Təbrizin məşhur "Dalğa" musiqi qrupu Bakının qonağıdır. Qrupun rəhbəri, tanınmış aşıq Çingiz Mehdipur "Eurasia Diary" portalına müsahibəsində bildirib ki, səfərin məqsədi mayın 24-ü saat 19:00-da Heydər Əliyev Sarayında aşıq musiqisini sevənlərə maraqlı konsert proqramı təqdim etməkdir.
Çingiz Mehdipurun sözlərinə görə, bu konsert digərlərindən özəlliyi ilə fərqlənəcək: "Konserti təşkil etməkdə məqsəd aşıq musiqisinə yeni baxışı təqdim etməkdir. Bu konsertdə aşıq sənətinin gücünü, potensialını, açılmamış sirlərini göstərmək niyyətindəyik".
Xatırladaq ki, Təbrizin məşhur "Dalğa" musiqi qrupu 1990-cı ildə yaradılıb. Bu müddət ərzində qrup 30-dan çox ölkədə konsert proqramları ilə çıxış edib.
Qeyd edək ki, qrupun rəhbəri Çingiz Mehdipur ilk dəfə bu sənətə elmi yanaşaraq, aşıq musiqisini, saz havalarını nota köçürüb. O həm də aşıq musiqisində yeni aranjemanda çıxış edir.
Çingiz Mehdipur və onun məşhur "Dalğa" musiqi qrupu aşıq musiqisi sevənləri mayın 24-ü Heydər Əliyev Sarayında keçiriləcək maraqlı konsert proqramını izləməyə dəvət edir.
Konsertin biletlərini şəhərin kasalarından, "ASAN xidmət" mərkəzlərindən və iticket.az saytından onlayn əldə edə bilərsiz.
Baki-xeber.com
