Mənim aləmimdə sazı, sözü ilə könüllərdə iz qoyan aşıqlar, ustadlar ölmür, onlar özlərinə yeni yaşam ömrü qazanırlar. XX əsrin qüdrətli aşıqlarından olan aşıq Pənah Pənahov kimi...
Dövrünün populyar aşıqlarından biri kimi ictimai həyatda çox fəal olan aşıq Pənah böyük yaradıcılıq yolu keçib. 90 illik yubileyi qey edilən ustad aşıq 52 yaşında dünyadan köçüb. Cəmi 52 bahar yaşadı, amma özündən sonra tükənməz sərvət qoyub getdi.
Toylar bəzəyi olan bir sıra mahnılar var ki, onlar aşıq Pənahın ürəyinin odundan yaranıb.
Oktyabrın 25-də R.Behbudov adına Dövlət Mahnı Teatrında Azərbaycan aşıq sənətinin görkəmli nümayəndəsi Aşıq Pənahın anadan olmasının 90 illiyinə həsr edilmiş təntənəli tədbir keçiridi. Onu da vurğulayaq ki, aşıq Pənahın 90 illik yubileyinə həsr edilən xatirə gecəsinə saysız tamaşaçı gəlmişdi. Bu da onu deməyə əsas verir ki, 38 il əvvəl vəfat etməsinə baxmayaraq Pənah xalqın sevimlisi olaraq qalır.
Qeyd edək ki, Mədəniyyət və Turizm Nazirliyinin və Azərbaycan Aşıqlar Birliyinin (AAB) birgə təşkilatçılığı ilə keçirilən tədbirdə aşığın həyat və yaradıcılığını əks etdirən videoçarx nümayiş olundu.
AAB-nin sədri, Əməkdar Elm Xadimi, professor Məhərrəm Qasımlı XX əsr aşıq sənətinin görkəmli nümayəndələrindən biri olan Aşıq Pənahın təkcə Azərbaycanda deyil, keçmiş SSRİ məkanında, hətta xarici ölkələrdə tanındığını bildirdi. M.Qasımlı vurğuladı ki, Əməkdar Mədəniyyət İşçisi kimi fəxri ada layiq görülən aşığın bir çox əsərlərinin indi də ədəbiyyatımızın və musiqi tariximizin qızıl fondunu bəzəyir. AAB sədri qeyd etdi ki, bu gün həm aşıqlar, həm muğam ifaçıları, həm də estrada musiqiçiləri aşıq Pənahın yaratdığı mahnıları ifa edirlər. Az ömür yaşayan, lakin ustadlar-ustadı adlandırılan Aşıq Pənah sazda 32 ənənəvi aşıq havasını məharətlə ifa edib. Aşıq Pənahın qaynar istedadı, rəvan təbi olub ona imkan verib ki, 18 aşıq havası (“Dilbər”, “Yeddi qardaş”, “Azərbaycan” və s.) bəstələyib. Eyni zamanda mahnılar da bəstələyən aşığın “Nə qəşəng bəzənmisən!”, “Ana Kürüm” və digər mahnıları hələ aşığın sağlığında çox geniş yayılıb, bu gün də sevilə-sevilə müğənnilərimizin repertuarını bəzəməkdədir.
Bildirilib ki, Aşıq Pənah Azərbaycan Yazıçılar Birliyinin üzvü idi, o, "Saz və söz”, "Məhəbbətdən danışaq”, "Təzə söz, təzə mahnı”, “Mənim sazım” kimi şeirlər kitablarının müəllifi idi.
Aşıq Pənahın əvəzsiz sənətkar, sinədəftər el aşığı və xeyirxah dost olduğunu qeyd edən SSRİ xalq artisti Arif Məlikov aşıq Pənahı həm sənətkar, həm də aşıq kimi xarakterizə etdi. O, qeyd etdi ki, aşıq Pənah “Qəhrəman şah Nəcəf”, “Əsli və Kərəm”, “Aşıq Qərib” və s. dastanları məclislərdə məharətlə ifa edib. Aşıq Pənahın özünün yaratdığı 2 dastan (“Sülh”, “Pambıqçılar”) və 130-a yaxın qoşma müəllifi olduğunu bildirib.
Qeyd edək ki, görkəmli aşığın xatirə gecəsində sənətkarın ömür yolu ilə bağlı videoçarxlar nümayiş olunmaqla yanaşı aşıq və xanəndələrin ifasında onun mahnıları səsləndirildi. Gecədə ilk ifanı aşıq Əli Tapdıqoğlunun rəhbərlik etdiyi qrupun ifasında təqdim edildi. Gecədə həmçinin aşıq Əhliman Şirvanlı, aşıq Ağamurad Şirvanlı, aşıq Altay Məmmədli və Aşıq Gözəl Kəlbəcərli, “Çeşmə” qrupu, mümənni Zakir Əliyev, xanəndə Ayşən Mehdiyeva və digərləri çıxış etdilər.
Sonda sənətkarın oğlu Ələsgər Pənahov çıxış edərək aşıq sənətinə göstərdiyi misilsiz qayğıya görə Azərbaycan Respublikası Prezidenti İlham Əliyevə, Heydər Əliyev Fondunun rəhbəri, millət vəkili UNESCO və İSESKO-nun xoşməramlı səfiri Mehriban Əliyevaya minnetdarlıq etdi. O, eyni zamanda mədəniyyət və Turizm naziri Əbülfəs Qarayevə, AAB sədri, əməkdar elm xadimi Məhərrəm Qasımlıya və gecədə iştirak edən qonaqlara təşəkkür etdi:”Ən böyük təşəkkürüm isə atamadır. Ata bu dünyada şərəfli ad qoymusan, dünyadan vaxtsız köçsən də yaşayırsan. Bu gün aşıq Pənahın övladları hara gedirsə orada böyük hörmət görür”.
İradə SARIYEVA
