Bəzi qulağı sırğalı "kişi" müğənnilər yenidən televiziya efirlərində görünməyə başlayıb...
Xəyalə Rəis: "Qulağına sırğa taxıb, efirdə yüngül hərəkət edən bəzi kişi müğənnilər özlərini əcnəbi sənətçilərə bənzətmək istəyir, ancaq onlar unudur ki..."
Azərbaycan televiziyalarında yayımlanan verilişlərə ekspert qismində müxtəlif sahədə çalışan şəxslər dəvət olunur. Sosial xarakterli, maarifləndirici və ya şou verilişlərdə iştirak edənlər arasında müğənnilər də olur. Müğənnilər o cür verilişlərdə tək mahnı ifa etmir, eyni zamanda mövzu ilə bağlı öz fikirlərini səsləndirir.
Son zamanlar efirə dəvət olunan müğənnilərin cinsinə görə geyimi, onların davranışları tamaşaçılar tərəfindən heç də xoş qarşılanmır. Məsələn, qulağına sırğa taxan kişi müğənnilər bu gün efirdə daha çox görünür. Onlar müxtəlif mövzulu proqramlarda iştirak edərək tamaşaçılara milli-mənəvi dəyərlərdən bəhs edir. Hətta elə proqramlar olub ki, efirə dəvət olunan kişi müğənnilərin əynində qırmızı rəngli şalvar, qulağında sırğa, saçı isə bəzəkli formada olub. Bu cür müğənnilər efir vasitəsilə tamaşaçılara tərbiyədən, əxlaqdan, ailə dəyərlərindən danışır.
Sənətşünas Xəyalə Rəis mövzu ilə bağlı "Bakı-Xəbər"ə açıqlamasında qeyd etdi ki, bu gün şou-biznes nümayəndələrinin, xüsusilə də kişi ifaçıların nəinki efirdə, hətta real həyatda belə davranış tərzi heç də ürəkaçan vəziyyətdə deyil: "Efir etikası, estetikası deyilən bir şey var. Son zamanlar nəinki bu estetikaya önəm verən yoxdur, ifaçılarımızın efirlə bazarı qarışıq saldığı anlar da olur. Bu gün hansı kanalı açırsansa, oradan bir şou adamı çıxır. Onlar yeri gələndə həkim, mühəndis, dayə, iqtisadçı, müəllim olur. Yəni bu ölkənin bir ixtisaslaşmış elmlər doktoru, professoru yoxdurmu ki, qoyulan məsələ ilə bağlı fikir bildirsin? Axı onlar bu işin peşəkarıdır, bunun üçün illərini sərf edir. Mən çox zaman verilişlərin redaktorlarının sağlam düşüncə sahibi olduğuna belə şübhə edirəm. Bir mövzu müzakirəyə çıxarılan zaman bu işdə təcrübəli olan mütəxəssislərə müraciət etmək lazımdır. Ancaq təəssüf ki, həmin verilişdə ekspert qismində şou-biznes nümayəndələri seçilir və onlar da iştirak edir. Verilişə dəvət olunan müğənnilər arasında elələri var ki, onların övladlarının atası fərqli kişilərdir. O cür müğənnilər efirə çıxıb gənc qızlara qaynana yanında necə hörmətli olmaqdan danışır. Özünə hörmət edən hər bir redaktor mövzuya uyğun dəvət etdiyi qonağın statusunu nəzərə almalıdır. Daha bu gün filankəsin boş vaxtı var, gəlib efiri doldursun kimi düşüncəyə sahib olmamalıdır. Verilişə ekspert qismində dəvət olunan hər hansı qonaq elə çıxış etməlidir ki, tamaşaçı ondan nəsə götürsün. İki cümləni ard-arda deyə bilməyən şou-biznes nümayəndələrini dəvət edib verilişi gözdən salmamalıdırlar".
Həmsöhbətimiz milli mentalitetimizə yad şəkildə efirə çıxan kişi ifaçılardan da söhbət açdı: "Artıq bu günün tamaşaçısı Nadirə, Telli Borçalıya baxmaq istəmir. Göz, beyin doyub artıq. Ancaq nə edək ki, efir evimizin dəvətsiz qonağıdır. O ki, qaldı efirdə bizim milli mentalitetdən kənar hərəkətlər edib, efirdə özünü yüngül aparan kişi müğənnilərinə, onlar özünü xarici şou-biznes nümayəndələri ilə müqayisə edir. Ancaq unudurlar ki, bura nə Avropa, nə də Asiyadır. Yaşadığımız diyar milli mentalitetin hər şeydən üstün olduğu Azərbaycandır. Çox zaman da "mən incəsənət adamıyam, belə olmalıyam" - deyərək özlərinə bəraət qazandırırlar. İfaçısansa, bu o demək deyil ki, efirə çıxıb klounluq etməlisən, qulağına sırğa taxıb, ağzına saqqız alıb efirə gəlməlisən. Bu, ilk növbədə, ekran qarşısında əyləşən tamaşaçıya hörmətsizlikdir. Belə olan halda, həmin verilişlərin redaktorları hara baxır?".
Günel CƏLİLOVA
