Çox mübariz, cəsarətli insan idi. Qələbə çalana qədər haqqı müdafiə etməyi bacarırdı. Klassik musiqi irsimizin çox ləyaqətli, qeyrətli mühafizəçilərindən biri idi. O qədər dəqiq adam idi ki, sözünə bir tük qədər də olsun xəyanət etmirdi. Ləyaqətli insanlar xəyanəti bacarmır axı. Uzun bir ömür yaşadı. Həyatının çox böyük hissəsini fədakarlıqla klassik musiqi irsimizin təbliğinə, ifaçılığına, yeni – yeni musiqiçilər nəslinin yetişməsinə həsr etdi. Nə yoruldu, nə usandı. Yaratmağı, müəllimlərinin yolunu davam etdirməyi həyat kredosu seçdi.
Azərbaycanın xalq artisti, Səid Rüstəmov adına Azərbaycan Dövlət xalq çalğı alətləri orkestrinin bədii rəhbəri və baş dirijoru, Prezident təqaüdçüsü,”Şöhrət” ordenli Nəriman Əzimovu (Nəriman Əzim Gəncəli) xatırlayıram. Böyük sənətkar noyabrın 19-da dünyasını dəyişib. 80 yaşında həyatla vidalaşan Nəriman müəllim çox prinsipial adam idi, heç nə onu prinsiplərindən döndərə bilməzdi. Yaxşı yadımdadır, bir neçə il əvvəl bir neçə musiqi orkestr və ansamblını Azərbaycan Televiziyasının nəzdindən çıxarmaq istəyirdilər. Amma Nəriman müəllimin davamlı mübarizəsi və “Bakı-Xəbər”in müdaxiləsi sayəsində o ansambl və orkestrlər Azərbaycan Televizyasının nəzdində fəaliyyətini davam etdirdi. Nəriman müəllim qədirbilən adam idi, həmişə deyirdi ki, Səid Rüstəmov adına Azərbaycan Dövlət xalq çalğı alətləri orkestri sizin qəzetin dəstəyi sayəsində məhv təhlükəsindən xilas oldu...
Nəriman Əzimovun rəhbərliyi ilə Səid Rüstəmov adına Azərbaycan Dövlət xalq çalğı alətləri orkestri Azərbaycan musiqisini dünyanın dörd bir yanında təbliğ edib. Nəriman müəllim musiqi aləmində baş verən neqativliklərlə barışmazdı. Sözünü məqamında deyərdi.
Ürək çatışmazlığından haqqa qovuşan haqq adamı Nəriman Əzimov 1982-ci ildə Azərbaycan SSR Ali Sovetinin Fəxri fərmanı ilə mükafatlandırılıb. O, 1991-ci ildə Azərbaycan Respublikasının xalq artisti fəxri adına layiq görülüb. Nəriman müəllim xalqa bağlılığını hər zaman sübut edirdi.Sənəti, sənətkarı qiymətləndirə bilirdi.Təsadüfi adam Nəriman Əzimovun orkestrinə yol tapa bilməzdi. Çünki sənətkar buna yol verməzdi.
Nəriman müəllim musiqini qəlbən duyan incə zövqlü bəstəkar idi həm də. Bəstəkar kimi yaratdığımahnılar dövrünün və müasir dövrümüzün görkəmli sənətkarları tərəfindən ifa olunurdu.
Doğma Gəncəsinin adını özünə təxəllüs götürmüşdü. Əməli, fəaliyyəti ilə Gəncənin adını doğruldurdu. Ömrünü fədakarlıqla musiqi sənətinə bağlayan Nəriman Əzimov mənalı, dolğun, faydalı bir ömür yaşadı. Onun ömrü borana da düşdü, tufana da, ancaq o, yolundan dönmədi. İrəlidə onu böyük uğurlar, möhtəşəm konsert salonları, sürəkli tamaşaçı alqışları gözləyirdi. N.Əzimov şöhrətin zirvəsinə çatdı,o zirvədə musiqi sənətinin bayrağını ucaltdı və əbədi olaraq o ucalıqda qaldı. Allah rəhmət eləsin!
İradə SARIYEVA
