Azərbaycan dövləti Gürcüstanda yaşayan soydaşlarımızın sosial-iqtisadi, milli-mənəvi problemlərini daim diqqət mərkəzində saxlayır. Dövlətimizlə bərabər ictimai qurumlar da soydaşlarımızın qayğıları ilə maraqlanır. “Borçalı” İctimai Birliyi də mütəmadi olaraq bu problemlərin müxtəlif səviyyələrdə qaldırılmasına və onların müsbət həllinə yardımçı olur.
Noyabrın 28-də Beynəlxalq Mətbuat Mərkəzində keçirilən növbəti belə tədbir Gürcüstanın azərbaycandilli məktəblərində yaranmış təhsil problemlərinə həsr olunub. Bu barədə məlumat “Bakı-Xəbər”ə qurumdan daxil olub. Qeyd edilənə görə, problemlə əlaqədar Azərbaycan Respublikasının Milli Məclisi, Nazirlər Kabineti, Təhsil Nazirliyi, ali məktəb rəhbərləri, tanınmış elm və təhsil işçiləri və digər aidiyyəti qurumlar məlumatlandırılıb və bu qurumların nümayəndələri tədbirə qatılıb. Tədbiri giriş sözü ilə Birliyin sədr müavini Şərif Kərimli açıb. O, əvvəlcə iştirakçıları “Borçalı” İctimai Birliyinin bəyanatı ilə tanış edib. Tədbirdə vurğulanıb ki, hazırda Gürcüstanın azərbaycandilli məktəblərində çalışan və Azərbaycan dili və ədəbiyyatı fənnindən dərs deyən müəllimlərin yaşı 65-70 arasındadır: “Bu müəllimlərin savadına bizim şübhəmiz yoxdur. Lakin zamanın danılmaz dialektikası var: canlı aləm cavanlaşmasa, həyat cansıxıcı olar! Müəllimin cavanlaşması təkcə onun yaşı ilə bağlı deyil: həyat dəyişir - insanların dəyişən mühitə, zamana uyğun olaraq bir-birinə münasibəti də dəyişir. Yeni insanın fikir və duyğularını yeni ədəbiyyata gətirən şair və yazıçılar, alimlər, dilçilər yeni ədəbiyyat yaradır, dil zənginləşir, yeni sözlər yaranır, yeni sözlər yeni insanlarda yeni-yeni təfəkkür tərzi, yeni dünyagörüş, həyata yeni yanaşma incəlikləri formalaşdırır. Və bütün bunları cəmiyyətə məhz müəllim çatdırır”. Verilən məlumata görə, toplantıda qeyd olunub ki, bir vaxtlar Gürcüstanda soydaşlarımızın dövləti vəzifələrə irəli çəkilməməsinin əsas səbəbi kimi onların gürcü dilini pis bilmələri göstərilirdi. Bu gün həmin problem aradan qaldırılıb: “Lakin yüzlərlə gənc ziyalımız yenə də idarəetmə strukturlarına yaxın buraxılmır. İndi isə başqa bir problem yaranıb – dilimizin assimilyasiyası! Cürcü dilini öyrənmək vacibdir, hətta o dildə təhsil almaq da olar, lakin ana dilimiz həmişə başımız üzərində dayanmalı və onu bütün dillərdən uca tutmalıyıq! Bu isə təkcə borçalıların problemi olmamalıdır. Bu, birinci növbədə Azərbaycan dövlətinin, sonra isə Gürcüstan dövlətinin konstitusion vəzifəsidir! Gürcüstandan olan soydaşlarımız güzəştli şərtlərlə Azərbaycanın dövlət universitetlərinə qəbul edilməli, hətta onların Gürcüstanda işlə təmin olunma və əmək haqqı məsələləri barədə düşünülməlidir. Unudulmamalıdır ki, biz Gürcüstanda beş-on şəxsə kömək etmirik, biz böyük Azərbaycan dünyasının arteriyalarını genetik qanımızla təchiz edirik!”. Vurğulanan görə, tədbirdə "Borçalı" İctimai Birliyinin sədri Kərəm Məmmədov, keçmiş təhsil naziri professor Firudin Ağasıoğlu, BDU-nun prorektoru Sani Hacıyev, professor Əli Xəlilli, Nəzimi adına Dilçilik İnstitutunun direktoru, APİ-nin prorektoru, politoloq Natiq Miri, araşdırmaçı-jurnalist Ənvər Börüsoy və başqaları çıxış edib. Xəbər XİDMƏTİ
