza aldım.
Ə.Mədətoğlunun sevgiyə, sevgiliyə sözdən biçdiyi don qüssə rəngindədir. Havası da, ruhu da bir başqadır bu sevginin. Bəlkə də heç şairin konkret ünvanı yoxdur, sadəcə, xəyallarında yaradıb sevgi köynəyi geydirdiyi platonik bir kimsəyə tutub üzünü. Hər kimə tutubsa, uğuru mübarək olsun!
Nəşrin anatasiyasında maraqlı təqdimat qeyd edilib: "Daha bir görüş: Ə.Mədətoğlu yenə köhnə koordinatda, köhnə dalğada təzə-tər şeirləri ilə onu gözləyənlərin qapısını döyür. Zəhmət deyilsə, açın qapınızı". Dəyərli oxucular, şairin yeni kitabına könül qapılarınız açın.
Ə.Mədətoğlunun "Cəzalıyam sevdiyim qıza" şeirlər toplusunu həqiqətən də oxumağa dəyər. Sözü köhlənindən endirib onu "əfsanə" sanmaq istəyənlərə də bu kitabda layiqli cavab var. Söz də sevgi kimidir, heç zaman köhnəlməyən, hər gün yenidən doğulan, yeni libas geyib şahanə atına süvar olan.
Uğurlar, Ə.Mədətoğlu, yeni kitabınız mübarək!
İradə SARIYEVA
