Hər bir yeniyetmənin ürəyində tükənməz bir şeir bulağı qaynayır. Demək olar ki, əksəriyyətimiz 5-6-cı sinifdə oxuyandan şeir yazırıq. Bəzən o şeirləri üzə çıxarırıq, bəzən cırıb atırıq, bəzən də gizlədirik ki, onu bizdən başqa görən olmasın. O yeniyetmələrə haqq qazandırıram ki, onlar yazdıqlarını üzə çıxarır, məsləhət almaq üçün ədəbiyyat müəlliminə göstərir, yeri gələndə çap üçün redaksiyalara ünvanlayır.
Bakının 249 saylı orta məktəbinin 8-ci sinif şagirdi Turqut Tağı redaksiyamıza bir neçə şeir göndərib. Yeniyetmənin duyğuları ilə tanış olduqca, açığı, qürur hissi keçirdim. O, vətən sevdalısıdır. Tariximizə, mənəvi dəyərlərimizə, əcdadlarımızın ruhuna bağlı, sadiq bir məktəblidir. Nə yaxşı ki, Turqut Tağı kimi yeniyetmələrimiz var. T.Tağının şeirlərində vətənpərvərlik ruhu yaşayır, nümunələrdə milli-mənəvi birliyimizi təlqin edən kifayət qədər maraqlı işarələr var. O, gerçək bir vətənpərvərdir.
O, poeziya yollarına hələ yenicə qədəm qoymaq istəyir. Yolu uğurlu olsun! Bildiyim qədər, onun imzası ilk dəfədir mətbuatda görünəcək. T.Tağının iki şeirini sizə təqdim etmək istəyirəm.
İradə SARIYEVA
Oğuz soyu
Türkük biz, türk oğluyuq, Oğuzların soyundanıq. Bu dünyaya müjdə kimi Göndərilib Oğuz babam. Biz ondanıq.
Türklərin bir parçasıyıq, Ruhumuz bir, qanımız bir. İgidlərin məskənisən, Ana Vətən, canımız bir. Oğuzların soyundanıq.
Obaların igidləri Başda durur Bayandur xan! Qazan Xan da yanındadır, Dədə Qorqud-Azərbaycan.
Unutma sən türklüyünü, Almalıyıq Qarabağı! Biz cəsuruq, biz qorxmazıq, Babamızdır şah Xətai. Düşmən görsün sinə dağı.
Xocalı
Qan gölündə boğuldular 26 fevral günü. 1992-nin qışı Çox amansız oldu Vətən. Kəsdi ellər toy-düyünü. Həmin gündən yaralıdır Gözəl bacım-başım tacı, Qardaşımın ürəyi də yaralıdır. Vətən, qaldır sən başını, Kəfən olan bayrağınla Sarıl körpə şəhidlərə! Xocalının qarlı düzü Şəhid qanlı lalə geydi. Anaların sübh salamı Ağı oldu, nalə oldu. Zaman gələr düşmənlərin Beli sınar... Bu qədər qan tökənləri Dünya qınar. Xocalının qışı qanlı, Yazı qanlı... İgidlərim, qisas günü Aman vermə düşməninə. Çox ah çəkib dərd əlindən, Anaların yaşı qanlı.
12.02.2016
