Mayın 12-dən başlayaraq paytaxtımızda IV İslam Həmrəyliyi Oyunları həyəcanı yaşandı. Ölkəmizin idman və ictimai həyatı üçün böyük əhəmiyyət daşıyan İslamiada ancaq idmançılarımızın böyük uğurları ilə yadda qalmadı, həmçinin, Azərbaycanın nəinki İslam dünyası üçün, hətta bütün dünya üçün vacib bir dövlət olduğunu ortaya qoydu.
Bu oyunlar sivilizasiyaların toqquşması ideyasını irəli sürən bəzi beynəlxalq dairələrə sivilizasiyaların, mədəniyyətlərin təmsilçilərinin birgə yaşamasının vacibliyini bir daha təsdiqlədi.
İslamiadanın Bakı şəhərində keçirilməsi xalqımız, dövlətimiz üçün böyük əhəmiyyət kəsb edir.
Azərbaycanın yaradıcı insanları da bu oyunlara biganə qalmadı, hər kəs öz sahəsində bu oyunlara dəstək nümayiş etdirdi.
Azərbaycan Rəssamlar İttifaqının üzvü, tanınmış keçəçi rəssam Rauf Əbdülhüseynoğlu İslamiada ilə bağlı keçə üzərində maraqlı əsərlər yaradıb. Onun "Facebook" hesabında təqdim edilən bu əsərlər diqqətimizi çəkdi. R.Əbdülhüseynoğlu bununla bağlı "Bakı-Xəbərə açıqlamasında bildirdi ki, bir rəssam kimi, bu oyunlara münasibət bildirməyi özünə borc bilib: "Bir müddət əvvəl Azərbaycan Respublikasının Mədəniyyət və Turizm Nazirliyi və Azərbaycan Rəssamlar İttifaqı IV İslam Həmrəyliyi Oyunları ilə bağlı rəssamlar arasında müsabiqə elan etmişdi. Bu müsabiqəni İslamiadaya verilən böyük töhfə kimi qəbul edirəm. Bu müsabiqədə İslamiadaya həsr etdiyim əsər birinci yerə layiq görüldü. Hazırda Rəssamlar İttifaqının Vəcihə Səmədova adına Sərgi Salonunda İslamiada ilə bağlı rəssamların əsərləri sərgilənir, istəyən şəxs gedib tanış ola bilər.
Ümumiyyətlə, bir rəssam kimi, idman mövzusu məni həmişə özünə cəlb edib. Bu səbəbdən də dəfələrlə idman mövzusuna müraciət etmişəm. Məlumat üçün deyim ki, 2015-ci ildə Bakıda keçirilən İlk Avropa Oyunları ilə də bağlı əsərlər çəkmişəm. Bir dəfə cənab Prezidentin diplomuna layiq görülmüşəm. Bilirsiniz ki, Prezidentimiz Milli Olimpiya Komitəsinin prezidentidir. Avropa Oyunları ilə bağlı müsabiqədə III yeri tutmuşam. İdmana hədsiz marağım həmişə olub, özüm də idmanla məşğul olmuşam. Hələ sovet dövründə Mingəçevir Kür idman bazasında idmana aid divar rəsmləri çəkmişəm. İslamiada ilə bağlı müsabiqəyə gəlincə, elanı gördüm və iştirak etmək istədim. Amma vaxtımız çox az idi. Bir ay yarıma bu əsəri çatdırmalı idim. 13 kvadratmetr ərazisi olan kiçik emalatxanamda bu işi ərsəyə gətirdim. Çox monumental bir işdir. Bu iş üzərində çalışanda hətta bir həftə evə getmədim və gecə-gündüz onun üzərində işlədim. Bu rəsm əsərini keçə üzərində işləmişəm. Əsəri görmüsünüz. Əsər üzərində sülh simvolu olan göyərçinin təsvirini vermişəm. Hər bir rəssamın, sənətkarın borcudur ki, dövlətin gördüyü işə dəstək versin. Əslində, bu işi müsabiqə naminə etməmişəm, ürəyimdən gəlib etmişəm. Bu işdə hər kəs öz sözünü deməlidir. İdmançı oyuna öz iştirakı, qələbəsi ilə münasibət bildirir, sənətkar da öz əsəri ilə. Kompozisiyada islam dini, sülh, əminamanlıq, həmrəylik vəhdət təşkil edib. Biri var bir idman növünü götürüb işləyəsən, biri də var bütün idman növlərini əhatə edəsən. Mən hamısını əhatə edə bildim".
Keçəçi rəssam qeyd etdi ki, əsərin sağ tərəfində Məhəmməd Peyğəmbərin (ə) siluetini verib, təsvirdə o, əlini sağ tərəfə uzadıb sülhün beşiyi olan Bakını göstərir. Rəssam əsərin sağ tərəfində günəş, göyərçin təsvir edib, triptixtin sol tərəfində isə Qobustan, aşağısında isə Atəşgah, Qız qalası təsvir olunub: "Göstərmişəm ki, oyunların keçirildiyi Azərbaycan qədim dövlətçilik ənənələri olan bir dövlətdir. Təsvirlərin içindən göyərçin çıxır, o da sülhün rəmzidir. Göyərçin isə ortaya - oyunların mərkəzinə tələsir. İslam Oyunları dörd qitəni birləşdirdiyi üçün, dörd qitənin rəngində göyərçin təsvir etmişəm. Fikirləşdim ki, orta hissədə iki idmançı - qadın və kişi siluetini yaradım. Kompozisiyanın yanlarında isə idman növlərini vermişəm. Mən daxilimdə olanları köçürmüşəm. Rəssam üçün mövzu məhdudiyyəti olmamalıdır. Rəssam hər sahədə özünü göstərməlidir. Hesab edirəm ki, hər bir rəssam günün tələblərinə cavab verən əsərlər çəkməlidir. Belə düşünürəm".
İradə SARIYEVA
