Bir neçə həftə əvvəl tanınmış şair-drmaturq, Prezident təqaüdçüsü, Azərbaycan Yazıçılar Birliyinin üzvü Ramiq Muxtarın "Mənim oyaq yuxularım" adlı povesti kitab şəklində işıq üzü görüb. Oxucuların silsilə şəklində "Səs" qəzetində izlədiyi povest olduqca maraqlıdır. R.Muxtarın siyasi povest janrında qələmə aldığı kitab 13 "yuxu"dan ibarətdir.
Müəllifin tarixi faktlar əsasında yazdığı "yuxu"ların qəhrəmanları tarixi şəxsiyyətlərdir. "Mənim oyaq yuxularım"da yazarın birinci "yuxu"sunun qonağı I Pyotr, ikinci "yuxu"sunun qonağı erməni katalikosu I Vazgen, üçüncü "yuxu"sunun qonağı İ.V.Stalin, dördüncü "yuxu"sunun qonağı Əbülfəz Elçibəy, beşinci "yuxu"sunun qonağı Turqut Özal, altıncı "yuxu"sunun qonağı Minsk Qrupu, yeddinci "yuxu"sunun qonağı Məhəmməd Füzuli, səkkizinci "yuxu"sunun qonağı əməkdar idman ustası Ələkbər Məmmədov, doqquzuncu "yuxu"sunun qonağı Eduard Şevardnadze, onuncu "yuxu"sunun qonağı atası Muxtar kişi, on birinci "yuxu"sunun qonağı aşıq Şəmşir, on ikinci "yuxu"sunun qonağı Mikayıl Müşfiq, on üçüncü "yuxu"sunun qonağı isə Şeyx Nəsrullahdır.
Yumor dili ilə qələmə alınan "yuxu"larda oxucu həm düşünür, həm tarixə nəzər salır, həm də olub keçənləri saf-çürük edir, bəzən də qeyri-ixtiyari olaraq dodaqları qaçır.
R.Muxtarın olduqca səlist, oxunaqlı dili var və birinci "yuxu"nu oxumağa başlayırsan, kitaba elə dalırsan ki, bir də görürsən artıq on üçüncü "yuxu"dasan. Müəllif qəhrəmanlarını "yuxu"da görür və onlarla atası - rəhmətlik Muxtar kişinin vasitəsilə ünsiyyət qurur. Adlarını çəkdiyimiz tarixi şəxsiyyətlərin xalqımızla bağlı həyata keçirdiyi yaxşı və pis əməllər hamısı öz dillərindən verilir. Siyasi motiv üzərində qurulan hər bir hekayət özlüyündə bir həyat dərslidir. Tarixçilərin indiyə qədər üzə çıxarmadığı elə faktlar var ki, onlar bu kitabda əks olunub.
Qeyd edək ki, nəşrin redaktoru yazıçı-publisist İlham Əliyevdir.
İradə SARIYEVA
