Bir müddət əvvəl bağlanan "Azərbaycan" kinoteatrı yenidən fəaliyyətə başladı. "CinemaPlus" premium kinoteatrlar şəbəkəsi kimi fəaliyyət göstərəcək "Azərbaycan" kinoteatrı tamamilə yenidən qurularaq kinosevərlərin ixtiyarına verilib.
"Azərbaycan" kinoteatrının əfsanəsi qayıtdı!" - şüarı ilə start götürən kinoteatrın açılış mərasimində bir çox məşhurlar iştirak edib.
Tədbirdə "CinemaPlus" kinoteatrlar şəbəkəsinin baş direktoru Zaur Darabzadə çıxış edərək köhnə adda, amma yeni dizayn və tərtibatla qurulmuş kinoteatrla bağlı məlumat verib.
Dünya standartlarına cavab verən ikimərtəbəli kinoteatrın 3 zalı və 190 oturacaq yeri var. Burada fiziki məhdudiyyətli vətəndaşlarımız da nəzərə alınıb. Bundan əlavə, kinoteatrda birinci mərtəbədən ikinci mərtəbəyə qalxmaq üçün xüsusi liftlər quraşdırılıb. Onların köməyi ilə həm VİP zalın tamaşaçıları növbə gözləmədən zala daxil ola, həm də fiziki qüsurlu insanlar əlil arabaları ilə rahat şəkildə ikinci mərtəbəyə qalxa bilər. Həmçinin əlillər üçün zallarda xüsusi yerlər quraşdırılıb.
Günel CƏLİLOVA
