Azərbaycanın Bütövlüyü Uğrunda Cəmiyyət "Vətənpərvərlik hissinin yüksəldilməsində QHT-lərin rolu" mövzusunda növbəti tədbirini 283 saylı tam orta məktəbdə keçirib. Məktəbin direktoru Tünzalə Zeynalova bildirib ki, müasir gənclərimizdə vətənpərvərlik keyfiyyətlərini formalaşdırmaq üçün siyasi və ictimai tərbiyə işinin effektliliyini artırmaq, onların dünyagörüşünü inkişaf etdirmək, özünütərbiyəsinə diqqəti artırmaq, sosial əhəmiyyət kəsb edən ideyaların, normaların və prinsiplərin mənimsənilməsinə yönəldilmiş fəallığı stimullaşdırmaq vacib məsələdir.
Sonra layihə rəhbəri Məlahət Xəlilova bildirib ki, Azərbaycanın Bütövlüyü Uğrunda Cəmiyyət Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirilən "Vətənpərvərlik hissinin yüksəldilməsində QHT-lərin rolu" layihəsi çərçivəsində icra planına uyğun olaraq növbəti tədbirini keçirir. Tədbir "Azərbaycan yazıçılarının əsərlərində milli vətənpərvərliyin və qəhrəmanlığın təbliği" mövzusuna həsr olunub.
Yazıçı-publisist, tarixi romanlar müəllifi Yunus Oğuz deyib ki, vətənpərvərlik elə bir mənəvi hissdir ki, onun varlığı millətin, dövlətin mövcudluğu deməkdir. Vətənpərvərlik fərdin öz içində millətini, dövlətini, Vətənini sevməsi deməkdir. Təbii ki, öz ailəsini qoruya bilməyən Vətəni də qoruya bilməz. Bu hissin gənclərə, xüsusən gənc əsgərlərə aşılanmasında yazarların rolu əvəzsizdir: "Hesab edirəm ki, müğənnilərdən çox yazıçı və şairlər cəbhə bölgəsinə getməlidir. Çünki gənc əsgər kimi görürsə ona bənzəməyə çalışacaq. Bu isə Azərbaycan vətəndaşının formalaşmasımda müstəsna əhəmiyyət daşıyır". Onun sözlərinə görə, vaxtilə Sovet ideologiyasının təsiri altında olduğumuzdan, tarixi şəxsiyyətlərimizi ya tanımırdıq, ya da təhrif olunmuş şəkildə təqdim olunurdu. Bu gün isə torpaqlarımız işğal altında olduğundan tarixi şəxsiyyətlərimizin, eləcə də qəhrəmanlarımızın təbliğinə ehtiyac var: "Gənclərin milli mənlik şüurunun inkişaf etdirilməsi, onlara vətənpərvərlik hisslərinin aşılanması, gənc nəslin məhz bu ruhda tərbiyə olunması günümüzdə xüsusi diqqət yetirilməli olan sahələrdəndir: "Təbii ki, dövlət və onun müvafiq qurumları bu istiqamətdə öz üzərilərinə düşən vəzifələri yerinə yetirirlər. Biz yazarlar da gənclərin vətənpərvər ruhda böyüməsi məqsədilə üzərimizə düşən vəzifəni layiqincə yerinə yetirməliyik". Onun sözlərinə görə, Azərbaycan tarixində Vətən uğrunda mücadilə aparan kifayət qədər tarixi şəxsiyyətlərimiz olub: "Həmin tarixi şəxsiyyətlərin bir çoxu yaxşı-pis qələmə alınıb. Ancaq Birinci Qarabağ savaşında da kifayət qədər igidlərimiz olub ki, onların da qəhrəmanlıq obrazının yaradılmasına ehtuyac var. Xüsusən, aprel döyüşlərində Azərbaycan gənclərinin göstərdikləri qəhrəmanlıqlar əsil yaradıcılıq mövzusudur. Biz öz əsərlərimizdə Azərbaycanın igid əsgərlərinin qəhrəmanlıq obrazını yaratmalıyıq. Çünki bu qəhrəmanlıq salnamələri gənclər üçün bir vətənpərvərlik nümunəsidir. Hesab edirəm ki, yazarlarımız bu qəhrəmanların keçdiyi həyat və döyüş yolunu qələmə almaqla yeni-yeni əsərlər ortaya qoymalıdır. Bu əsərlərdə əsgər və zabitlərimizin qəhrəmanlıq nümunələri əksini tapmalıdır".
Millət vəkili, yazıçı Aqil Abbas qeyd edib ki, gənc nəslin vətənpərvər ruhda tərbiyə olunması orta məktəbdən başlanmalıdır. Çünki vətənpərvərliyin qayəsini elm təşkil edir. Orta məktəb isə vətəndaş hazırlayan təşkilatdır. Fərd vətənpərvər deyilsə, yüz dəfə "Babək", "Dolu" filminə baxsa yenə də vətənpərvər olmayacaq.
Yazıçı Elçin Hüseynbəyli qeyd edib ki, vətənpərvərlik sevgi kimi bir şeydir, onu qışqırmaqla aşılamaq mümkün deyil: "Qarabağ mənəvi baxımdan bütün azərbaycanlıların Vətənidir. Qarabağın işğalı mənəviyyatın, adət-ənənənin, ruhun işğalıdır. Odur ki, biz özümüz işğal altında olan torpaqlarımızı azad etməyə hazır olmalıyıq. Hər kəs öz sahəsində qəhrəman olsa bizə heç kim qalib gələ bilməz. Bu hisslər insanın içindən gəlməlidir".
Yazar Əbülfət Mədətoğlu tədbir iştirakçılarına döyüş xatirələrindən danışıb: "Mən illərlə döyüş bölgəsində olmuşam. Gəldiyim qənaət ondan ibarətdir ki, əsgərlərə mənəvi dayaq olmaq lazımdır. Əsgər biləndə ki, onun və ailəsinin qayğısına qalan var, döyüş ruhu yüksək olur".
Qarabağ qazisi Nahid Canbaxışlı qeyd edib ki, vətənpərvərliyin təbliği yüksək səviyyədə olanda əsgərlərin döyüş ruhu da yüksək olur: "Biz də yüksək döyüş əzmini qəhrəmanlarımızdan almışdıq. Döyüşə gedəndə yalnız torpaqlarımızı yağı düşməndən azad etmək barədə düşünürdük. Odur ki, döyüşə ölməyə yox, öldürməyə getmişdik. Hazırda da torpaqlarımızı işğaldan azad etməyə hazır olan kifayət qədər qəhrəman əsgərlərimiz var. Çox təəssüf ki, ermənilərin himayədarları buna imkan vermir. Lakin bu o demək deyil ki, gənclərimizin vətənpərvər ruhda tərbiyəsi arxa plana keçirilsin. Mən vətənpərvərəm, mənim ətrafım da vətənpərvərdir. Hazırda oğlum Vətən qarşısında borcunu yerinə yetirir. İnanıram ki, o da kifayət qədər vətənpərvərdir".
Valideyn Alıyev Nuralı bildirib ki, Azərbaycanın ədəbi nümayəndələrinin böyük əksəriyyəti öz əsərlərində vətəndaşların vətənpərvərlik hissinin gücləndirilməsi məsələsini əsas ideya kimi götürüb. Hazırda da yazarlarımız Qarabağ müharibəsi şəhidləri və qəhrəmanlarının həyat və fəaliyyətinin işıqlandırılmasında mühüm rol oynayırlar.Azərbaycanın milli qəhrəmanlarının və ərazi bütövlüyü uğrunda döyüşlərdə şücaət göstərmiş gənclərin tanıdılması ilə bağlı əsərlərin ərsəyə gətirilməsi daha vacibdir. Bu gün həm məktəblərin, həm də yazarların qarşısında duran mühüm vəzifələrdən biri ölkəmizdə elmə, biliyə önəm verən vətənpərvər gənclər ordusunun yetişməsinə yardımçı olmaqdır.
"Olaylar"
