Aç, aç gözlərini, Cavid əfəndim,
Sənə söyləməyə çoxlu sözüm var. Bəşər tarixinin qızıl fondunda, Gör neçə əsərin qalıb yadigar.
Səhnədən düşməyir söz incilərin, Məhəbbət, sədaqət yenə öndədir. Şeyx Sənan, Maralın saf arzuları, İstəyi, diləyi ürəklərdədir.
Aç, aç gözlərini, Cavid əfəndim, Qoy deyim, nə böyük ürəyin varmış. Səni görsə idi Nəsimi babam, Söylərdi: Qəlbinə cahan sığarmış.
Sən cahan mülkünün söz sərkərdəsi, Ən böyük dahisi, oğlu olmusan. Sən cahan mülkünün söz xəzinəsi, Sevən ürəklərə axıb dolmusan.
Aç, aç gözlərini, Cavid əfəndim, O məkrli illər arxada qalıb. Doğma Vətəninin hər qarışında Azadlıq, istiqlal qələbə çalıb.
Bu yurdun qəhrəman övladlarına Günəş də, ulduz da məftun olubdur. Çünki hər bir ana oğlu, qızını Vətəni yolunda igid doğubdur.
Səninlə fəxr edir anam Naxçıvan, Səninlə fəxr edir dünya, şairim! Sənin şərəfinə, sənin adına, Abidə ucaldıb ulu öndərim.
Söyləyim, adını daşıyan muzey, Mənəvi irsini yaşadır burda. Keçdiyin mənalı həyat yolunu Hər Vətən oğluna anladır burda.
Rövşən HÜSEYNOV
