Milli Akademik Dram Teatrında Azərbaycan musiqisinin qədim incisi "Sarı gəlin" xalq mahnısının tarixi faktlar əsasında səhnələşdirilmiş tamaşasının təqdimatı olub.
Tədbirdə gənclər və idman naziri Azad Rəhimov, Milli Məclisin deputatları, dövlət rəsmiləri və digər qonaqlar iştirak edib. 3 hissədən ibarət layihənin 1-ci bölümündə qonaqlar teatrın foyesində qurulan "Azərbaycan musiqisi tarixinə səyahət" adlı sərgi ilə tanış olub. Sərgidə qonaqlar Azərbaycan Musiqi Mədəniyyəti Muzeyi tərəfindən layihədə sərgilənmək üçün təqdim edilən qədim musiqi alətləri - cəng, çəqanə, rud və s., eyni zamanda, Bakı Milli Geyim Evi tərəfindən hazırlanan qədim milli geyimlərlə tanış olub, milli ornamentli xalçalarımıza baxış keçirilib, milli tətbiqi sənət məhsulları da nümayiş etdirilib.
Daha sonra teatrın zalında "Sarı gəlin" mahnısının tarixçəsi haqqında hazırlanan videomaterialın təqdimatı keçirilib. Videomaterialda "Sarı gəlin" layihəsinin elmi rəhbəri, AMEA-nın Tarix İnstitutunun direktoru, AMEA-nın müxbir üzvü, əməkdar elm xadimi Yaqub Mahmudov və Bakı Musiqi Akademiyasının elmi işlər üzrə prorektoru, professor Gülnaz Abdullazadənin mahnının yaranma tarixi haqda təqdim etdikləri faktlar müsahibələr şəklində nümayiş olunub.
Filmdən sonra isə "Sarı gəlin" tamaşası tamaşaçılara təqdim edilib.
Gənclər və İdman Nazirliyi tərəfindən təqdim olunan layihənin həyata keçirilməsində əsas məqsəd gənclərin Azərbaycanın milli-mədəni irsi və tarixi haqqında məlumatlandırılması, adət və ənənələrin onlar tərəfindən qorunub saxlanması və təbliğ edilməsidir. 150 nəfərə yaxın tələbə və aktyorun iştirakı ilə hazırlanan "Sarı gəlin" tamaşasının rejissoru respublikanın əməkdar artisti Nicat Kazımovdur.
Günel CƏLİLOVA
