Rəşad Həsənov: "Kino sahəsinin inkişaf etdirilməsi ölkənin mədəni irsinin zənginləşdirilməsi baxımından əhəmiyyətlidir"
Azərbaycanda kinematoqrafiya sahəsinə güzəştli kreditlərin verilməsi nəzərdə tutulur. Bunu Milli Məclisin Mədəniyyət komitəsinin sədri Rafael Hüseynov komitənin ötən iclasında yeni "Kinematoqrafiya haqqında" qanun layihəsinin müzakirəsi zamanı deyib.
Hazırda qüvvədə olan qanunun 1998-ci ildə qəbul olunduğunu xatırladan R.Hüseynov bildirib ki, həmin vaxtdan sonra Azərbaycanın xeyli inkişaf etməsi yeni qanun layihəsinin hazırlanmasını zəruri edib. 12 fəsil, 40 maddədən ibarət olan yeni qanun layihəsində filmlərin istehsalı və yayımlanması, milli kinematoqrafiyanın təbliği və qorunması sahəsində yaranan münasibətlər tənzimlənir.
R.Hüseynov əlavə edib ki, yeni layihəyə əsasən, Azərbaycanda fəaliyyət göstərən yayım müəssisələri üçün yayım zamanı milli efir vaxtının həcminin müəyyən edilməsi və tətbiqi müvafiq icra hakimiyyəti orqanının müəyyən etdiyi qaydada həyata keçiriləcək. Milli efir vaxtına riayət edilməsinə nəzarəti də məhz həmin orqan həyata keçirəcək.
Layihədəki digər məsələləri də açıqlayan R.Hüseynov bildirib ki, milli film şəhadətnaməsi filmin yayım dövrünə qədər verilsə, lakin film istehsalçısı filmin istehsalını 1 ildən artıq müddətə dayandırsa və film yayıma verilməsə, həmin şəhadətnamə müvafiq icra hakimiyyətinin qərarı ilə ləğv ediləcək və milli film istehsalçısına həmin filmlə əlaqədar verilən güzəştlər ləğv ediləcək.
Kino sahəsinin inkişafı üçün güzəştli kreditin təklif olunması tək mədəniyyət işçiləri tərəfindən deyil, digər sahələrin nümayəndələri tərəfindən də müsbət qarşılanır. Tanınmış rejissor Rövşən İsax "Bakı-Xəbər"ə açıqlamasında qeyd etdi ki, dünyanın əksər ölkələrində kino dövlətin nəzarətindədir: "Qonşu ölkələrdə belə, kino sahəsinə dövlət tərəfindən xüsusi diqqət ayrılır. İnşallah, bizdə də eyni vəziyyət yaşanar. Kinonun inkişafı üçün güzəştli kredit verilsə, müsbət nəticə əldə etmək olar.
Kino tədricən inkişaf edir. Zamanla bu sahədə uğur əldə olunacaq. Çəkilən kinolar festivallarda mükafat qazana bilər. Amma buna ilk dəfədən nail ola bilmərik. Yenə deyirəm, zamanla istənilən nəticəyə sahib olacağıq. Heç bir rejissor ilk filmi ilə dünyaya səs salmayıb. Kino çox çətin sahədir. Burada təsadüf olmur. Futbolda təsadüfən qalibiyyət əldə oluna bilər. Ancaq təsadüfən yaxşı film çəkilə bilməz. İstənilən ölkənin yaxşı kino çəkməsinin zamana ehtiyacı var. Bir rejissor yaxşı film çəkər, digəri ondan da yaxşısını çəkər. Beləliklə, yaxşı nailiyyət əldə olunar. Xüsusi olaraq vurğulayım ki, biz millət olaraq istedadlıyıq. Azərbaycan xalqı yaradıcı və istedadlıdır".
İqtisadçı-ekspert Rəşad Həsənov qəzetimizə açıqlamasında bildirdi ki, son zamanlar Azərbaycan kinosunun zəif inkişaf etməsinin səbəbi maliyyə çatışmazlığıdır. Bunun müəyyən qədər kompensasiya olunması üçün ölkə başçısı İlham Əliyev tərəfindən sərəncan imzalanıb: "Bu istiqamətdə Prezidentin ehtiyat fondundan maliyyə ayrılıb. Kino sahəsinin inkişaf etdirilməsi ölkənin mədəni irsinin zənginləşdirilməsi baxımından əhəmiyyətlidir. Müəyyən təşviqedici addımlar da atmaq olar, güzəştli kredit də vermək olar. Düşünmürəm ki, hazırda Azərbaycan kinosu inkişaf etdirilərək ölkə iqtisadiyyatına əlavə gəlir gətirə bilər. Hələlik, böyük ehtimalla, bu filmlərin izləyicisi Azərbaycan tamaşaçıları olacaq".
Günel CƏLİLOVA
