Multikulturalizm və tolerantlıq Azərbaycanda həyat tərzidir. Bu dəyər uzun illərdir cəmiyyətimizdə, söz və incəsənət tariximizdə yerini qoruyub saxlayır. Azərbaycanın təsviri incəsənət ustaları öz fırçalarını tolerantlıq və multikulturalizm sahəsində də işlədib. Noyabrın 29-da Azərbaycan Milli İncəsənət Muzeyində açılan sərgi də bu ideyaya xidmət edir.
"Multikultralizm və Tolerantlıq Diyarı Azərbaycan" layihəsi çərçivəsində Azərbaycan Milli İncəsənət Muzeyində görkəmli Azərbaycan rəssamlarının əsərlərindən ibarət təşkil olunan sərgi Azərbaycan Respublikasının Prezidenti yanında Gənclər Fondunun maliyyə dəstəyi və Bakı Beynəlxalq Multikultralizm Mərkəzi, Dini Qurumlarla İş üzrə Dövlət Komitəsi, Azərbaycan Respublikası Mədəniyyət və Turizm Nazirliyinin təşkilatı dəstəyi ilə keçirilir. 2016-cı ilin ölkəmizdə "Multikuultralizm İli" elan olunması ilə təsdqi edilmiş "Tədbirlər Planına" uyğun olaraq həyata keçirilən sərgidə Azərbaycanın xalq rəssamları Salam Salamzadə, Kazım Kazımzadə, Maral Rəhmanzadə, Güllü Mustafayeva, Kamil Xanlarov, Mikayıl Abdullayev, Böyükağa Mirzəzadə, Nadir Əbdürrəhmanov, Elbəy Rzaquliyev, Cahangir Rüstəmov, Tahir Salahov, Nadir Qasımov, Toğrul Nərimanbəyov, Səlhab Məmmədov, Arif Hüseynov və eyni zamanda əməkdar incəsənət xadimləri Lətif Feyzullayev, Vəcihə Səmədova, Nəcəfqulu İsmayılov, Hafiz Məmmədov, Toğrul Sadıqzadə və Əbdül Xalıq tərəfindən ötən əsrin 50-80-cı illərində yaradılmış, xalqlar dostluğunu tərənnüm edən, özündə multikultral və tolerant dəyərləri ehtiva edən rəngkarlıq və qrafika əsərləri nümayiş olunur.
Tədbirin rəsmi hissəsini açıq elan edən Azərbaycan Dövlət Milli İncəsənət Muzeyinin əməkdaşı Xədicə Əsədova bildirdi ki, Azərbaycan müxtəlif sivilizasiyaların qovşağında yerləşir. X.Əsədova qeyd etdi ki, sərginin baş tutmasında əməyi olan bütün qurumlara minnetdarlığını bildirir. O, həmçinin dedi ki, Milli İncəsənət Muzeyi 1936-cı ildə yaranıb, ilkin dövrdə muzeydə 3500 eksponat olub. Bu eksponatların da bir hissəsi Azərbaycan tarixi ilə, qalan hissəsi isə dünya incəsənətinin incilərindən ibarət olub. Azərbaycan rəssamlarının həmişə multikulturalizm mövzusunda əsərlər çəkdiyini deyən X.Əsədovanın sözlərinə görə, bu əsərlərdə xalqlar dostluğu kimi vacib dəyər tərənnüm edilib.
Tədbirdə layihənin müəllifi və rəhbəri Dilarə Müzəffərli çıxış edərək layihənin məqsədindən danışdı:” "Şadam ki, belə bir sərginin açılmasına nail ola bildik. Azərbaycan təsviri sənətində multikultral və tolerant dəyərlər" mövzusunda konfrans və sərgi kataloqunun təqdimatı keçirildi. Lahiyənin məqsədi bu gün ölkədə dövlət səviyyəsində uğurla davam və inkişaf etdirilən multikultral və tolerant mühitin Azərbaycan rəssamları tərəfindən yaradılan təsviri sənət əsərləri vasitəsilə geniş ictimaiyyətə çatdırılması, Azərbaycanın multikultralizm və tolerantlıq modelinin dünya ölkələrinə nümunə kimi təqdimatı, gənclərə multikultralizm dəyərlərinin aşılanması və toleraltlığın əhəmiyyətinin təqdim olunmasıdır". Azərbaycan Dövlət Rəssamlar Akademiyasının rektoru, akademik Ömər Eldarov isə çıxışında Azərbaycanın multikulturalizm məkanı olduğunu qeyd etdi. Mədəniyyətlərin bir-birinə inteqrasiyasının vacib olduğunu deyən Ö,Eldarov vurğiladı ki, bu gün Azərbaycan dünya üçün bir nümunədir.
Dini Qurumlarla İş üzrə Dövlət Komitəsinin Dinşünaslıq Ekspertizası şöbəsinin müdiri Nahid Məmmədov da bildirdi ki, Azərbaycan rəssamlarının multikulturalizm və tolerantlıq sahəsində fırça işlətməsi təqdirəlayiq haldır. O, dedi ki, keçən əsrin 50-70-ci illərindən yadigar qalan bu əsərlərə fəxr hissi ilə baxılır.
Tədbirdə həmçinin Bakı Beynəlxalq Multikultralizm Mərkəzinin şöbə müdiri Yadigar Məmmədli, Azərbaycan Dövlət Mədəniyyət və İncəsənət Universitetinin rektoru professor Fərəh Əliyeva, Dini Qurumlarla İş üzrə Dövlət Komitəsinin, eləcə də Azərbaycan Respublikası Mədəniyyət və Turizm Nazirliyinin , Azərbaycan Rəssamlar İttifaqının, Azərbaycan Respublikasının Prezidenti yanında Gənclər Fondunun nümayəndələri çıxış ediblər.
Qeyd edək ki, "Multikultralizm və Tolerantlıq Diyarı Azərbaycan" layihəsi çərçivəsində keçirilən sərgi gün davam edəcək.
İradə SARIYEVA
