Xalq artisti Canəli Əkbərovun Mənsum İbrahimov, Arif Babayev, Səkinə İsmayılova, Əlibaba Məmmədov və Sərdar Fərəcov barədə son günlər mətbuatda işlətdiyi qeyri-etik ifadələr mədəniyyət sferasında böyük narahatlıq yaradıb.
Qeyd edək ki, həmkarları C.Əkbərovun qeyri-obyektiv olduğunu əsas gətirərək xalq artistinin Televiziya Muğam Müsabiqəsinin münsiflər heyətində təmsil olunmasına etiraz ediblər. Həmkarlarının münasibətinə qeyri-etik ifadələrlə cavab verən C.Əkbərovun fikirləri birmənalı qarşılanmayıb.
Xalq artisti M.İbrahimov həmkarı C.Əkbərovun onun barəsində səsləndirdiyi fikirlərə münasibət bildirərkən qeyd edib ki, o, C.Əkbərova qarşı ən kiçik hörmətsizlik belə etməyib. Xalq artistinin iştirakçılara qərəzli yanaşdığını deyən M.İbrahimov mətbuata bildirib: "Biz münsiflər olaraq - A.Babayev, S.İsmayılova, Ə.Məmmədov, S.Fərəcov, sadəcə, fikir bildirmişik. Biz nə onu təhqir etmişik, nə də artıq söz demişik. Biz ümumi olaraq C.Əkbərovun qeyri-obyektiv olduğunu demişik. Axı həm də münsifi biz seçmirik. Mən indiyədək 5 müsabiqədə münsif olmuşam. Bu müsabiqəyə məni Heydər Əliyev Fondu dəvət edib. Mən özbaşına orada münsif olmamışam. Bu da işlərim, xidmətlərim sayəsində baş verib".
C.Əkbərovun onun barəsində işlətdiyi ifadələrə də münasibət bildirən M.İbrahimov "İşlətdiyi təhqiramiz ifadələri nə insan, nə də xalq artisti olaraq C.Əkbərova yaraşdırmadım. Onun barəsində təhqirlər işlətdiyi insanlar ömürlərini sənətə həsr ediblər. Mən hesab edirəm ki, o, yaşlı adamdır və əsəbləri yerində deyil. Çünki dediklərinə başqa cür anlam verə bilmirəm. Sadəcə ayıbdır. Qaldı ki, etdiyi təhqirlərə, bu onun mənəviyyatının göstəricisidir. Əlavə də nəsə demək istəmirəm. Heç vaxt da onun barəsində təhqir işlətməmişəm. İndi də işlətməyəcəm" - deyə cavab verib.
M.İbrahimov C.Əkbərovun onun hərbi xidmətdən yayınması ilə bağlı fikirlərini absurd adlandırıb: "Biz yeddi qardaşıq. 3 qardaşım Qarabağ əlilidir, 3 qardaşım da Qarabağ veteranıdır. Mən özüm hər ay cəbhə bölgəsindəyəm. Aprel döyüşlərinin səhəri günü mən Ağdamdaydım. Mən cəbhədən qaçan adam deyiləm. Mənim valideynlərim, yaxınlarım cəbhə bölgəsində yaşayırlar. Bundan başqa, xalq hamını yaxşı tanıyır. Mən heç vaxt qalmaqala qarışmamışam, sənətimlə məşğul olmuşam. Mənim müəllimliyim, opera sahəsindəki fəaliyyətim də göz qabağındadır".
C.Əkbərovun görkəmli muğam ifaçılarına qarşı işlətdiyi sözlər mədəniyyət aləmində digərləri tərəfindən də birmənalı qarşılanmayıb.
Sənət adamlarının bir qismi belə düşünür ki, tənqid normal haldır, tənqidin təhqirlə əvəz edilməsi isə anormallıqdır.
Tanınmış kultroloq Aydınxan Əbilov bizimlə söhbətində bildirdi ki, sənət adamlarının, dövlət tərəfindən seçilən, fərqləndirilən sənətkarların bir-birinə qarşı təhqir işlətməsi doğru deyil. O hesab edir ki, bu cür insanlar gənclik üçün örnək olmalıdır: "İstənilən halda, təhqir işlədilməsi, mətbuatda qeyri-etik ifadələrin tanınmış bir şəxs tərəfindən işlədilməsi doğru iş deyil. Dövlətin qiymətləndirdiyi, fərqləndirdiyi, qayğı göstərdiyi, Heydər Əliyev Fondunun diqqətində olan sənətkarlar danışarkən diqqətli olmalıdır. Gərək Canəli müəllim səbrli olub mətbəx sirrini açmayaydı. Bu yolverilməzdir. Tənqid normaldır, təhqir yox".
Əməkdar artist Təyyar Bayramov qəzetimizə açıqlamasında qeyd etdi ki, Canəli müəllimin fikrinə hər hansı bir münasibət bildirmək fikri yoxdur: "Onlar hamısı böyük sənətkarlardır. Böyük əzab-əziyyətlə, zəhmətlə sənətə gəlib, sənəti təbliğ edib, onu zirvələrə qaldırıblar. Mənim böyüklər qarşısında danışmağa həddim yoxdur. Yəni onlar böyük sənətkarlardır. Mən heç kəsə yol göstərə bilmərəm. Bircə onu deyə bilərəm ki, təhqir olmamalıdır".
M.İbrahimovun yüksək sənətkarlıq və insanlıq keyfiyyətlərindən danışan T.Bayramov vurğuladı ki, o, bir insanlıq nümunəsidir: "Mənsum müəllim mənim ustadımdır. Mənə onun əməyi çox keçib. O, tələbələrinə hər zaman atalıq qayğısı ilə yanaşıb. Hətta başqa müəllimlərin tələbələrindən də qayğısını əsirgəməyib. Mənsum müəllim böyük şəxsiyyətdir. O qədər saf, dəyərli, nümunəvi, gözəl insandır ki, ona heç bir ləkə yaraşmaz. Canəli müəllimə gəlincə, o bizim ağsaqqal, ustad sənətkarımızdır. Ona yol göstərmək mənə yaraşmaz. Mətbuatdan xahişim odur ki, bu cür açıqlamaları, qeyri-etik ifadələrlə dolu olan fikirləri mətbuata çıxarıb ictimailəşdirməsinlər. Bu yaxşı hal deyil. Xalq olaraq bizə başucalığı gətirmir".
Xalq artisti Ramiz Məlik sosial şəbəkədə C.Əkbərova sərt fikrini bildirib. Movqe.az-ın məlumatına görə, R.Məlik C.Əkbərovun "Əlibaba Məmmədov tatar mollasına bənzəyir" ifadəsinə belə münasibət bildirib: "Canəli, sən artıq həddini aşırsan. Utan, sərhəddi keçmə, özünü biabır edirsən. Münsiflər heyəti səni öz sıralarında görmək istəmir. Deməli, sən oralara layiq deyilsən".
Aytəkin KƏRİMLİ
