Bu günlərdə yazıçı Vaqif Sultanlının seçilmiş əsərlərindən ibarət "Kor düyün" ("A Blind Tie. Selected Works") adlı kitabı Amerika Birləşmiş Ştatlarında (Rossendale books, Raleigh, NC, 2017) nəşr olunub. Bu barədə qəzetimizə V.Sultanlı məlumat verib.
Qeyd edək ki, kitaba müəllifin "İnsan dənizi" romanı, "Ölüm yuxusu" povesti, müxtəlif dövrlərdə qələmə aldığı hekayələri daxil edilib. Nəfis şəkildə hazırlanan 400 səhifədən ibarət kitab Cavid Abbasovun ingiliscə tərcüməsində, Michael Brannokun redaktəsində nəşr olunub.
Xatırladaq ki, bu, müəllifin ingilis oxucularına təqdim olunan ilk kitabı deyil. Bundan öncə yazıçının nəsr əsərlərindən ibarət kitabları İngiltərə, Amerika və Danimarkada nəşr olunub, habelə onun tərtibatında (Dr.İrəc İsmaeli ilə birlikdə) "Müasir Azərbaycan nəsri" (2012) və "Müasir Azərbaycan nəsri" antologiyası (2014) ingilisdilli oxuculara təqdim edilib.
Müəllifin yaradıcılığında xüsusi yer tutan "İnsan dənizi" romanında sovet siyasi rejimi dönəmində məhkum olunduğu ölüm cəzasından qurtularaq, yad bir şəhərdə gizli ömür sürən qəhrəmanın taleyi fonunda, cəmiyyətin əxlaqına və mənəviyyatına yoluxmuş özgələşmə problemi bədii həllini tapıb.
Real hadisələrlə şərti-metaforik üslubun qovuşuğunda təsvir olunan "Ölüm yuxusu" povestində isə məzarlığın köçürülməsi problemi insanların sosial-mənəvi həyatında baş verən ciddi xaos, çaxnaşma kimi canlandırılır.
Kitaba daxil edilən "Səhər dumanı", "Vətən", "Mağara", "Qütb gecəsi", "Kor düyün", "İlğım", "Yad", "Yarpaqsız budaqların yaşıl nəğməsi", "Tərs axın", "Kül qəfəs" hekayələri mövzu, problem, üslub və yazı tərzi ilə seçilməkdədir.
Bütövlükdə, kitaba daxil edilən əsərləri birləşdirən ümumi aspekt onların cəmiyyətə hakim olan mənəviyyatsızlaşma, yaddaşsızlaşma, biganələşmə probleminə etiraz ruhunun qabarıqlığı ilə seçilməsidir.
Onu da bildirək ki, kitabı www.amazon.com saytından sifariş yolu ilə əldə etmək olar.
İradə SARIYEVA
