Aytəkin Kamranqızı: "Qobustan qayaüstü təsvirləri rəngarəngliyi ilə dünyanın azsaylı bənzər abidələri sırasında xüsusi yer tutur"
Keçən il Qobustan Milli Tarix Bədii Qoruğunu təxminən 100 minə yaxın insan ziyarət edib. Bunu jurnalistlərə açıqlamasında mədəniyyət və turizm naziri Əbülfəs Qarayev deyib.
Onun sözlərinə görə, Qobustana gələn turistlərin sayı ötən dövrlərə nisbətən xeyli çoxalıb: "Bu gün paleolit dövründən qalan qayaların üzərində yazılan yazılar, rəsmlər dünyada çox nadir hallarda tapılır. Dünyada bu cür məkanların şəbəkəsi mövcuddur. Azərbaycan artıq Qobustanla bu şəbəkəyə daxil olaraq bütün dünyaya nümayiş etdirir ki, bəşəriyyətin ilk məkanları olan torpaq, yer Azərbaycanda yerləşir".
Nazir əlavə edib ki, bütün turist şirkətləri Qobustana səfəri öz turizm paketlərinə daxil edir. Ə.Qarayev deyib ki, Qobustan muzeyi Avropanın ən yaxşı muzeyləri sırasına daxil olub.
Qobustan muzeyinin Avropanın ən yaxşı muzeyləri sırasına daxil olmasını ekspertlər də müsbət dəyərləndirir.
Sosioloq Aytəkin Kamranqızı bizimlə söhbətində bildirdi ki, Qobustan muzeyinin Avropanın ən yaxşı muzeyləri sırasına daxil olması gözlənilən idi: "Çünki burada olan daşlar və onların üzərinə həkk olan rəsmlər xaricilərin diqqətini cəlb edir. Həmin rəsmlərin tək bir məna deyil, müxtəlif məna daşıması da əcnəbilərin marağına səbəb olur".
Həmsöhbətimizin sözlərinə görə, son illər Qobustan muzeyini ziyarət edənlərin sayı artır: "Ölkəmizdə keçirilən beynəlxalq əhəmiyyətli tədbirlərə və yarışları izləməyə gələnlər, təbii ki, bizim tariximizlə maraqlanır. Qobustanda isə bizim tariximiz həkk olunub".
A.Kamranqızının sözlərinə görə, illər öncə də dünyaca tanınmış alimlər Qobustan qayaları ilə bağlı öz fikrini bildirib: "Ömrünün yarıdan çoxunu dünyadakı bənzər təsvirlərin tədqiqinə həsr edən məşhur norveçli alim və səyyah Tur Heyerdal Qobustan qayaları qarşısında heyrətini gizlədə bilməyib. O, abidə haqqında maraqlı fikirlər söyləyib. Alim bildirib ki, Qobustan kökləri çox qədimlərə gedib çıxan və hətta Mesopotamiyadan daha qədim, dəqiq tarixi indiyə qədər məlum olmayan mədəniyyət incisidir. Məşhur alim Qobustandakı qayaüstü rəsmlərin tam oxşarının Skandinaviyadakı daş mağaralarda da olduğunu bildirib".
Həmsöhbətimiz onu da əlavə etdi ki, Qobustan qayaüstü təsvirlərinin rəngarəngliyi ilə dünyanın azsaylı bənzər abidələri sırasında xüsusi yer tutur.
Günel CƏLİLOVA
