Bu günlərdə cavidşünas alim, professor Əjdər Tağıoğlunun (İsmayılovun) 1983-cü ildə "Elm" nəşriyyatı tərəfindən çap edilmiş cavidşünaslıqda mühüm yer tutan "Dünya romantizm ənənələri və Hüseyn Cavid" adında kitabı oxucuların tələbi nəzərə alınaraq latın qrafikası ilə "Elm və təhsil" nəşriyyatında nəfis şəkildə yenidən çapdan çıxarılaraq cavidsevərlərin ixtiyarına verilibdir.
Ədəbiyyatşünaslığımızda aparıcı nüfuza malik görkəmli alimlərimiz bu monoqrafiyaya qədər Azərbaycan romantizminin yaranmasını 1905 - 1917 - ci ildə baş vermiş tarixi hadisələrlə əlaqələndiriblər. Problemə bu mövqedən yanaşma Hüseyn Cavıd romantizmini bir istiqamətdə Nizami ilə başlanan klassik fəlsəfi romantik poeziyanın ənənələrindən məhrum edir, ikinci bir istiqamətdə mütəfəkkir şairin dünya ədəbiyyatının nəhəng korifeyləri Şekspir, Bayron, Şiller, Höte və başqa dünya şöhrətli nəhəng korifeyləri ilə bir sırada dayanmaq hüququnu məhdudlaşdırırdı.
Müəllif ona görə də Hüseyn Cavid romantizmi kontekstində dünya ədəbiyyatının romantik korifeyləri arasında tipoloji araşdırmalar aparır və Azərbaycan romantizmini dünya romantizminin tərkib hissəsi kimin təhlilə çəkir.
