"Qəlbinin aynası"ndan boylanan şairin kitabı çap olundu
Əsl şeir həm əyalətdə, həm də paytaxtda yarana bilir. Yetər ki, ürəyin dolu, ilhamın bol olsun. Borçalı mahalının Dəllər kənd məktəbində uzun illərdir Azərbaycan dili və ədəbiyyatı fənnini tədris edən, eyni zamanda da şeirlər yazan Əmirxan Abdullaoğlunun "Qəlbimin aynası" adlı kitabı işıq üzü görüb.
Şairin illər boyu etdiyi müşahidələr, düşüncələri sayəsində meydana gələn şeirlər toplusunda o, oxucu ilə "Ezop dili"ndə danışmağa üstünlük verir. Kitabın maraqlı cəhətlərindən biri burada təmsillərə geniş yer verilməsidir. Nəzərə alsaq ki, bu gün təmsil yazan şairlərimiz çox azdır, onda bu kitabı sözügedən sahədə bir uğur kimi dəyərləndirə bilərik.
Ə.Abdullaoğlu savadlı bir ədəbiyyat müəllimi, hörmətli ziyalı kimi cəmiyyətdə baş verən hər bir hadisəyə təmsilləri vasitəsilə reaksiya verməyi bacarır.
"Qəlbimin aynası" kitabına ön söz yazan qocaman müəllim, Borçalı bölgəsində tanınan ziyalı Təhməz Abbasov çox böyük mətləblərə toxunur. Müəllimlər müəlliminin öz keçmiş şagirdi haqqında söylədiyi fikirlər çox dəyərlidir: "Qəlbimin aynası" şairin daxili aləminin, ülvi duyğularının aynasıdır. Bu "ayna"da toplanan şeirlərdə sərt tənqid, yumorist gülüş, hikmətli nəticə, ağıl, kamal özünəməxsus yer tutur. Şair oxucusuna haqqın, düzlüyün, təmizliyin yolu ilə getməyi məsləhət görür".
Agah ol hər işdən, ey insan oğlu!
Həyatda düz yaşa, tut düzgün yolu.
Hər gizlin işləri Tanrı biləndir,
Düzü və əyrini özü görəndir.
"Qəlbimin aynası" kitabının işıq üzü görməsi münasibətilə Ə.Abdullaoğlunu təbrik edir, ona yeni yaradıcılıq uğurları arzu edirik.
İradə SARIYEVA
