Parisdə Xalq şairi Vaqif Səmədoğlunun xatirəsi yad olunub. Paris Azərbaycan Evi və Səməd Vurğun Ev Muzeyinin təşkilatçılığı, Azərbaycanın Fransadakı Səfirliyinin dəstəyilə təşkil olunmuş xatirə gecəsində şairin fransız dilinə tərcümə olunmuş "Bir gün təbəssüm olmuşdum" adlı şerlər toplusu təqdim olunub.
Xatirə gecəsi Parisdə yerləşən Azərbaycan Mədəniyyət mərkəzində keçirilib. Tədbiri Paris Azərbaycan Evinin sədri, Azərbaycanın Dostları Assosiasiyasının baş katibi Mirvari Fətəliyeva açaraq, ilk öncə təşkilatın fəaliyyəti və tədbirin məqsədi barədə qonaqlara məlumat verib. O, Vaqif Səmədoğlunun Azərbaycan poeziyasında özunəməxsus yer tutduğunu, atası, məşhur söz ustası Səməd Vurğunun poeziyasından qaynaqlansa da, onun şeir tərzini təkrarlamayaraq yeni bir tərz yaradıcısı olduğunu vurğulayıb.
Daha sonra Azərbaycanın Fransadakı səfiri Elçin Əmirbəyov çıxış edərək, Vaqif Səmədoğlunun, sovet dövründə yaşayıb-yaratmasına baxmayaraq, öz şeiri ilə maneələri aşaraq fikrini hər zaman ifadə etməyi bacardığını və məhz buna görə xalqın geniş rəğbətini qazandığını deyib. Səfir şairin məşhur "Doğuldum 1939-da, 1937-də tutuldum" misralarını misal gətirərək, onun hər zaman xalqının azadlığa qovuşması arzusu ilə yaşayıb-yaratdığını bildirib.
Gecədə bir çox fransız incəsənət xadimləri, şairlər, yazıçı-publisistlər, jurnalistlər iştirak edib. Şairin yaradıcılığı ilə tanış olan yazıçı-publisist Jan Pyer Alali Azərbaycan poeziyası, görkəmli xadimləri və Vaqif Səmədoğlunun şeirləri haqqında təəssüratlarını tamaşaçılarla bölüşüb.
Daha sonra tarixçi, şair, 25 ildən artıq poeziyaya həsr olunmuş radio proqramının müəllif və aparıcısı olan Paskal Payen-Appenzeller çıxışını dahi Nizaminin misraları ilə başlayaraq hər birimizin öz mədəni sərvətimizin daşıyıcısı olduğumuzu və Vaqif Səmədoğlunun da məhz əcdadlarından miras qalan bir vergisi olduğunu deyib. Şeirlərinin dərin fəlsəfi mənası ilə bizi inam axtarışına, səyahətə, şəfqət və yaxşılığa çağırdığını ifadə edib. Şairin sənətinə heyran olan Payen Appenzeller hətta yaxin zamanda canlandırdığı poeziya verilişlərindən birini Vaqif Səmədoğluna həsr edəcəyini bildirib.
Sonra şairin həyat yoldaşı, Səməd Vurğun ev muzeyinin direktoru Nüşabə Vəkilova şairlə bağlı xatirələrini bölüşüb, onun həyat və yaradıcılıq yolundan danışıb, yaşadığı dövrün çətinliklərinə baxmayaraq, daxili azadlıq səsini, demokratik düşüncələrini özünəməxsus üslubda qələmə aldığını və hər zaman sevilə-sevilə oxunduğunu qeyd edib. Nüşabə Vəkilova şairin fransızca dərc olunmuş şeirlər toplusunun ərsəyə gəlməsində əvəzsiz rolu olan tərcüməçi Aliyə Səmədovaya dərin təşəkkürünü bildirib.
Xatirə gecəsi boyunca şairin həyat və yaradıcılğından söhbət açılıb, şeirləri və sözlərinə yazılmış mahnılar səsləndirilib, şairə həsr olunmuş film izlənib.
Gecə gənc pianoçu Vurğun Vəkilovun ifasında Azərbaycan və Avropa klassik bəstəkarlarının musiqisindən ibarət konsert proqramı ilə davam edib.
Baki-xeber.com
