Mehman Hüseynov: "Tarixə nəzər salsaq görərik ki, ermənilər zaman-zaman bizim hansısa şirniyyat və xörəyi özününküləşdirməklə məşğul olub"
Mənfur düşmənimiz olan ermənilər tək torpağımıza deyil, milli-mənəvi sərvətlərimizə də göz dikir. Bəllidir ki, onlar Azərbaycan mətbəxinə aid olan təamların bir neçəsini öz adına çıxmaq istəyir. Hətta bu istəklərini açıq-aşkar nümayiş etdirirlər.
Bu günlərdə Rusiyanın "Telekafe" televiziya kanalında "Sən gəlməz oldun" musiqisi fonunda lavaş, kətə, təndir çörəyi və Azərbaycan mətbəxinə məxsus digər nümunələr erməni mətbəxi kimi təqdim edilib. Məlumatlara əsasən, həmin veriliş 2014-cü ildə hazırlanıb və yanvarın 8-də yayımlanıb. Verilişin aparıcısının da erməni millətindən olduğu bildirilir.
Kulinariya sahəsində mütəxəssis Mehman Hüseynovun sözlərinə görə, ermənilər hər zaman Azərbaycan mətbəxinə maraq göstərib: "Tarixə nəzər salsaq görərik ki, zaman-zaman onlar bizim hansısa şirniyyat və xörəyi özününküləşdirməklə məşğul olub. Uzağa getməyək, ermənilər lavaşı hətta UNESCO-nun siyahısına saldırmağa çalışsalar da, ölkəmizin rəsmi şəxslərinin səyi nəticəsində onların bu cəhdi fiaskoya uğradı".
Həmsöhbətimiz bildirdi ki, ermənilər daha çox bizim "kətə" adlanan şirniyyatımızı öz adına çıxmaq istəyir: "Etiraf edək ki, bəzi bölgələrimizdə bu şirniyyata hər kəs "İrəvan kətəsi" deyir. Ancaq onun əsl adı "Qarabağ kətəsi"dir.
Mən sizə deyim ki, Qarabağ mətbəxi Azərbaycan kulinariya mədəniyyətinin ilk ocağı sayılır. Qarabağ bölgəsinə mənsub olan təamlar digər dövlətlərin daim diqqət mərkəzində olub. Hələ Sovet İttifaqı dövründən etibarən 15 ən məşhur yemək adı Azərbaycan mətbəxindən oğurlanaraq erməniləşdirilib. Demək olar ki, həmin yeməklərin yarıdan çoxu Qarabağ mətbəxinə aiddir".
M.Hüseynov qeyd etdi ki, bir neçə gün öncə Rusiyanın "Telekafe" televiziya kanalında yayımlanan verilişdə təndirin də ermənilərə məxsus olması barəsində fikir səsləndirilib: "Təndirin Azərbaycana məxsus olmasını sübut etmək üçün uzun-uzadı danışmaq lazım deyil. Ta qədimdən Azərbaycan xalqı təndirdə çörək və lavaş bişirib. Bu faktı tarix sübut edir. İstənilən bədii ədəbiyyatda bu barədə məlumatlar yer alıb".
Qeyd edək ki, Mədəniyyət və Turizm Nazirliyinin mətbuat xidmətinin rəhbəri Vüqar Şıxəmmədov məsələ ilə bağlı media nümayəndələrinə açıqlamasında bildirib ki, ermənilər zaman-zaman Azərbaycanın milli mətbəx və digər mədəniyyət nümunələri ilə bağlı iddialar səsləndirib, lakin həmişə uğursuzluğa düçar olublar: "Ötən ilin 28 noyabr - 2 dekabr tarixlərində UNESCO-nun Qeyri-maddi mədəni irs üzrə hökumətlərarası komitəsinin Efiopiyada keçirilən 11-ci sessiyasında Azərbaycanın təşəbbüsü ilə Azərbaycan, Türkiyə, İran, Qazaxıstan və Qırğızıstan tərəfindən UNESCO-ya birgə təqdim edilən "İncə çörək hazırlama və paylaşma mədəniyyəti: Lavaş, qatırma, yupka, yufka" UNESCO-nun Qeyri-maddi mədəni irs siyahısına daxil edilib. Bu baxımdan ermənilərin iddiaları tamamilə əsassızdır və eyni zamanda "Telekafe" kanalında yayımlanan həmin proqramın 2 il bundan qabaq hazırlandığını nəzərə alsaq, ermənilərin bu iddiaları aradan qalxmış olur. Azərbaycanın zəngin mətbəxi var və bu mətbəx nümunələri Mədəniyyət və Turizm Nazirliyi, digər dövlət qurumları, o cümlədən Azərbaycanın peşəkar aşpazları tərəfindən ölkə xaricində mütəmadi təbliğ olunur".
Günel CƏLİLOVA
