Bu günlərdə sosial şəbəkələrdə "YouTube"də yerləşdirilən "Goranboylu biznesmen itlərinə toy etdi" videosu yayıldı. İctimaiyyətdə böyük əks-səda doğuran bu videoda narahatlıq və qınaq doğuran əsas məsələ burada aşıq və balabançının "Kəndimiz" mahnısının sədaları altında "İt insanların dostudur" adlı ifası ilə bağlı oldu. Sosial mediada "aşıq və balabançı itlərin toyunda iştirak edib" kimi iddialar meydana çıxdı.
Videoda ifası yer alan aşıq və balabançı "Facebook" istifadəçiləri tərəfindən şiddətli şəkildə tənqid edildi, hətta onlarla bağlı müəyyən təhqiramiz ifadələr də işlədildi. Bir sözlə, bu məsələ geniş müzakirə edildi və deyək ki, əksər sosial şəbəkə istifadəçiləri bu hala qarşı qınaq nümayiş etdirdi. Sazsevərlərin etirazına səbəb olan olayın yaranması və bizə məlum olmayan təfərrüatları meydana çıxıb.
Azərbaycan Aşıqlar Birliyinin Goranboy rayon filialının (Hüseyn Cavanın adını daşıyır-İ.S) rəhbəri, folklorşünas Elnur Baxış "Bakı-Xəbər" redaksiyası ilə əlaqə saxlayaraq yayılan videoya və aşıqlarla bağlı məsələyə aydınlıq gətirdi. E.Baxış bizimlə söhbətində qeyd etdi ki, videodakı görüntülər heç də tam olaraq həqiqəti əks etdirmir: "Yayılan videogörüntülər ətrafında yaranan müzakirə və ajiotaj bizi çox narahat edir. İnanın ki, burada itlərə toy edilməyib. O videoda olanların xeyli hissəsi montajdır. Rayonumuzda fəaliyyət göstərən sənaye zavodunun rəhbəri Qalib müəllimin ad günü idi. Aşıq və balabançı da ad gününə dəvət edilmişdi. Aşıq Şəmməd Məmmədov və aşıq-balabançı Haqverdi Əliyev o ad günündə iştirak edib. Ş.Məmmədov Qarabağ müharibəsində iştirak edib, veterandır. O, Aşıqlar Birliyinin üzvü deyil. Amma Haqverdi Kərəmoğlu həm balabançı, həm də aşıq kimi Birliyin üzvüdür. Haqverdinin atası balabançı Kərəm də tanınmış sənətkardır, bir çox ustad aşıqlarımızı balabanda müşayiət edib. Sözümün canı odur ki, həm Haqverdi, həm də Şəmməd xalq musiqisinə bağlı insanlardır və həmişə bu sənəti təbliğ edirlər. Qeyd etdiyim kimi, onlar Qabil müəllimin ad günündə iştirak etmək üçün ora gedib ifa ediblər. Burada Qalib müəllimin dostları da iştirak edib. İçki məclisində çox şey ola bilər. Bunu hər kəs bilir. Qalib müəllim özü içki içən deyil, çox mədəni, ziyalı bir adamdır, rayonumuzda böyük hörmətə malikdir. Məclisin sonuna yaxın zavodun itlərini baytar həkimdən gətiriblərmiş. Burada zarafat ediblər. Aşıq və balabançı itlər gələndə "Kəndimiz" mahnısını ifa edirmiş. Şəmməd zarafatla "İt insanların dostudur" deyə oxuyub. Haqverdi deyir ki, sonra ifanı yarımçıq saxlayıblar. O videonu kim çəkib, kim sosial şəbəkələrə ötürüb bilinmir. İnanın ki, itlərə toy-filan olmayıb. Aşıq nə üçün gedib belə yerdə iştirak etsin ki? Bu mümkünsüzdür? Videonu montaj ediblər. Üzərində it şəkli olan tortu, digər görüntüləri çəkilişə kimlərsə əlavə edib. İnanın ki, çox pis olmuşuq. Mən də, Ş.Məmmədov da, H.Kərəmoğlu da hədsiz dərəcədə narahatıq. Bu hadisə bizə çox pis təsir edib. Sosial şəbəkədə onların ünvanına təhqir dolu fikirlər işlədilir. Axı bizə ermənilər də baxır. Bunu yaymaq nəyə lazım idi? Ş.Məmmədov da, H.Kərəmoğlu da, mən də baş verənlərlə bağlı Azərbaycan xalqından üzr istəyirik. Montaj video aləmi qarışdırdı. Aşıqlarımızı başa düşmək lazımdır. Bir də deyirəm, itlərə toy-filan olmayıb, aşıqlar da Qabil müəllimin ad günündə ifa etmək üçün zavodun həyətinə gedib".
İradə SARIYEVA
