Oktyabrın 25-də Şirvan aşıq mühitinin parlaq simalarından olan və aşıq sənətinin inkişafında, təbliğində xüsusi xidmətlər göstərən Azərbaycan Respublikasının əməkdar mədəniyyət işçisi, Azərbaycan Yazıçılar Birliyinin üzvü olmuş aşıq Pənah Pənahovun xatirə gecəsi keçiriləcək.
Mədəniyyət və Turizm Nazirliyi və Aşıqlar Birliyinin təşkilatçılığı ilə keçirilən gecə görkəmli sənət xadiminin 90 illik yubileyinə təsadüf edir. Bu barədə "Bakı-Xəbər"ə Azərbaycan Aşıqlar Birliyinin katibi Altay Məmmədli məlumat verib. A.Məmmədlinin bildirdiyinə görə, gecə Rəşid Behbudov adına Mahnı Teatrında keçiriləcək və giriş sərbəstdir.
Qeyd edək ki, Pənahov Əlipənah (Pənah) Ələsgər oğlu 12 dekabr 1926-cı ildə Salyanda dünyaya gəlib. 26 avqust 1978-ci ildə isə dünyasını dəyişib.
Bildirək ki, Azərbaycan dövləti aşıq Pənahın yaradıcılığına, mənəvi irsinə, xatirəsinə hər zaman hörmətlə yanaşıb. Görkəmli aşığın adına Salyanda bir küçə və bir məktəb var. Ev muzeyi fəaliyyət göstərir. Məlumatlara görə, aşıq Pənah 1948-ci ildən aşıqlıq edib. Aşıq sazda Şirvan mühiti üçün ənənəvi olan 32 aşıq havasını ustalıqla ifa edirdi. Aşıq Pənah 18 aşıq havası ("Dilbər", "Yeddi qardaş", "Azərbaycan" və s.) bəstələyib. Eyni zamanda mahnılar da bəstələyib, "Nə qəşəng bəzənmisən!" bu sırada xüsusi qeyd edilməlidir. "Qəhrəman şah Nəcəf", "Əsli və Kərəm", "Aşıq Qərib" və s. dastanları məclislərdə məharətlə ifa edib. Aşıq Pənah 2 dastanın ("Sülh", "Pambıqçılar") və 128-ə qədər qoşmanın müəllifidir.
Aşıq Pənahın 1963-cü ildə "Saz və söz", 1966-cı ildə "Məhəbbətdən danışaq", 1971-ci ildə "Təzə söz, təzə mahnı", 1978-ci ildə isə "Mənim sazım" şeirlər kitabı işıq üzü görüb.
1962-ci ildə ekranlaşdırılan "Böyük dayaq" bədii filmində onun ifasına yer verilib. 2007-ci ildə Eldar İsgəndərzadənin ssenarisi əsasında haqqında "Aşıq Pənah" sənədli filmi çəkilib.
İradə SARIYEVA
